28
Tiro ŋicwofuŋte okacdâŋ
1 Wofuŋte dâŋ norao ʒuhuckerâ ʒiŋuc fuawec:
2 “Ŋicte ɋâric, go Tiro haere ŋicwofuŋ dâŋ kecʒiŋuc âzâcnezemec: Wofuŋ Anutuzi ʒiŋuc mukac:
“Go maŋfefe bâfuahuc dâŋ ʒiŋuc muekic:
‘No nemu, no hâcne hâwec sawao nemu jaŋere ŋeŋeo ŋeekopac.’
Gahacnere ‘No nemu jukopac â nemure mamanasu fonarekac,’
iŋuc muekiczi sifu nemu mi ehuc ŋic sawa juekic.
3 Gore maŋɋârâŋ i jâmbomac Daniere maŋɋârâŋ sirickekac;
â gore maio wiac soŋsoŋ moc mi fokac.
4 Maŋɋârâŋ â mamana saric fogarekacte
moneŋ mafa hure hemârec emeŋ,
ehuc gol â siliwa râe guruc emeŋ.
5 Go nareŋ gareŋ gie bapare mamana tara fogarekacte
moneŋ mafa sâkohec emeŋ,
eme moneŋ mafage fua ɋârâŋ ewec
irec sâc jaha maŋfefege fua‐garewec.
6 Irec Wofuŋ Anutu no dâŋ kecʒiŋuc mukopac:
Manakic, go nemu mamana fonarekac muekicte,
7 no mupe ŋic furune â repic qapicne
jaŋe râsi fisi‐garenʒepieŋ;
ehuc ʒikazi guhuc mamana saric
â ʒâŋe biŋege bawahanʒepieŋ.
8 Jaŋe sârocgupie nombâŋko huzemec,
ehuc ʒikazi qâhâmoc‐jopakicne jaŋe iŋucne erâ
hâwec ʒâkâŋko hurâ hâmo sipiric ezemec.
9 Eme go nemu aricne, ŋic sawa juekiczi,
sifu qa sipiric egarepie,
jaŋere maio ʒiŋuc ʒuhuckerâ sâcne mucmu me: ‘No nemu?’
10 Go sahac‐jeŋicko ma mi bakicne
jaŋere hâmocte sâc ŋic furune jaŋere meo ferâ hâmozemec.
No Wofuŋ Anutuzi mukopac hâcne.”
Tiro ŋicwofuŋ ere makuc gae
11 Wofuŋte dâŋ norao ʒuhuckerâ ʒiŋuc fuawec:
12 “Ŋicte ɋâric, go Tiro ŋicwofuŋ ere makuc gae moc hefuahuc ʒiŋuc âzâcnezemec: Wofuŋ Anutuzi ʒiŋuc mukac:
“Go fuarâ ŋic tiŋne jâmbâŋ
mamana sâkohec â sahac hawari biaŋhec jumeŋ.
13 Go Anuture jufu gie Edeŋko hâcne jumeŋ;
ehame qânâ furi sâko fuŋne fuŋne kecʒiŋuc jaŋe erige embiŋ:
Bâbâroŋ, bâbâŋeŋ, ɋaɋacne â âmuc âmucne,
kedane, ɋaɋacne kiruŋ iŋucne, keŋkeŋne,
bâbâroŋ soc iŋucne erâ ârâŋ ɋâri.
Hazec warawa â eri wiacge gâcne i golzi bakicne,
wiac i fuameŋ dameŋ ira bâfua‐garekicne.
14 Go kerubim micne wokemaŋ ruacnekicne iŋucne tinac,
ehuc Anuture tiri tikio juhuc
qânâ findowakicne jaŋere ŋondeŋko rac warec emeŋ.
15 Go fuameŋkonecteaŋ bahac tâmiric juwefuhuc
ʒâhec kiŋ bâfuameŋ.
16 Go nareŋ gareŋ gie sâko bahuc
sindaŋ fuŋne fuŋne erâ sâqoremeŋ,
irec no wiac omane iŋucne Anuture tikionec bârâriecgupe kerubim micnezi
qânâ findowakicne jaŋere ŋondeŋkonec jâpecguwec.
17 Go sahac hawari biaŋgere erâ maŋfefe emeŋ,
ehuc ʒâŋe biŋegere erâ
maŋɋârâŋge hesifuckemeŋ.
Eme no irec hâcne mâreŋko tuŋgupe waha qameŋ;
erâ ŋicwofuŋ jaŋere maio
fuŋnege bataniŋkepe honecgurâ mu gâgâwi egarembiŋ.
18 Go nareŋ gareŋ gie sisifucne bahuc kiŋsâko hurerâ
furufic‐nane gâc hecnemeŋ;
eme no hâcne mupe irecnec ʒoc fuarâ ʒâseŋguwec;
ehame ŋiczi honecgu‐fârehapie ʒafe efâremeŋ.
19 Ŋicne ŋicne jaŋeraonec gâcnezi hone manac egareeŋgopieŋ
jaŋe bipic tatara ejarekac,
go ɋeŋfâfâc jaha sipirickemeŋ,
go omae‐jâmbâŋkemeŋ hâcne.”
Sidoŋ haere okacdâŋ
20 Wofuŋte dâŋ norao ʒuhuckerâ ʒiŋuc fuawec:
21 “Ŋicte ɋâric, go Sidoŋ hae maickerâ findaŋdâŋ muzemec.
22 Ehuc ʒiŋuc jazazemec: Wofuŋ Anutuzi dâŋ kecʒiŋuc mukac:
“O Sidoŋ hae, go manac: No râsi egarehuc
tâpiri‐nanere fuŋne gorao bataniŋkepemu.
Eme tiri juju‐nanere fuŋne bajaŋgeŋkehuc okacne bazu‐garepe,
no hâcne Wofuŋ jukopac i mana tarazemec.
23 No mupe huc hâmoc fua‐gareocmu,
â hae ʒoŋagao soc hoŋkeniŋmu;
ehame ʒikazi mâreŋ ŋifec â ŋifeckonec fisi‐garerâ
qa sipiric egareocmu.
Iŋuc fua‐gareme, no hâcne Wofuŋ jukopac
i mana tarazemec.
24 “Israe kikefuŋ rârec‐jopahuc qaisoc‐joparâ mu âke sisic ejarembiŋ ŋic i jaŋere ʒârâ hâriŋzi Israe ŋic ba sipiric me ba bâʒâic mocwâc mi ejarezejec. Eme jaŋe, no hâcne Wofuŋ jukopac i mana taranʒepieŋ.”
25 Wofuŋ Anutuzi dâŋ kecʒiŋuc mukac: “No Israe kikefuŋ jaŋe ŋic gurune gurune jaŋere ŋondeŋko bâtâtiec‐jopakicnaonec ro qâzuc ejarerâ ŋicne ŋicne jaŋere maio tiri juju‐nanere fuŋne bataniŋkepe mâreŋ‐jeŋic kiŋaŋŋic‐nane Jakobo râcne tahac epo ira ŋec juc enʒepieŋ.
26 Ehuc ira juhâc qâhâmohuc fic hae‐jeŋic barâ waiŋ saranʒepieŋ. No ŋic rârec‐jopahuc bâʒâic‐jopambiŋ jaŋerao okac babazu gie bahape Israe ŋic jaŋe juhâc qâhâmonʒepieŋ. Ehuc no hâcne Wofuŋ Anutu‐jeŋic jukopac i mana taranʒepieŋ.”