37
Porofetezi wâneŋko ŋicsiec forame honewec
1 Wofuŋ e nohec juwecte Mâro‐ticnezi jowacnurâ wâneŋ ʒâʒâŋiŋko ŋicsiec fusucmarâ fowecko ira râecnuwec.
2 Ehuc enareme ŋondeŋ‐jeŋicko rac warec ehuc ʒiŋuc hone‐fârepo: Jaŋe siec kereŋ seŋseŋnezi wâneŋ i sâcke‐fârerâ forambiŋ.
3 Eme Wofuŋzi ʒiŋuc nazawec: “Ŋicte ɋâric, siec keci jaŋe jujuhec sâcne eniŋmu me?” Mume mupo: “O Wofuŋ Anutu, i goki mana‐fârekic.”
4 Eme harierâ ʒiŋuc nazawec: “Go siec wiac keci jaŋe findaŋdâŋ jazahuc ʒiŋuc muzemec: O siec kereŋ seŋseŋne, ŋoŋe Wofuŋte dâŋ mananiŋ.
5 Wofuŋ Anutu e siec ŋoŋe dâŋ ʒiŋuc ŋazakac hâcne: Manaŋgopieŋ, no Mâro ficne‐ŋarepe maŋŋeŋicko hume ɋârerâ juniŋmu.
6 Eme no mupe rua â sahac biuchec ehapie Mâro ficne‐ŋarepe ɋârerâ junʒepieŋ, ehuc no hâcne Wofuŋ jukopac i mana taranʒepieŋ.”
7 Eme mutâcne‐narekicne irec sâcko findaŋdâŋ mupo. Muhape izia mi siec jaŋe qiriŋ qarâ fânâŋkehuc iitic enʒepieŋ i!
8 Eme no honec‐jopahape jaha rua â sahac biuchec efârembiŋ, mâc nokafe ine mi hembiŋ.
9 Iŋuc fuame Wofuŋzi ʒiŋuc nazawec: “O ŋicte ɋâric, go nokafe e findaŋdâŋ âzâcnehuc ʒiŋuc muzemec: Wofuŋ Anutuzi kecʒiŋuc mukac: O nokafe, go mâreŋ faic â juwic erâ ŋifec â ŋifec irecnec fisirâ ŋic qâhâmoc‐jopakicne jaŋere maŋko hutec juju fua‐jarezejec.”
10 Eme no mutâcne‐narewec irec sâc findaŋdâŋ mupe nokafe fisi raʒime juju fua‐jareme fahare domambiŋ. I ŋic guru sâkozi iŋuc embiŋ.
11 Eme Wofuŋzi dâŋ kecʒiŋuc nazawec: “Ŋicte ɋâric, siec wiac ʒi i Israe kikefuŋte sâc ekac. Manakic, jaŋe ʒiŋuc mueŋgopieŋ: ‘Siec wiac‐nâŋec i kereŋ seŋseŋke‐fârewec â woworic‐nâŋec i fârimâc efârewec, nâŋe ʒeŋgoma omae‐fârembeŋ.’
12 Go irec hâcne findaŋdâŋ muhuc kecʒiŋuc jazazemec: Wofuŋ Anutuzi kecʒiŋuc mukac: O ŋicfâc‐nane, manaŋgopieŋ, no bâɋârec‐ŋopape ʒâŋeruŋkonec wefupie Israe mâreŋ‐ŋeŋicko râec‐ŋopapemu.
13 O ŋicfâc‐nane, no bâɋârec‐ŋopape ʒâŋeruŋkonec wefurâ no hâcne Wofuŋ jukopac i mana taraniŋmu.
14 Eme no Mâro‐nane maŋŋeŋicko râepe hume juju fua‐ŋareme ŋaŋacne hae mâreŋko râec‐ŋopapemu. Iŋuc fuame, Wofuŋ no hâcne irec findaŋdâŋ mupozi fârine bâfuakopac i mana taraniŋmu. Wofuŋ nore dâŋ iŋuc.”
Juda â Israe ŋic jaŋe qâfâsâerâ juniŋmu
15 Wofuŋte dâŋ ʒuhuckerâ norao ʒiŋuc fuawec:
16 “Ŋicte ɋâric, go huti moc rorâ fainao ʒiŋuc qâreŋkec: Juda â Israe ŋic mamaŋ eeŋgopieŋ jaŋere biŋe. Iŋuc erâ huti moc rorâ fainao ʒiŋuc qâreŋkec: Josefe (Eferaim ŋic jaŋere huti hâcne) â Israe ŋic mamaŋ eeŋgopieŋ jaŋere biŋe.
17 Erâ go ʒuhucke itic etecne huti jajaheczi mocjaha erâ megao fozejec.
18 Ehame ŋicfâcge jaŋe ʒiŋuc wio‐gareniŋmu: ‘Go wiac keci irec fuŋne sâcne mi nâzâcmu me?’
19 Iŋuc wio‐garepie ʒiŋuc jazazemec: Wofuŋ Anutuzi kecʒiŋuc mukac: Manaŋgopieŋ, no Josefe â Israe ŋic mamaŋ eeŋgopieŋ jaŋere huti (Eferaim ŋic jaŋere meo fokac i) â Judare huti jahe ʒuhuc‐jofape jajaheczi menaneo huti mocjaha ezepirec.
20 Eme huti qâreŋkecmu i hâcne ʒâŋe fai‐jeŋicko megao fozejec.
21 Ehame ŋic ʒiŋuc jazazemec: Wofuŋ Anutuzi kecʒiŋuc mukac: Manaŋgopieŋ, no Israe ŋicguru ŋicne ŋicne jaŋere ŋondeŋko jueŋgopieŋ irecnec qânusuc‐joparâ jaŋe jaŋacne mâreŋko bârisiec‐jopapemu.
22 No Israe tiki mâreŋko qânusuc‐jopape ŋicguru mocjaha erâ junʒepieŋ; ehame ŋicwofuŋ mocjahazi soŋaŋ‐jopazejec. Jaŋe guru jajahec erâ mocwâc mi junʒepieŋ, erâ ŋicwofuŋ jajaheczi mocwâc mi jujarezepirec.
23 Jaŋe ɋâŋ qâqâtâc bajuhuc me wiac mamakâcne â qaqatara i ebac ehuc maŋ sahac‐jeŋic mocwâc mi hegâpârenʒepieŋ; ehame no hata qâsoriembiŋkonec rocjoparâ ʒure ɋaɋac‐jopapemu. Eme jaŋe ŋicfâc‐nane erâ juhapie no Anutu‐jeŋic jupemu.
24 “Kiŋaŋŋic‐nane Dawidi eki ŋicwofuŋ jujarehuc soŋaŋ‐jeŋic mocsâkoa erâ juzejec, ehame jaŋe dâŋsanaŋ‐nane bâjâpehuc mumutâc dâŋnane mana rereŋ enʒepieŋ.
25 No kiŋaŋŋic‐nane Jakobo mâreŋ râcnepe mamacfâc‐ŋeŋic ŋec juc embiŋ mâreŋ ira hâcne junʒepieŋ. Jaŋe jaŋacne â ɋâricfâc‐jeŋic jaŋe mâreŋ ira mimiŋzi ɋâric juraʒihuc junʒepieŋ, ehame kiŋaŋŋic‐nane Dawidi eki fekicne‐jeŋic erâ juhuc juzejec.
26 Eme no jaŋehec wamao jujure ʒâʒâfic fofo sanaŋ moc epemu, ehuc jambuŋ‐jopape sawe mâririackehapie ŋondeŋ‐jeŋicko tiri ufuŋ‐nane râepe ŋesanaŋkezejec.
27 Ehame no ŋondeŋ‐jeŋicko ŋeŋe juju epemu, ehuc Anutu‐jeŋic juhape jaŋe ŋicfâc‐nane erâ junʒepieŋ.
28 Eme tiri ufuŋ‐nane ŋondeŋ‐jeŋicko ŋesanaŋkeha ŋicne ŋicne jaŋe, Wofuŋ noni hâcne Israe ŋic jaŋe nore biŋe erâ juniŋte bâtiric‐jopakopac i mana taranʒepieŋ.”