38
Ŋic fekicne Gogo ere findaŋdâŋ
1 Wofuŋte dâŋ ʒuhuckerâ norao kecʒiŋuc fuawec:
2 “Ŋicte ɋâric, go Magogo mâreŋkonec ŋic moc ʒâŋene Gogo, Meseke â Tubali hae mâreŋ jahere micne sâko, e hâcne maickehuc findaŋdâŋ‐ticne muzemec.
3 Ehuc ʒiŋuc muzemec: Wofuŋ Anutuzi kecʒiŋuc mukac: O Gogo, Meseke â Tubali jahere micne sâko, manakic, no râsi egarekopac.
4 No bârisiecgurâ hawiczi mecqaŋeŋgao hehawicguhuc go â momorifâcge erâ becâsic â becâsicko rara ŋicfâcge ŋoŋe eŋarepe ʒikao raniŋmu. Ŋicfâcge jaŋe ʒikare wiac‐jeŋichec erâ ŋic guru sâko jaŋe maro‐jeŋic kâcɋene â piticne erâ ʒika‐jeŋichec sasawa.
5 Ehame jaŋere ŋondeŋko Perisia, Etiopia â Libia mâreŋkonec ŋic jaŋe maro â aeŋdu‐jeŋichec juŋgopieŋ wâc.
6 Erâ Gomera â momorifâc‐ticne erâ faic mâreŋkonec Bete‐Togarama â momorifâc‐ticne jaŋe bocjahazi gohec jufâreŋgopieŋ hâcne.
7 “Go â momorifâcge gohec juŋgopieŋ ŋoŋe ʒaʒawie gie bahuc woŋec junʒepieŋ, ehuc goki micne bajarezemec.
8 Ehame ʒoaŋ gie bapa bocjaha tarame giedâŋ mugarezo. Eme juku dameŋ moc maickeme wama fokac mâreŋ i râsi ecnehuc racmu. Mâreŋ irec ŋic jaŋe hâcne ŋicne ŋicne jaŋere meonec batarac‐joparâ Israe tiki mâreŋ mârâc ima bakicne fowec ira qâzuc‐jopakicne. Ŋicfâc‐ticne sasawa ŋicne ŋicne jaŋeraonec amec‐jopa fisikicne jaŋe wamao juhâc qâhâmoŋgopieŋ.
9 Ehame go fahare mâŋâŋ ɋicwânʒâŋnehec fisikac iŋucne fisirâ hâweŋzi hae mâreŋ sâockeekac irec sâc mâreŋ i sâockecmu. Go â momorifâcge erâ ŋic guru sâko gohec juŋgopieŋ ŋoŋe iŋuc hâcne eniŋmu.”
10 Wofuŋ Anutuzi Gogo dâŋ ʒiŋuc muhuc âzâcnekac: “Go dameŋ ira wiac hehesicne ecmurâ mamanasu gie bahuc dâŋ ʒiŋuc mucmu:
11 ‘No hae mâreŋ sac tâmiric rambaŋ forakac i râsi ecnezo rapemu, ehuc ŋic hae sac â motâc tâmiric wama faio juhâc qâhâmoŋgopieŋ jaŋe qâtâtiec‐jopapemu.’
12 Go iŋuc ehuc mafa wiac‐jeŋic ro serereŋ erâ bawisecmu, go fic hae‐jeŋic mecne â ŋic ŋokac ŋicne ŋicne jaŋere ŋondeŋkonec qâzuc‐jopakicnezi lama bulimakaofâc‐jeŋic jaŋehec mâreŋ ʒâʒâŋiŋnao jueŋgopieŋ jaŋe mâmâc sipiric‐jopacmurâ iŋuc ecmu.
13 Ehame Seba â Dedaŋ erâ Tarasisi haeonec âbârâ gie bapa ŋic â haefâc‐ticne sasawa jaŋe ʒiŋuc mu wioc egareniŋmu: ‘Go mafa wiac‐nâŋec nâwoc rozo murâ waremeŋ me? Go wiac fiuckerâ bawisecmurâ momorifâcge hetumaŋ‐jopameŋ me? Go siliwa â gol erâ bulimakao â wâcwiac gâcne amecke wisecmurâ ware fisimeŋ me?’
14 “Irec ŋicte ɋâric, go findaŋdâŋ muhuc Gogo ʒiŋuc âzâcnezemec: Wofuŋ Anutuzi dâŋ kecʒiŋuc mukac: Israe ŋicfâc‐nane juhâc qâhâmoniŋmu dameŋ ira hâcne faharecmu.
15 Ehuc faic mâreŋko haege ŋerakac irecnec ŋic guru sâko jaŋehec ware fisicmu. Jaŋe becâsicko rara ŋic sasawa, erâ ŋic guru dindiŋ â momori ŋic guru sâko jaha.
16 Hâweŋzi mâreŋ sâockeekac irec sâc Israe ŋicfâc‐nane râsi ejarehuc fisiniŋmu. Eme no dameŋ ira hâcne egarepe mâreŋ‐nane râsi ecnecmu. Ehame no tiri juju‐nanere fuŋne Gogo gorao bataniŋkepe ŋicne ŋicne jaŋe i honerâ mana taracnunʒepieŋ.
Gogo okacne fisicneocmu
17 “Gogo, Wofuŋ Anutu no dâŋ kecʒiŋuc gazape manac: No mârâc jaha kiŋaŋŋicfâc‐nane, porofete hâcne, jaŋe ejarepe findaŋdâŋ mujumbieŋzi gore findaŋdâŋ wâc mumbiŋ. No egarepe Israe ŋic râsi fisi‐jarecmurâ mumbiŋ hâcne.
18 Mâc Gogo goki Israe mâreŋ râsi ecnehuc fisicmu dameŋ ira kimbeŋ aaric‐nane fahareocmu. Wofuŋ Anutu noni iŋuc mukopac.
19 Eme maŋnane bâruŋkeme aaric sâko manahuc dâŋ ʒiŋuc mupaŋkepemu: Gogo fisiocmu dameŋ ira Israe mâreŋko homeŋ sâko bazejec.
20 Ehame opâ qowi â sawa wipe, kâte qowi â wiac sasawa mâreŋko babarâ jueŋgopieŋ, erâ mâreŋko ŋic juraŋgopieŋ sasawa jaŋe mai‐naneo ɋarac ɋarac qafârenʒepieŋ. Ehame tiki wiac jaŋe herickehuc wahanʒepieŋ, erâ mâreŋ hârâc‐ticnehec â qânâsac jaŋe ŋenʒaŋnerâ waha qafârenʒepieŋ.
21 No wiac repicne fuŋne fuŋne mupe fuarâ Gogo râsi ecnezejec, ehame ŋicfâc‐ticne jaŋe jaŋaczia qaqac enʒepieŋ; Wofuŋ Anutu nore dâŋ iŋuc.
22 No dâŋticne mutarahuc mupe huc mimicne â ʒika fuacnezejec. Ehuc e jahacnao â momorifâc‐ticne erâ ŋic ehec jueŋgopieŋ sasawa jaŋerao hoe micsâko â hoe sanaŋ, ʒoc â kâmbâc mupe waha hezejec.
23 No iŋuc ehuc tâpiri â tiri juju‐nanere fuŋne ŋicne ŋicne jaŋere maio bataniŋkepe honerâ no hâcne Wofuŋ jukopac i mana taranʒepieŋ.