45
Mâreŋ bâtâc bapare dâŋ
1 Eme Wofuŋzi kecʒinuc nazawec: “Go mâreŋ rauckeniŋte bâtâc bajarehuc mâreŋ dâkâne moc bâtirihuc Wofuŋ nore biŋe qatec fozejec. Ʒoricne‐ticnere sâc i kubi 25 tauseŋ â bembeŋne‐ticnere sâc i kubi 20 tauseŋ ezejec. Eme mâreŋ i sasawa furu mutec fozejec.
2 Mâreŋ ŋondeŋ ira hâcne dâkâne moc taha ufuŋte biŋe bâwosâenʒepieŋ. Hâŋne â otecne irec sâc i kubi 500 jaha, erâ rârec rârec hae ʒoŋa‐ticne i kubi 50 ezejec.
3 Mâreŋ sâko i hâcne mocwâc bâfâucketec dâkâne jajahec fuazepirec. Ehame dâkâne ŋifecte ʒoricnere sâc i kubi 25 tauseŋ eha bembeŋnere sâc i kubi 10 tauseŋ ezejec; eme mâreŋ dâkâne ira hâcne taha ufuŋ tiri pectâcfic hâcne bapie ŋezejec.
4 Mâreŋ dâkâne izi hâcne tirine ehuc, taha bapa Wofuŋ maickehuc kiŋaŋ qacneniŋte ufuŋko taha gie baeŋgopieŋ jaŋere biŋe ezejec. Jaŋere fic hae i mâreŋ ira hâcne bapie ŋerazejec. Mâreŋ dâkâne i taha ufuŋte mâreŋ irec dâkâne hâcne.
5 Eme dâkâne ŋifec ʒoricne ticnere sâc i kubi 25 tauseŋ â bembeŋne‐ticnere sâc i kubi 10 tauseŋ ezejec. Erâ mâreŋ i Lewire ɋâricfâc taha ufuŋko kiŋaŋ gie baeŋgopieŋ jaŋere biŋe eha fic hae wiac‐jeŋic ira bapie ŋerazejec.
6 “Mâreŋ furu mukicne irec heririŋko mâreŋ dâkâne moc haere biŋe bâwosâenʒepieŋ. Ehuc bembeŋne‐ticnere sâc i kubi 5 tauseŋ â ʒoricne‐ticnere sâc i kubi 25 tauseŋ, ma iŋuc banʒepieŋ. Eme mâreŋ dâkâne izi hâcne Israe kikefuŋ jaŋere biŋe ezejec.
7 “Mâreŋ furu mukicne â haere biŋe bâwosâekicne irec heririŋko ŋifec â ŋifec ʒoaŋ wewefunaopec â huhunaopec hâcne ira mâreŋ dâkâne moc bâwosâepie ŋic fekicnere biŋe ezejec. Ʒoricne‐ticne ine Israe ŋicguru ru sâc mâreŋ rombiŋ irec sâc jaha fuarâ ʒoaŋ wewefunaopec mâreŋ mao fisizejec â ʒoaŋ huhunaopec mâreŋ maoa fisizejec.
8 Mâreŋ dâkâne izi hâcne Israe maŋnao ŋic fekicne ere biŋe ezejec. Ehame fekicnefâc‐nane jaŋe ŋicfâc‐nane mocwâc mi bâuruŋ‐jopanʒepieŋ, aricne, jaŋe Israe kikefuŋ mana‐jarepie guru‐jeŋic sâc mâreŋ ro rauc enʒepieŋ.”
9 Wofuŋ Anutuzi dâŋ kecʒiŋuc mukac: “O Israe ŋic fekicne, ŋoŋe ŋic bâbâʒâic‐jopa â fific guguriŋ eejare i beherâ sâcmutâc dâŋ â tiŋne jujure sâcko wiac ehâmo‐jarenʒepieŋ. Ehuc ŋicfâc‐nane jaŋere mâreŋ mocwâc mi jowac ronʒepieŋ, Wofuŋ Anutu nore dâŋ iŋuc.
10 “Ŋemâc bâbâfua‐ŋeŋicte sâc i sâckoa efârezejec. Oto â ʒopo jahe piticne â kâcɋene mi ezepirec.
11 Oto â ʒopo jahe sâc mocjaha ezepirec. Toŋtoŋ sâko izi ine ma sanaŋ ehame oto me ʒopoonec wiac arec 10 hoŋkepie huku fusucmazejec.
12 20 gerazi seke 1 ezejec, erâ 5 sekezi 5 seke jaha, â seke 10‐zi seke 10 jaha ezejec, ehame 50 sekezi mina mocjaha ezejec.
Taha bapa giere sâcmutâc
13 “Taha wiac kecʒiŋuc râehuc junʒepieŋ: Padi toŋtoŋ sâko irecnec otore nâfocne â jacgoŋ toŋtoŋ sâko irecnec ʒopore nâfocne râenʒepieŋ.
14 Erâ wokemaŋ opâ i koro sâko irecnec ʒopore nâfocne jaha râenʒepieŋ. (Koro i toŋtoŋte sâc jaha, ʒopoonec wiac arec 10 hoŋkepie huekac.)
15 Ehuc lama 200 guru sâc irecnec wâŋ wâŋ râec‐jopanʒepieŋ. Israe ŋic garikiŋ sâc jaŋe wiac iŋuc râehuc junʒepieŋ. Bibiaŋ bâfuaniŋte taha bâzi, qowi bâzi â wama bâzire wiac iŋuc hâcne râenʒepieŋ, Wofuŋ Anutu nore dâŋ iŋuc.
16 Mâreŋ ʒirec ŋic sasawa jaŋe taha wiac iŋuc hâcne Israe ŋic fekicne râecnenʒepieŋ.
17 Ehame ŋic fekicne eki ine hombaŋko me mosa wahaocmu sâc me sabata hombaŋko me Israe kikefuŋ jaŋere hombaŋ dameŋ gâcne mukicne ira qowi bâzi â taha bâzi, erâ waiŋzi taha bâzi i hâcne râe‐fârezejec. E Israe kikefuŋ jaŋe biaŋkeniŋte sâqocne tâtâmire taha â taha bâzi â qowi bâzi erâ wama bâzi râe‐fârezejec hâcne.”
18 Wofuŋ Anutuzi dâŋ kecʒiŋuc mukac: “Go mosa namba wâŋte ʒoaŋ gie bapa wâŋ ira bulimakao motecnezi ŋicne biaŋne moc qa hezuc erâ tiri ufuŋko wâwânâŋ bâfuakicne i hetâmirezemec.
19 Taha bapazi sâqocne tâtâmirere soc gâcne rorâ taha ufuŋte wâtuŋ â alata kenʒuŋne 4 erâ hae ʒoŋa piticnere motâc irec wâtuŋ ruacnezejec.
20 Ŋoŋe mosa irec ʒoaŋ gie bapa namba 7 ira, ŋic mutuc erâ bahac bâfuambiŋ jaŋere erâ sâc ijaha enʒepieŋ, ŋoŋe iŋuc ehuc taha ufuŋ bâpiaŋkeniŋmu hâcne.
21 “Mosa wâŋte ʒoaŋ gie bapa namba 14 ira aakic hombaŋ fuŋkerâ ŋenʒepieŋ. Ehuc nânâ poroŋ goreŋ tâmiric nâhuc juhapie ʒoaŋ gie bapa 7 tarazejec.
22 Ehame ʒoaŋ ira ŋic fekicnezi e jahacne â ŋicfâc‐ticne jaŋere manasuhuc sâqocne tâtâmirere biŋe bulimakao motecnezi ŋicne taha râezejec.
23 Erâ hombaŋ irec ʒoaŋ 7 sâckehuc bulimakao motecnezi ŋicne 7 â lama ŋicne biaŋne 7 jaha i qowi bâzire biŋe râec‐jopazejec, ehuc ʒoaŋne ʒoaŋne noniŋ ŋicne moc sâqocne tâtâmirere taha râezejec.
24 Erâ bulimakao me lama ŋicne jopa hezuc ejareocmu sâc padi oto moc taha bâzire biŋe râezejec. Ehuc oto sâc oliwa wokemaŋ opâ ʒuhucke râe razejec.
25 E mosa namba 7 irec ʒoaŋ gie bapa 15 ira fuŋkerâ sâqocne tâtâmire taha â qowi bâzi ririke â taha bâzi ririke irec biŋe wâc ijaha, erâ wokemaŋ mâmâc râe bâmoc ehuc juha ʒoaŋ gie bapa 7 tarazejec.”