46
Sâcmutâc gâcne gâcne
1 Wofuŋzi dâŋ kecʒiŋuc mukac: “Hae ʒoŋa piticnere motâc ʒoaŋ wewefunaopec fokac i ʒoaŋ gie bapa 6 motâc hehe fozejec, sabata â mosa hombaŋko ira ine motâc aaŋ fozejec.
2 Eme ŋic fekicne e hae ʒoŋa kâcɋenaonec fe fisirâ hae gâŋgâŋne fotâcnerâ motâc wâtuŋko fisirâ domazejec. Erâ taha bapa jaŋe qowi bâzi‐ticne â wama bâzi‐ticne rikehapie e jahacne motâcfuŋko domahuc Anutu numu wâwâsic ecnezejec. Iŋuc erâ wahame motâczi aaŋ jaha foha hae ŋafezejec.
3 Ŋic ŋokac omane jaŋe sabata â mosa hombaŋko motâc fuŋnao ijaha Wofuŋ mai ecnenʒepieŋ.
4 Ŋic fekicne e sabata hombaŋko Wofuŋte biŋe qowi bâzi kecʒiŋuc rikezejec: Lama motecne biaŋne 6 erâ lama ŋicne biaŋne moc.
5 Ehame lama ŋicnere biŋe padi oto moc râehuc lama gâcne jaŋere biŋe focneocmu sâc râezejec. Erâ oto sâc wokemaŋ opâ fifia râqâc moc irec sâc râezejec wâc.
6 Mosa hombaŋko ine bulimakao motecnezi ŋicne biaŋne â lama motecne 6 erâ lama ŋicne moc biaŋne jaha tahare biŋe râezejec.
7 Ehuc bulimakao ŋicnere biŋe padi oto moc â lama ŋicnere biŋe oto moc erâ lama gâcne jaŋere biŋe focneocmu sâc taha bâzi râezejec, erâ oto sâc wokemaŋ opâ mâmâc ʒuhuckezejec.
8 Ŋic fekicne e raʒizo murâ motâcte hae gâŋgâŋko raʒizejec, erâ wâc hata ijaha wahazejec.
9 “Ŋic ŋokac omane jaŋe hombaŋ mukicnao Wofuŋ mai ecneniŋte gâcne jaŋe motâc faic mâreŋkopec fokac ira raʒirâ wahaniŋte motâc juwic mâreŋkopec fokac ira wahanʒepieŋ, â gâcne jaŋe ine motâc mâreŋ juwickopec fokac ira raʒirâ wahaniŋte motâc faic mâreŋkopec ira wahanʒepieŋ. Moczi moc motâc raʒiocmu ijaha mi risie wahazejec, aricne, e mâc fofotâc rarâ huzejec.
10 Jaŋe raʒi raʒihapie ŋic fekicne e mâmâc raʒizejec, me waha wahahapie eki wâc wahazejec.
11 “Hombaŋko me dameŋ bakicnao bulimakao motecnezi ŋicne ere biŋe padi oto moc taha bâzi râenʒepieŋ, â lama ŋicnere biŋe oto moc, erâ lama gâcne jaŋere biŋe fojareocmu sâc râenʒepieŋ. Erâ oto sâc wokemaŋ opâ gâcne mâmâc ʒuhuckenʒepieŋ.
12 Ŋic fekicne e Wofuŋ buafec faio taha bacneocte qowi bâzi me wama bâzi râehame motâc ʒoaŋ wewefunaopec fokac i rocnezo. Ehame e sabata hombaŋko eekac irec sâc jaha ehuc qowi bâzi me wama bâzi‐ticne râezejec. Râe tararâ huha motâc kibâzickezejec.
13 “Ŋic fekicne e furic sâc lama biaŋne moc jara‐ticne wâŋ ekicne Wofuŋte biŋe bâzi rikezejec.
14 Ehuc furic sâc taha padi nâfocne moc taha bâzire biŋe mâmâc râezejec, erâ wokemaŋ gâcne padihec bâsifuckerâ Wofuŋ taha bâzi râecnezejec. Qowi bâzi ririkere mumutâc fofo sanaŋ iŋuc hâcne fokac.
15 Ŋoŋe iŋuc hâcne ehuc furic sâc lama â taha bâzi erâ wokemaŋ qowi bâzi ririkere biŋe râehuc junʒepieŋ.”
16 Wofuŋ Anutuzi dâŋ kecʒiŋuc mukac: “Ŋic fekicne e jahacne biŋe mâreŋ focnekac irec dâkâne moc ŋokâfâcne jareocmuo ine jaŋere biŋe ezejec. Izi hâcne mamac mâreŋ‐jeŋic ekac.
17 Mâreŋ focnekac irec dâkâne moc kiŋaŋ qaqa‐ticne râcneocmuo eki kiŋaŋ qaqa dameŋ focneocmu sâc sâcne bajuocmu; dameŋ i tarame ine mâreŋ i ŋic fekicne erao risieocmu. Motec fuŋfuŋfâc‐ticne jaŋe sasawa mâreŋ tahac‐jopakicne i rauckerâ jusanaŋkeniŋmu.
18 Ŋic fekicne e ŋic jaŋere mâreŋ moc mi jowac rorâ bajuzejec; e jahacne biŋe mâreŋ focnekac irec dâkâne ŋifec ŋokâfâcne jarezejec. Iŋuc eme ŋicfâc‐nane jaŋe mâreŋ tâmiric moc mi junʒepieŋ.”
19 Eme sâc bapa ŋic eki jowacnume motâc fefe moc motâc sâko ŋifecnao fowec i fotâcnerâ taha bapa jaŋere fic maŋne faic mâreŋkopec forawec ira fisipec; eme ira domahuc mi ʒoaŋ huhunaopec fic maŋne moc honezepac i!
20 Ehame ʒiŋuc nazawec: “Fic maŋne kecira hâcne taha bapa jaŋe kiŋ tatarare â sâqocne tâtâmirere bâzi, erâ taha bâzi rikeniŋte mukicne. Bâzire wiac i hae ʒoŋa kâcɋenao bahupie wiac tirinezi ŋic ŋokac jaŋerao wâwânâŋhec ezacte iŋuc hâcne eniŋte mukicne.”
21 Eme irecnec jowacnume hae ʒoŋa kâcɋene tuturuŋne 4 ira fisipec. Eme tuturuŋne 4 i jaŋere maŋnao hae ʒoŋa piticne wâc forambiŋ.
22 Hae ʒoŋa 4 forambiŋ jaŋere sâc ine kecʒiŋuc: Ʒoricne‐jeŋic i kubi 40 â bembeŋne‐jeŋic i kubi 30. Hae ʒoŋa 4 i jaŋe sâc mocjaha sasawa.
23 Erâ hae ʒoŋa 4 i jaŋe qânâsaczi rârec‐jopahuc fowec. Sac fuŋnao ine rârec rârec ʒafe qafârekicne.
24 Eme ŋic eki ʒiŋuc nazawec: “Ʒi ʒegoc bapa toma, eme taha ufuŋko kiŋaŋ gie baniŋmu jaŋe ira hâcne ŋic ŋokac jaŋere qowi bâzi rikehuc junʒepieŋ.”