47
Taha ufuŋko bibiaŋte opâ ʒâŋe fowec
1 Eme sâc bapa ŋic eki mocwâc jowacnume taha ufuŋte motâcko risierâ ra fisipec. Ehame motâc ʒoaŋ wewefunaopec fowec irecnec mi opâ moc wefurâ rame honezepac i! (Taha ufuŋ e ʒoaŋ wewefunaopec maickerâ ŋewec hâcne.) Eme opâ i ufuŋ motâckonec wefurâ juwic mâreŋkopec ufuŋ sâpene bâniniperâ alata ŋifecnao rahuc fowec.
2 Izi ʒuhuckerâ jowacnume faic mâreŋkopec motâc fowec ira wahapo. Wahape enareme sahacnao râreckehuc hae ʒoŋa sâkore motâc ʒoaŋ wewefunaopec fowec ira fisipo; ehame opâzi ficsâpe juwickonec ware fisiwec.
3 Sâc bapa ŋic e menezi mucsâc bajuhuc ʒoaŋ wewefunaopec ma barame kubi 1 tauseŋ ewec, ehuc enareme opâo hupe kike dâtâŋ‐naneo qawec.
4 Izi ʒuhuckerâ mucsâc mocwâc babarâ rame kubi 1 tauseŋ jaha ewec, ehuc enareme opâo hupe dieŋ‐naneo qawec. Izi ʒuhuckerâ mucsâc mocwâc babarâ rame kubi 1 tauseŋ jaha ewec, ehuc enareme opâo hupe gâjoŋ‐naneo qawec.
5 Izi ʒuhuckerâ mucsâc mocwâc babarâ rame kubi 1 tauseŋ jaha eha opâ sâko fuame fofotâcnere sâc mi ewec. Opâ i boc siwiŋnewecte fifia bapare sâc sawa ewec.
6 Ehame eki ʒiŋuc wio‐narewec: “Ŋicte ɋâric, go wiac fuajec i hone‐hâmomec me?”
Iŋuc murâ jowacnume opâ qacnerâ risiepec.
7 Risiehuc opâ ŋifec â ŋifec jâc wiac bocjaha doma rapie honec‐jopapo.
8 Eme eki ʒiŋuc nazawec: “Opâ ʒizi ʒoaŋ wewefunaopec mâreŋ ira raku Jordaŋ wâneŋ fotâcnerâ Hâwec Hâmocnao hu fisime hâweczi nocne eocmu.
9 Eme opâzi raocmu sâc ira wiac jujune sasawa bâgunucjopame juhâmoniŋmu, erâ opâ qowi bocjaha jâmbâŋ fua raniŋmu. Opâ e hâweczi nocne eocte ira hâcne huocmu, ehame raocmu sâc wiac opâmaŋko foŋgopieŋ jaŋe juju fua‐jareocmu.
10 Opâ qowi roro ŋic jaŋe hâwecmecko doma‐fâreniŋmu, ehuc Eŋgedi ira fuŋkerâ wasaŋ‐jeŋic behe rakupie Ene‐Egelaim ira taraocmu. Opâ qowi‐ticne fuŋne fuŋne fuaniŋmu, i hâwec sâkoo fua raeŋgopieŋ irec sâc.
11 Mâc ʒâkâŋ â sohoŋ dodoc heririŋnao fokac i nocne mi ehuc hâtâne jaha foocmu.
12 Opâ heririŋnao ŋifec â ŋifec ira jâc wiac nânâne fuŋne fuŋne fua raniŋmu. Jâc irec rehacne ɋaŋa ururuc mi eocmu â hândâŋne qa mârâŋ mi eocmu, aricne, tiri ufuŋkonec opâzi bâgunuc‐jopame mosa sâc fâri rarauhec eniŋmu. Hândâŋ fâri‐jeŋic izi ŋic nânâ ejareha rehac‐jeŋiczi taŋ ɋiɋicne bacjopaocmu.”
Mâreŋ bâtâc bapa â maticne irec dâŋ
13 Wofuŋ Anutuzi dâŋ kecʒiŋuc mukac: “Mâreŋte ma forakac irec sâcko mâreŋ bâtâc bapie Israe guru 12 jaŋe ro rauc enʒepieŋ. Ehame Josefere kikefuŋ jaŋe mâreŋ dâkâne jajahec jarepie ronʒepieŋ.
14 Ŋoŋe mâreŋ i sâckoa bâtâc banʒepieŋ; eme no mamacfâc‐ŋeŋic jarepemurâ mupaŋkepo mâreŋ izi hâcne ŋoŋere biŋe ezejec.
15 “Mâreŋte ma ine kecʒiŋuc fuarâ fozejec: Faic mâreŋkopec ira hâwec sâkoonec fuŋkerâ raku Heteloŋ hae fotâcnerâ Hamati hae râpeo fisirâ raku Zedada hae rozejec.
16 Eme irecnec ʒuhuckerâ raku Berota â Siberaim (Siberaim i Damasko â Hamati hae jahere mao ŋekac), hae fotâcnerâ Haze‐Hatikoŋ hae ira fisizejec. Hae izi ine Hauraŋ tiki mâreŋte mao ŋekac.
17 Mâreŋte ma i hâwec sâkoonec fuŋkerâ raku Haza‐Enoŋ haeo hâcne tarazejec. Hae i Damaskore ma faic mâreŋkopec fokac â Hamati hae ŋondeŋ‐jekicko ŋekac. Ma izi hâcne faic mâreŋkopec Israe mâreŋ mickekac irec ma ezejec.
18 “Ʒoaŋ wewefunaopec irec mazi ine Haza‐Enoŋkonec fuŋkerâ raku Hauraŋ â Damasko ŋondeŋ‐jekicko fozejec. Erâ irecnec ʒuhuckerâ rahuc Gileade â Israe mâreŋ jahere ŋondeŋko Jordaŋ opâ jâperâ raku Hâwec Hâmocnere qaŋeŋnao Tama hae ŋekacko ira fisizejec. Ma izi hâcne ʒoaŋ wewefunaopec Israe mâreŋ mickekac irec ma ezejec.
19 “Juwic mâreŋkopec irec mazi ine Tama haeonec fuŋkerâ raku Meriba‐Kadesi opâo fisizejec. Erâ irecnec ʒuhuckerâ rahuc Aigita opâ qacne raku hâwec sâkoo tarazejec. Ma izi hâcne juwic mâreŋkopec Israe mâreŋ mickekac irec ma ezejec.
20 “Ʒoaŋ huhunaopec irec mazi ine hâwec sâko irec mecne qacne raku Hamati hae ŋifecnao mickezejec. Ma izi hâcne ʒoaŋ huhunaopec Israe mâreŋ mickekac irec ma ezejec.
21 “Ŋoŋe mâreŋ ʒi Israe ŋic gurune gurune juŋgopieŋ irec sâcko bâtâc banʒepieŋ.
22 Ehuc ɋâsâi qapie ŋaŋacne biŋe mecne, â ŋic furune ŋondeŋ‐ŋeŋicko juhuc naru motechec embiŋ jaŋere biŋe mâmâc âke fuazejec. Jaŋere manapie ŋaŋacne naru motec jâmbâŋ enʒepieŋ; jaŋe ŋoŋehec mâmâc mâreŋ ro rauc erâ junʒepieŋ.
23 Ŋic furune jaŋe Israe guru i me i jaŋere ŋondeŋko juhapie mâreŋ sâcjeŋic qikiŋne‐jarepie ro rauc enʒepieŋ. Wofuŋ Anutu nore dâŋ iŋuc.”