8
Eʒerahec Babe mâreŋkonec risiembiŋ jaŋere ʒâŋe
1 Arataʒeʒe e ŋicwofuŋ juhame garikiŋ sâc irec micne â gaŋne gaŋne fua warembiŋ jaŋeraonec ŋic kecʒiŋuc jaŋe nohec Babe mâreŋkonec risiembiŋ:
2 Pinehasire ɋâricfâc jaŋeraonec Geresom. Itamare ɋâricfâc jaŋeraonec Danie. Dawidire ɋâricfâc jaŋeraonec ine Hatusi,
3 e Sekaniare ɋâric. Eme Parosire ɋâricfâc jaŋeraonec Zekaria, eme ehec ŋic 150 wose qâreŋ ejarembiŋ.
4 Eme Pahati‐Moabire ɋâricfâc jaŋeraonec ine Zerahiare ŋokâ Elie‐Hoenai, eme ere guruo ŋic 200‐zi jumbiŋ.
5 Eme Ʒature ɋâricfâc jaŋeraonec ine Jahaʒielere ŋokâ Sekania, eme ere guruo ŋic 300‐zi jumbiŋ.
6 Eme Adiŋte ɋâricfâc jaŋeraonec ine Jonataŋte ŋokâ Ebede, eme ere guruo ŋic 50‐zi jumbiŋ.
7 Eme Elamte ɋâricfâc jaŋeraonec ine Ataliare ŋokâ Jesaja, eme ere guruo ŋic 70‐zi jumbiŋ.
8 Eme Sefatiore ɋâricfâc jaŋeraonec ine Mikaere ŋokâ Ʒebadia, eme ere guruo ŋic 80‐zi jumbiŋ.
9 Eme Joabere ɋâricfâc jaŋeraonec ine Jehiele ŋokâ‐ticne Obadia, eme ere guruo ŋic 218‐zi jumbiŋ.
10 Eme Banire ɋâricfâc jaŋeraonec ine Josifiare ŋokâ Selomiti, eme ere guruo ŋic 160‐zi jumbiŋ.
11 Eme Bebaire ɋâricfâc jaŋeraonec ine Bebaire ŋokâ Ʒekaria, eme ere guruo ŋic 28‐zi jumbiŋ.
12 Eme Aʒegadere ɋâricfâc jaŋeraonec ine Hakataŋte ŋokâ Johanaŋ, eme ŋic ehec jumbiŋ jaŋere ʒare ine 110.
13 Eme Adonikamte ɋâricfâc jaŋeraonec ʒâhec fisimbiŋ jaŋere ʒâŋe ine Elifele, Jeuele â Semaja, eme jaŋehec ine ŋic 60‐zi jumbiŋ.
14 Eme Bigiwaire ɋâricfâc jaŋeraonec ine Utai â Ʒakuru, eme jahehec ŋic 70‐zi jumbiŋ.
15 No Ahawa mâreŋkopec opâ rakac ira hetumaŋ‐jopape teuŋ âterâ ʒoaŋ gie bapa jahec â moc jumbeŋ. Ehuc no ŋic ŋokac honec‐jopahuc Lewire ɋâricfâc basac‐jopapo.
16 Irec no ŋic micne â mamana saric ŋic kecʒiŋuc jaŋe râec‐jopape rambiŋ: Elieʒe, Ariele, Semaja, Elenataŋ, Jaribi, Elenataŋ, Nataŋ, Ʒekaria â Mesulam erâ qaqazu Jojaribi â Elenataŋ jahe wâc mâmâc.
17 Ŋic i jaŋe hâcne Kasifia haere micne bapa ʒâŋene Ido erao sorec‐jopapo. Ehuc Ido â qomâfâcne taha ufuŋte kiŋaŋ qaqa Kasifia haeo jumbiŋ jaŋe dâŋ kecʒiŋuc jazaniŋte mutâcne‐jarepo: “Ŋoŋe Anutu‐nâŋecte ufuŋko gie bapa ŋic sorec‐jopapie warenʒepieŋ.”
18 Eme Anutu‐nâŋeczi bafic‐nâpoha jaŋe mamana saric ŋic moc, ʒâŋene Serebia e â ŋokâfâcne â soctofafâcne ŋic 18 sorec‐jopapie fisi‐nârembiŋ. Serebia e Israere ŋokâ Lewi ere ŋokâ Malire ɋâricfâc jaŋeraonec moc.
19 Erâ wâc Hasabia â Merarire ɋâricfâc jaŋeraonec Jesaja e soctofafâc‐ticne â ŋokâfâc‐jeŋic jaŋehec ŋic 20‐zi fisimbiŋ.
20 Jaŋe Dawidi â micnefâc‐ticne jaŋe Lewiŋic hone bafic ejareniŋte taha ufuŋte kiŋaŋ qaqafâc 220 bâwosâec‐jopambiŋ jaŋerao ʒuhuckerâ fisimbiŋ. Ŋic i jaŋe sasawa ʒâŋe‐jeŋic mukicne.
21 Eme nâŋe nâŋâcne â naru motecfâc‐nâŋec erâ wiac sasawa‐nâŋec nâŋe hata biaŋne fua‐nâreme ʒuhuckerâ ranaŋte Ahawa opâo Anutu‐nâŋecte maio rumehuc nânâ sowa junaŋte jazapo.
22 Eme ŋicwofuŋ e momori guru â becâsicko rara ŋic nâreme jaŋe rahapene hatao kisâfâc‐nâŋec jaŋere ŋezic‐nâponiŋte numucnezore mimiepo. No ʒiŋuc âzâcnepo irec: “Anutu‐nâŋec e wira basac ecneeŋgopieŋ jaŋe mesanaŋ‐ticnezi basanaŋ‐jopaekac, â e râpeckeeŋgopieŋ ine behec‐jopame kimbeŋ‐ticnere ʒocbâruŋzi ʒâseŋ‐jopaekac.”
23 Irec nâŋe nânâ sowa juhuc Anutu‐nâŋec hata biaŋnere numucnepene mana‐nârewec.
24 Eme no taha bapa micne 12 ʒiŋuc bâwosâec‐jopapo: Serebia, Hasabia â soctofafâc‐jekic 10.
25 Eme no ŋicwofuŋ â micne â fekicnefâc‐ticne erâ Israe ŋic mâmâc jumbiŋ jaŋe Anutu‐nâŋecte ufuŋ irec taha wiac siliwa â gol â kuʒi râqâc râembiŋ i ŋemâc bâbâfuare sâcko râepo.
26 Siliwa ŋemâc‐ticne 650 â kuʒi râqâc wiac siliwazi bakicne i moneŋ ŋemâc‐ticne 100 irec sâc, â gol ŋemâc‐ticne 100, wiac i sâcko râerâ mejeŋicko râepo.
27 Erâ oto 20 golzi bakicne i moneŋ 1 tauseŋzi furi bapanere sâc â kuʒi jajahec aeŋ bâbâroŋ ɋaɋacne â furi sâko gol iŋucne bakicne i wâc iŋuc jaha jarepo.
28 Ehuc kecʒiŋuc jazapo: “Ŋoŋe Wofuŋte biŋe qacŋopahuc mufiriec‐ŋopakicne â kuʒi râqâc wiac i bâtirikicne jaha, erâ siliwa â gol i apa ŋosafâc‐ŋeŋic jaŋere Wofuŋ Anutu e buafecko taha bacnekicne.
29 Irec ŋoŋe aimuŋ soŋaŋkehuc baraku Jerusalem haeo Wofuŋte ufuŋ maŋnao taha tapa fekicne â Lewiŋic erâ Israe guru garikiŋ sâc irec micnefâc jaŋere maio guruckenʒepieŋ.”
30 Iŋuc jazape taha bapa â Lewiŋic jaŋe siliwa â gol erâ kuʒi râqâc wiac i barâ juku Jerusalem haeo Anutu‐nâŋecte ufuŋko bafisirâ râeniŋte rauckembiŋ.
31 Eme Jerusalem haeo ranaŋte fufuŋke mosare gie bapa 12 ira Ahawa opâonec faharembeŋ. Eme Anutu‐nâŋeczi bafic‐nâpohuc hatao kisâfâc‐nâŋec jaŋere meonec â somâmaŋkonec batarac‐nâpowec.
32 Eme Jerusalem haeo fisirâ ʒoaŋ gie bapa jahec â moc jumbeŋ.
33 Izi hae fureme ʒoaŋ gie bapa jahec â jahec ira Anutu‐nâŋecte ufuŋko siliwa, gol â kuʒi râqâc wiac i Uriare ŋokâ taha bapa Meremotire meo râembeŋ. Eme Pinehasire ŋokâ Eleaʒazi ehec juwec. Ehame Lewi guruonec ŋic ʒiŋuczi jahehec mâmâc jumbiŋ: Jesuare ŋokâ Joʒabada â Binuire ŋokâ Noadia.
34 Eme wiac sasawa wose‐fârerâ ŋemâc bâbâfuare sâcko ŋemâc‐ticne papiao qâreŋkembiŋ.
35 Eme dameŋ ira kâpâcwâru bacjopa rakicnaonec risiembiŋ ŋic ŋokac i jaŋe Israe ŋic sasawa jaŋere biŋe bulimakao ŋicne 12 â lama ŋicne 96 â lama motecne 77 erâ sâqocne tâtâmire taha noniŋ ŋicne 12, iŋuc Israere Wofuŋ Anutu e qowi bâzi rikecnembiŋ. Qowi i sasawa Wofuŋ bâzi rikecnembiŋ hâcne.
36 Ehuc ŋicwofuŋzi papia qâreŋkewec i mâreŋte guriŋ bapa ŋic â Eufrata opâ ocniŋucnao mâreŋ fokac irec soŋaŋ jumbiŋ jaŋe jarembiŋ. Eme jaŋe ŋic ŋokac hone bafic ejarehuc Anuture ufuŋ dopeckembiŋ.