9
Eʒerazi kiŋ bahac‐jeŋicte numuwec
1 Eme wiac sasawa i efârepie tarame micne jaŋe fua‐narerâ ʒiŋuc nazambiŋ: “Israe ŋic ŋokac â taha bapa â Lewiŋic jaŋe mâreŋ rune ŋicne ŋicne kecʒiŋuc jaŋe dic bajarerâ pectâc mi jueŋgopieŋ: Kanaaŋ ŋic, Hitiŋic, Periʒi ŋic, Jebusi ŋic, Amoŋŋic, Moabi ŋic, Aigita ŋic â Amori ŋic.
2 Jaŋe mâreŋ rune jaŋere otâfâc i jaŋe jaŋacne â ŋokâfâc‐jeŋic jaŋere ŋonâŋfâc eniŋte rocjopaeŋgopieŋ. Iŋuc ehuc ŋicguru tirine jaŋe mâreŋ rune ŋicne ŋicne jaŋehec sisifuc efâreeŋgopieŋ. Ehame soŋaŋ micne â ŋic kâcɋene jaŋe bâbâsifuc irec micne baeŋgopieŋ.”
3 Eme no dâŋ i manarâ ŋaqi qoruc‐nane maŋne â sahacne bâsuckerâ qizec susuc â mecʒâwâ‐nane unuckerâ maŋnane gâckeme ŋepo.
4 Ehame kâpâcwâru bacjopa rakicnaonec risiembiŋ jaŋe Wofuŋtao mi siŋkembiŋte Israere Anutu dâŋticnere ɋarac ɋarac qambiŋ jaŋe ʒeŋgoma norao tumaŋne‐fârembiŋ. Eme no maŋnane gâckeme mâc ŋehuc juhape ŋafere taha bâzi ririke dameŋ maickewec.
5 Eme ŋafere taha bâzi ririke dameŋko nânâ sowa ŋehuc jupoonec faharerâ ŋaqi qoruc‐nane maŋne â sahacne suckekicne jaha rojuhuc dieŋzi herâ menane Wofuŋ Anutu‐nanerao sicnepo.
6 Ehuc kecʒiŋuc mupo:
“O Anutu‐nane, no gorao ʒâŋe mai‐nane bâfeŋnepemurâ boc mimierâ weaŋkekopac. Kiŋ bahac‐nâŋeczi siric‐nâporâ fekac â kiŋnâŋeczi hefâku sambâŋko fisikac hâcne.
7 Apa ŋosafâc‐nâŋec jaŋere dameŋkonec juwarekupene dameŋ ʒi fisikac, dameŋ irec maŋnao kiŋsâkohec jumbeŋzi juŋgopeneŋ jaha. Erâ kiŋ bahac‐nâŋecte erâ nâŋe nâŋâcne â ŋicwofuŋ â taha bapafâc‐nâŋec nâŋe mâreŋne mâreŋne ŋicwofuŋfâc‐jeŋic jaŋere meo ʒikare micko â kâpâcwâruo â mimi qaqa faio fefârembeŋ i dameŋ ʒiŋuczia fokac irec sâc.
8 Ʒi ine Wofuŋ Anutu‐nâŋec go dameŋ bembeŋne mac sawa ŋic ʒanʒaŋne ʒi nâŋe junaŋte mana‐nâremeŋ, ehuc go gahac tiri hae mâreŋ ʒira sac sapa enâremeŋ. Go iŋuc ehuc ʒâŋe‐nâŋec batamaerâ niŋgiŋko juju‐nâŋec i piticne mac baafecke‐nâremeŋ.
9 Nâŋe niŋgiŋko hâcne juŋgopeneŋ. Erâ Anutu‐nâŋec go niŋgiŋko juhapene sifu mi râpec‐nâpomeŋ. Anutu‐nâŋec, go ufuŋge âkendâŋnenaŋte Perisia ŋicwofuŋ jaŋere maio bâbâfirie gie bahuc aki anonoc enâremeŋ. I jaŋe âgo enârehapie sesuctacne i mocwâc heɋârerâ bapene Judea maŋnao â Jerusalem haeo ŋezic‐nâpocmurâ iŋuc hâcne enâremeŋ.
10 “O Anutu‐nâŋec, nâŋe wiac fuawec irec faicnao wemo dâŋ moc ʒuhuckerâ mupene sâckeocmu? Nâŋe sâcmutâc dâŋge râpeckembeŋ hâcne.
11 Go sâcmutâc dâŋ i kiŋaŋŋicfâcge porofete jaŋere micko râehuc kecʒiŋuc mutâcne‐nâremeŋ: ‘Ŋoŋe mâreŋ ro rauc eniŋte raʒiŋgopieŋ i mâreŋ rune ŋicne ŋicne jaŋe bâbiekupie wâwânâŋhec ewec, mâreŋ qaŋeŋne ŋifeckonec raku ŋifecko qatarakac i eebapa‐jeŋic mamakâcnezi fusucmarâ fome wâwânâŋhec efârewec hâcne.
12 Irec ŋoŋe ŋokâfâc‐jeŋic jaŋere biŋe otâfâc‐ŋeŋic mi jarenʒepieŋ, me ŋokâfâc‐ŋeŋic jaŋere biŋe otâfâc‐jeŋic mi rocjopanʒepieŋ. Erâ ŋoŋe jaŋere wama me juju hâmo irec mi fotarienʒepieŋ. Ŋoŋe iŋuc erâ ŋic sanaŋne juhuc mâreŋ ʒirec wiac biaŋne i nâ bac ehuc juku ɋâricfâc‐ŋeŋic jarepie jaŋere biŋe fohuc juzejec sanaŋ.’
13 Eme eebapa sâqocne â kiŋnâŋec ŋemâcne irec okacne fai‐nâŋecko fewec i sasawa hone‐fârerâ ʒiŋuc manaŋgopeneŋ: Anutu‐nâŋec, go sâqocne‐nâŋecte okacnere sâc i bawahahuc enâremeŋ, ehuc ʒanʒaŋne mac ʒi mana‐nâretec juŋgopeneŋ.
14 Irec nâŋe sâcmutâc dâŋge mocwâc huckerâ ŋicne ŋicne wiac mamakâcne ebac eeŋgopieŋ jaŋehec ŋokac nareŋ gareŋ epene sâckeocmu me? Iŋuc enaŋmuo ine go nâŋere aaricgume omatac bacnâpotec huŋgaŋne mac moczi moc wiserâ mi juocmu.
15 O Israere Wofuŋ Anutu, go tiŋne rune, nâŋe ʒanʒaŋnezi hâcne wisembeŋ juŋgopeneŋ ʒi. Manakic, nâŋe kiŋheczi maigao juŋgopeneŋ, irec nâŋeraonec moczi moc gore maio sâcne mi domaocmu.”