22
Anutuzi Abraham esâickewec
1 Wiac i tara‐fâreha Anutuzi Abraham esâickehuc muwec: “Abraham!” Eki muwec: “No ʒi.”
2 Eme muwec: “Go ŋokâge mocjaha Isaka, maŋzi jauŋkeekic, e hâcne Moria mâreŋko jowa rarâ tiki moc gowatupemu ira bâzi rike‐narezemec.”
3 Eme Abraham e furicte jâmbâŋ doŋgi‐ticne sate hecnerâ kiŋaŋ motec jahec‐ticne â ŋokâ‐ticne Isaka rocjopawec. Erâ bâzi ririkere ʒoc hesuckerâ jareme fahare Anutuzi hae mâreŋ mutâcnecnewec irapec rambiŋ.
4 Rakupie ʒoaŋ jahec â moc eha Abrahamzi qâhâŋnerâ fime rame mâreŋ hâcne taicko honewec.
5 Erâ kiŋaŋ motec jahec‐ticne jasawec: “Ŋohe doŋgi ʒira barâ ŋenic, ehame ŋokâhec kecocna rarâ taha nunumu wiac erâ ŋoherao risie warenac.”
6 Eme Abraham e bâzi ririkere ʒoc rorâ ŋokâ‐ticne Isaka fainao râewec. E jahac ine ʒoc ʒakicne â sâqe bawec. Eme mâmâc jojowac rapic.
7 Eme Isakazi mamac‐ticne Abraham âzâcnewec: “Mamac!” Eme muwec: “Ŋokâ‐nane, no ʒi.” Eki muwec: “Ʒoc ʒakicne â ɋâricne i bajukoperec, â bâzi rikenacmu irec lama ine weni?”
8 Abraham muwec: “Ŋokâ‐mae, Anutu e jahac bâzire lama moc bâfuaocmu.” Eme mâmâc jojowac rapic.
9 Raku Anutuzi mâreŋ mutâcnewecko fisirâ Abrahamzi ira alata moc bawec, erâ ʒocfiki barâ ŋokâ‐ticne Isaka bândeŋnerâ alatao ʒocfiki faio râewec.
10 Erâ mene sicnerâ ŋokâ‐ticne qaocte sâqe rowec.
11 Ehame ine Wofuŋte aŋelozi sambâŋkonec wiracnehuc muwec: “Abraham, Abraham!” Eme muwec: “No ʒi.”
12 Eki muwec: “Go motec keci mi bâuac, â wiac moc mi ecnec, go miŋecgac ŋokâge mocjaha e no mi sakare‐naretec mana jaŋgeŋgukopac, go Anutu araŋ bacnekomec.”
13 Eme Abraham fotikie firâ honewec, râpenao lama ŋicne moc ʒuŋenezi jâc uupicko heme hume domawec. Irec Abraham e rarâ lama ŋicne rorâ ŋokâ‐ticnere okacne taha bâzi rikewec.
14 Eme Abraham e mâreŋ irec ʒâŋe ʒiŋuc muwec: “Wofuŋzi bâfuakac”, irec dameŋ ʒiŋuczia wâc mueŋgopieŋ, “Wofuŋzi tikionec bâfuawec.”
15 Eme Wofuŋte aŋelo e sambâŋkonec harierâ Abraham wiracnehuc muwec:
16 “Wofuŋzi mukac, no nahacne ʒâŋeo mupaŋkekopac, go wiac kecʒi emec, ehuc gahacne ŋokâ mocjaha mi sakare‐naremec,
17 irec noni fehuc jambuŋgupemu, erâ ɋâricfâcge basawec‐jopakupe sambâŋko bâpiŋ ŋeraŋgopieŋ â hâwecmecko moŋgeŋ forakac irec sâc enʒepieŋ. Erâ ɋâricfâcge jaŋe râsifâc‐jeŋic jaŋere fic hae rauckenʒepieŋ.
18 Â ɋâricfâcge jaŋeraonec jambuŋzi mâreŋ sâc ŋicne ŋicne jaŋerao fotâcnezejec, ine goki dâŋnane reŋkemec irec furine iŋuc fuazejec.”
19 Eme Abraham e kiŋaŋ motec jahecne jaherao risieme jaŋe faharerâ Bere‐Seba haeo rambiŋ, eme ira ŋec juc ewec.
20 Wiac i tara‐fâreha Abrahamtao biŋedâŋ ʒiŋuc fuawec: Milika â ɋage Naho jahere ŋokâfâc fuambiŋ wâc:
21 Bâbâni ŋokâ Uzi â ɋaticne Buʒi erâ Kemuele, e ine Aramte mamac.
22 Erâ Kesede â Hazo â Pilidasi â Jidilafe erâ Betuele.
23 Betuele ere bifuŋko ine Rebeka fuawec. Ŋokâ 8 i jaŋe Abraham ɋaticne Naho ere ŋonâŋ Milikazi rocjopawec.
24 Eme ŋonâŋoc‐ticne, ʒâŋene Reuma, eki motec rocjopawec ine ʒiŋuc: Teha, Gaham â Tahasi erâ naru moc ʒâŋene Maka.