23
Sarazi hâmome Abrahamzi ʒâŋeruŋ gie moc furine bawec
1 Sara e jufeku jara dameŋ‐ticne 127 bazuwec.
2 Eme Sara e Kanaaŋ mâreŋko, Kiriati‐Araba hae, Heboroŋ hâcne, ira hâmowec.
3 Eme Abraham e Sarare ki mamakuc eocte bozeo raʒiwec. Ki mamakuc eku qâŋɋâŋ foweckonec faharerâ Hitiŋic jaŋe ʒiŋuc jazawec:
4 “No ŋoŋerao jaba â mafa sawa juekopac, irec ŋoŋe mâreŋ mac moc ʒâŋeruŋte biŋe qikiŋne‐narepie qâŋɋâŋ‐nane mai‐naneonec bârârierâ duckezepac.”
5 Hitiŋic jaŋe ine Abraham ʒiŋuc âzâcnembiŋ:
6 “Ŋicbomboŋ, gazapene manac: Go ŋondeŋ‐nâŋecko Anuture ŋic fekicne iŋucne jukomec, irec qâŋɋâŋge nâŋere ʒâŋeruŋ basarickekicne mocko duckec. Nâŋeraonec moczi qâŋɋâŋge duckecmurâ ʒâŋeruŋ‐ticne moc mi sakare‐gareocmu.”
7 Eme Abraham e faharerâ mâreŋ rune, Hitiŋic hâcne, jaŋe dape‐jarehuc
8 ʒiŋuc jazawec: “Ŋoŋe qâŋɋâŋ‐nane mai‐naneonec bârârierâ ʒira duckepere mana‐nareŋgopieŋko mupe mananiŋ: Ŋoŋe Zoharire ŋokâ Eferoŋ,
9 e mâreŋ ʒirec tofanao Makepela hawec fokac irec rune jukacte nore âkehoc ecnepie hawec i nore eocte mana‐narezejec. Eme ŋondeŋ‐ŋeŋicko hawec izi nore ʒâŋeruŋ gie eocte furine muocmu sâc râcnezepac.”
10 Eferoŋ e Hitiŋic jaŋere ŋondeŋko ŋewec. Erâ Hitiŋic sasawa ere haeo tumaŋnerâ ŋembiŋ jaŋere maio Abraham ʒiŋuc âzâcnewec:
11 “Ŋicbomboŋ, iŋuc misac, mupe manac: Gie i mâc qikiŋne‐garekopac erâ gieo hawec fokac i mâmâc tahacgukopac, âgofâc‐nane mâmâc manahapie qikiŋne‐garekopac hâcne, irec qâŋɋâŋge duckec.”
12 Eme Abraham e mâreŋ rune jaŋe dape‐jarehuc Eferoŋ ʒiŋuc âzâcneme mana‐fârembiŋ:
13 “I sâcne, erâ sifu mac moc mana‐narenʒaŋ! No mâreŋte furine garepe rozemec, eme qâŋɋâŋ‐nane ira duckezepac.”
14 Iŋuc mume Eferoŋzi Abraham âzâcnewec:
15 “Ŋicbomboŋ, go mupe manac: Mâreŋ tofane mac moc irec furine siliwa moneŋ 100 ekac, erâ dâŋ wemocte boc munacmu. Go sifu qâŋɋâŋge duckec.”
16 Abraham e ine furinere maname sâckeme Hitiŋic jaŋere maio ŋemâc bâbâfuao râerâ râcnewec. I eebapa‐jeŋicte sâcko iŋuc ehuc siliwa moneŋ 100 râcnewec hâcne.
17 Abrahamzi iŋuc ehame Eferoŋte gie, Mamere ʒoaŋ wewefunaopec Makepela wâneŋko fowec, erâ hawec â jâc wiac doma rawec i mâmâc
18 Hitiŋic haeru â ŋicmanac fisimbiŋ jaŋere maio ere biŋe ewec.
19 Eme Abraham e ŋonâŋ‐ticne Sara Makepela gieo hawec fowec ira hâcne duckewec. Makepela ine Mamere hae, Heboroŋ hâcne, ocniŋucnao Kanaaŋ mâreŋko fowec.
20 Iŋuc eme Hitiŋic jaŋe gie mecne, hawec mecne, i mâmâc Abraham ʒâŋeruŋ giere qikiŋnecnepie ere ewec.