14
Rorocte biŋedâŋ
1 Wofuŋzi Jeremia rorocte dâŋ kecʒiŋuc âzâcnewec:
2 “Juda mâreŋzi makuc bakac
â hae‐ticne ŋerakac ira kio uu eŋgopieŋ;
ŋic ŋokacfâc‐ticne jaŋe mâreŋko ŋehuc ki busâqoc eŋgopieŋ,
â Jerusalem haere ki owa fuakac.
3 Fekicnefâc‐ticne jaŋe kiŋaŋ qaqafâc‐jeŋic opâre sorec‐jopaŋgopieŋ,
eme jaŋe opâ nombâŋko fisirâ opâ moc mi bâbâfua
ʒopo tacne bârisieŋgopieŋ;
jaŋe mimiehuc busâqoc manarâ
rurufa hepie hukac.
4 Hoe mi heme mâreŋzi hahaŋkekacte
hesarac ŋic jaŋe busâqoc manahuc
qizec‐jeŋic foŋkerâ soŋkeŋgopieŋ.
5 Kecɋaŋ mi fokacte kâte bulimakao jaŋe
tomao motecne ro behec ejareŋgopieŋ wâc.
6 Kâte doŋgi jaŋe tiki burocnao domahuc
sawa roniŋte kâte qâto iŋucne nakafe heŋgopieŋ;
kecɋaŋ wiac arictacte ʒâŋe‐jeŋic sururu ekac.
7 “O Wofuŋ, hehesic‐nâŋeczi mutaniŋ‐nâpoha
goki ʒâŋegere erâ bafic‐nâpoc;
nâŋe qaqatara wemo afecne bâfuahuc
bugao bambeŋ hâcne.
8 Israe mamanac‐ticne i gorao fokac,
goki hâcne ʒârâ hâriŋ dameŋko babafic‐ticne jukomec;
go wemocte mâreŋ‐nâŋecko ŋic jabane tinac jukomec,
me ŋic moczi ŋicmanac fisirâ
ŋafe mocjaha sawa foocmu irec sâc ekomec?
9 Go wemocte ŋic moczi bafic‐jopaocte eipiekac
iŋucne tinac?
Wofuŋ, go ŋondeŋ‐nâŋecko jukic,
â nâŋe gore ʒâŋe rombeŋ,
irec go mi mac behec‐nâpoc!”
10 Wofuŋ e ŋicguru ʒi jaŋere kecʒiŋuc mukac:
“Jaŋe afeckerâ ra qohota ware qohota ehuc
manabâc tâmiric kike afec jueŋgopieŋ.
Irec Wofuŋ no hone aŋac mi ejarekopac, aricne,
no hehesic‐jeŋicte manasuhuc sâqocne‐jeŋicte bâtiŋ‐jopapemu.”
Wofuŋzi porofete burecne bâsirowec‐jopaocte mukac
11 Wofuŋzi ʒiŋuc nazawec wâc: “Go ŋicguru keci jaŋe ehâmo‐jarepemurâ mi numuzemec.
12 Jaŋe sowa juhapie wira wâwâsic‐jeŋic sifu mi manapemu; jaŋe qowi hâcbuc rikeniŋmu me taha bâzi rike‐narepie no sifu mi aŋacnuocmu, aricne, no ʒika â roroc â huc hâmoc izi bâsirowec‐jopapemu.”
13 Mume mupo: “Wofuŋ‐nane Anutu, manakic, porofete jaŋe ʒiŋuc jazaeŋgopieŋ: ‘Ŋoŋe ʒika moc mi fuame honeniŋmu, erâ roroczi wâc mi fua‐ŋareocmu, aricne, wama fofo sanaŋ ine ŋarepe hae mâreŋ ʒira foocmu.’ ”
14 Wofuŋzi ine ʒiŋuc nazawec: “Porofete jaŋe nore ʒâŋeo âke hotahuc burecdâŋ mueŋgopieŋ; no jaŋe mi sorec‐jopapo, erâ wâc dâŋ moc mi mutâcne‐jarepo â jaŋehec dâŋ mi dâŋepo. Jaŋe bararuŋ dâŋ burecne â findaŋdâŋ racne erâ maŋjeŋicte eatuc dâŋ ŋazaeŋgopieŋ.
15 Irec Wofuŋ no jaŋere ʒiŋuc mukopac: No mi sorec‐jopahape sifu nore ʒâŋeo âke hotahuc mueŋgopieŋ, ‘Ʒika me roroc hae mâreŋ ʒira mi fuaocmu’; porofete iŋuc mueŋgopieŋ jaŋe ʒika â roroczi omaec‐jopaocmu hâcne.
16 Ehame ŋic findaŋdâŋ manaeŋgopieŋ jaŋe wâc iŋuc jaha ʒika â roroczi jopa mizieme Jerusalem hae ʒoŋao foraniŋmu, eme moczi moc mi ducjopaocmu, jaŋe â ŋokac naru motecfâc‐jeŋic mâmâc. No hehesic‐jeŋicte okacne fai‐jeŋicko râepe feocmu hâcne.
Porofetezi ŋic jaŋere erâ kiokac
17 “Goki ine dâŋ kecʒiŋuc jazazemec:
‘Ʒâŋeuc‐nane ŋafe furec bocjaha wahahuc domazejec,
ŋicfâc‐nane jaŋere otâ ʒeŋoŋ e qa imac ecnekicne,
e mocwâc biaŋkeocte sâc mi ekac hâcne.
18 No gieo rarâ honekopac,
ʒikazi qâhâmoc‐jopakicne sawa foraŋgopieŋ,
me haeo ferâ honekopac,
nânâre hâhâmo irec ʒaic manahuc juŋgopieŋ.
Erâ i sawa mâcne, porofete â taha bapa jaŋe
ŋic ba bititicne iŋucne mâreŋ fotâcnehuc juŋgopieŋ.’ ”
19 Wofuŋ, go Juda behe sanaŋkemeŋ,
me Zioŋte takicgukac me?
Go wemocte ba imac enâretec
bibiaŋte hata‐nâŋec arictac ewec?
Nâŋe wama worickehuc juhapene
wiac biaŋne moc mi fuaekac,
bâbâpiaŋ dameŋte worickehuc juhapene
jei, wiac bipic tataranehec fuaekac i!
20 O Wofuŋ, nâŋe nâŋâcne hehesic
erâ wâc mamacfâc‐nâŋec jaŋere kiŋ bahac
i mâmâc hone taraŋgopeneŋ,
nâŋe sâqocne bahuc bugao bambeŋ hâcne.
21 Irec go sifu ʒâŋegere erâ hone suŋgiŋ mi enârezemec;
eri tatamacgere ŋeŋe biaŋ ba jawa mi ecnezemec;
go nâŋehec ʒâʒâfic emeŋ
irec manasuhuc mi hetâcnezemec.
22 Ŋicne ŋicne nemufâc‐jeŋic jaŋere ŋondeŋko
hoe bapa fârine moc juŋgopieŋ me?
Me sambâŋ e jahac mume hoe moc heekac me?
Wiac Wofuŋ i goki hâcne ekomec i!
Anutu‐nâŋec, nâŋe gore mamanac juŋgopeneŋ,
goki hâcne wiac i bâfua‐fârehuc juekic.