15
Wofuŋ e Juda kikefuŋte aaric manakac
1 Eme Wofuŋ e ʒiŋuc nazawec: “Mose me Samue jahe nore maio fuapire muzac no ŋicguru ʒi sifu busâqoc moc mi mana‐jarezapo. Ʒâŋe mai‐naneonec jâpec‐jopatec ranʒepieŋ!
2 Eme jaŋe ‘Wena ranaŋmu’, iŋuc mu wioc epie jazazemec, ‘Wofuŋzi ʒiŋuc mukac:
“Huc hâmocte biŋe e hâmozejec,
ʒikare biŋe e ʒikare nânâ ezejec,
nânâre hâhâmore biŋe e nânâre hâmozejec,
kâpâcwâruo rarare biŋe e kâpâcwâruo razejec.” ’
3 “Wofuŋ noni jaŋerao sisipiricte wiac 4 fuaocte mupemu ine kecʒiŋuc: Ʒikazi qâqâhâmoc‐jopa, qâtozi kisoŋ‐joparâ rara, erâ sawa wipe â mâreŋ qowi jaŋe nâ sipiric eejare.
4 No iŋuc ejarepe mâreŋko ŋicwofuŋ â gurufâc‐jeŋic sasawa jaŋe honec‐joparâ bipic tatara ejarezejec, i Juda ŋicwofuŋ Manase, Hisikiare ŋokâ hâcne, eki Jerusalemko wiac efârewec irec erâ iŋuc epemu.
5 “O Jerusalem, mozi busâqoc moc mana‐gareocmu?
Mozi gore erâ mu mamakuc eocmu?
Mozi jujugere mu wioc egareocte
gorao fâ fisiocmu?
6 Goki hâcne behecnumeŋ â râpecnumeŋ,
Wofuŋ nore dâŋ iŋuc;
irec no râsi egarehuc sipiricgupemurâ menane sicnepo
no busâqoc mana‐garezore takicnukac.
7 Jaŋe maŋjeŋic mi bârisiembiŋte
hae‐jeŋic ŋerakac ira oofaŋzi ofaŋ‐jopapo,
ehuc naru motecfâc‐jeŋic omaec‐jopahuc
ŋicfâc‐nane sipiric‐jopapo.
8 Hozecfâc‐jeŋic jaŋe hâwecmecko moŋgeŋ fokac
irec ʒare jâurumbiŋ;
ŋicmotec neŋgocfâc‐jeŋic jaŋe sisipiric ŋiczi
ʒoaŋ ɋaɋackoa fua‐jareocte mucnepo,
ehuc mupe ʒârâ hâriŋzi â wiac bipic tataraneheczi
ututuŋ bâfuac‐jopawec.
9 Eme ŋokâ 7 rocjopame jucnembiŋ ŋokac e ɋaŋa ururuc ewec,
ehame maŋticne omaewec;
woze qeuc mi ehame ɋâŋgicne rokicne,
e qurutuame mimizi fainao fewec.
Nâfocnefâc‐jeŋic ine râsifâc‐jeŋic jaŋere ʒika
irec biŋe qikiŋ‐jopapemu,
Wofuŋ nore dâŋ iŋuc.”
10 Jei, neŋgoc‐nane, go wemocte rocnumeŋ? Mâreŋne mâreŋne nore erâ dâŋgie â rârâsi fuaekac i! No moneŋ hotâ moc mi jarepo â jaŋe wâc no hotâ mi narembiŋ, ehame sifu ŋic sasawazi sâwecnueŋgopieŋ.
11 Jâmbomac, Wofuŋ, no wiac biaŋnere kiŋaŋ qagarepo, erâ ʒârâ hâriŋ â fific guguriŋ dameŋko râsi jaŋere erâ wira wâwâsic egarepo.
12 Aeŋ faic mâreŋkonec wareekac â aeŋ bâbâroŋ i ŋic moczi sâcne bazuocmu me?
13 “Hae mâreŋge sâckerâ sâqocne bâfua rameŋ irec okacne mafa mâririge â moneŋ boreŋge i fiuc roro ŋic jaŋe tofamâc qikiŋne‐jarepemu.
14 Erâ mupe mâreŋ kâuc bakomec ira râsifâcge jaŋere kiŋaŋ qahuc juzemec; kimbeŋ‐ŋaŋere ʒocbâruŋ fuarâ ŋondeŋ‐ŋeŋicko ʒahuc fokac hâcne.”
Wofuŋ e Jeremia mu keteŋ ecnekac
15 Eme Jeremiazi muwec:
“Wofuŋ, go kâuc mi bakic;
manasucnuhuc iqicnuzemec,
erâ nu jâpec eeŋgopieŋ jaŋe nore erâ okacne jarezemec.
Omaezipore mi akic‐jopazemec,
gore erâ fai‐naneo mimi feekac i manac me!
16 Dâŋgezi ware bâfuacnume mana maŋ eekopac,
dâŋgezi bubiaŋ bâfua‐nareekac,
â maŋzi mana ʒiziweekopac;
o Anutu Tâpiri Ɋuŋɋasaŋ Wofuŋ,
no gore ʒâŋe ropo i.
17 No dâŋ ʒoraŋ ee jaŋere guruo mi ŋeekopac,
ehuc kiwac qawac mi eekopac;
Megezi roʒakiecnuhuc mamana sâqocgezi bâfusecnumeŋte
buc mac ŋeekopac.
18 Ʒâic‐nanezi wemocte tatarane mi ekac?
Wicnane wemocte somiezo mi ehuc
fofo sanaŋ juekac?
Go jâmbomac opâ ʒiʒicne tinac enarehuc
eatucnuzo maŋkeekic me?”
19 Eme irec Wofuŋzi dâŋ kecʒiŋuc mukac:
“Go risietec no sâcne hefârocgupemu,
eme harierâ nore maio domazemec.
Go jawadâŋ behehuc fârinea mucmuo
ine mana‐garepe nahacne mic erâ juzemec.
Eme jaŋe gorao roweckenʒepieŋ,
go ine jaŋerao mi roweckezemec.
20 Eme noni mupe ŋicguru keci jaŋere maio
aeŋsac sanaŋ iŋucne erâ qiŋ herâ domazemec.
Jaŋe herândiŋguniŋte juju gie baniŋmu
erâ sâcne bawahacguniŋmu;
wiac noni gohec jukopacte
ŋezicgupe sanaŋke‐jarecmu i!
21 No ŋic repicne jaŋere meonec bataracgupemu,
â qac momori jaŋere ŋezicgupemu.
Wofuŋ nore dâŋ iŋuc.”