17
Maŋjeŋicte tafeo sâqocne‐jeŋic heutuckekicne
1 “Juda kikefuŋ gore sâqocne i aeŋ kirifizi qâreŋkekicne; kirifi tetecnere qânâ furi sâko izi maŋgere tafeo â alatagere ʒuŋeo heutuckekicne.
2 Naru motecfâcge jaŋere aŋacguekac sâc ijaha alata wiacge â Asera nemuɋâŋ wiacgere manasuekic. Wiac i jâc ɋâricnere fuŋne â tikitoŋko ŋegare rakac.
3 Irec mâreŋge sasawa ira sâqocne boc bâfuakicnere mafa wiacge â boreŋ ʒeŋaŋge â bâzi ririkere toma forakac i râsi jaŋere biŋe qafârekopac.
4 Eme mâreŋ garepo i behetec fozejec; eme no mupe mâreŋ moc kâuc bakomec ira râsifâcge jaŋere kiŋaŋ qahuc juzemec; ŋoŋe kimbeŋ‐nanere ʒoc ruqembiŋte ʒahuc foocmu sanaŋ.”
5 Wofuŋ e kecʒiŋuc mukac:
“Moc e ŋic jaŋerao roweckeocmu
me sahac biuczi tâpiri‐ticne eocte muocmu
ehuc maŋticnezi Wofuŋ no qikiŋnuocmu
e sâwecte biŋe ezejec.
6 E jâc garaŋ garaŋne mâreŋ sawao domakac iŋucne,
ehuc wiac biaŋne fuaocmu i moc mi honeocmu;
e mâreŋ burocnao â hahaŋkekicnao â guec tâmiricko
erâ ŋiczi ŋec juc mi eeŋgopieŋko juzejec.
7 “Moc e Wofuŋ norao roweckeekac
â Wofuŋ noni huec‐ticne eekopac
ŋic iŋucnere jambuŋkekicne muzo.
8 E jâc moc opâmecko sarakicne iŋucne,
gâtâne opâopec râeme huekac,
e ʒoaŋ fârorocte mi ɋaŋaekac,
â rehacne fie ruruckehuc fua biaŋ eekac;
e roroc dameŋko wâc mana mezac mi ehuc
fârine ʒuʒuhuc jaha bâfua rahuc juekac.”
9 Ŋic maŋsioc‐ticnezi wiac gâcne siricke‐fâreekac,
maŋ i repic qapicne hâcne;
mozi fuŋne‐ticne mana taraocmu?
10 “Wofuŋ noni hâcne maŋ â mamanasu ba esâic ecneekopac,
i ŋic sasawa juju‐jeŋicte â eebapa‐jeŋicte fârine
irec okacne bazu‐jarepemurâ iŋuc eekopac.”
11 Ŋic moczi eeatucko moneŋ mafa hureekac
e wipe moc e jahacne hândâŋ mâcne,
mocte ŋefackeme âteʒuocmu irec sâc;
e juju‐ticne jufeku ombâŋnao fisime sifuckecneocmu,
eme tataranao ŋic mutuc matacne erâ juocmu.
12 Ohec, Anutu huriri qâreŋ‐ticnere ŋeŋe,
fuŋnaonecteaŋ fekicne sâko ŋewec.
Ohec, tiri ufuŋ‐nâŋec.
13 O Wofuŋ, Israere mamanac gorao fokac i!
Go behecguniŋmu jaŋe ʒeŋgoma qurutuaniŋmu;
go râpecguniŋmu jaŋere ʒâŋe rufemaŋko qâreŋkezo;
jaŋe jujure opâ, Wofuŋ go hâcne behembiŋte.
14 Wofuŋ, goki bâpiaŋnutec biaŋkezepac,
goki baficnutec babafic fârine bâfuazepac;
go hâcne mumbiaŋguekopac.
15 Manakic, jaŋe ʒiŋuc nazaeŋgopieŋ:
“Wofuŋ dâŋticne wena? Fârinehec eoc me!”
16 No ine ʒârâ hâriŋ bâfuacmurâ mi jâiŋgupo,
erâ okac dameŋ biac fisiocte wâc mi mupo,
i go manakomec.
Micbipic‐nanezi dâŋ mufuawec
i gore maio tâtâc fokac.
17 Ʒârâ hâriŋ dameŋko huec sanaŋ‐nane jukomeczi
wiac hâhâwicne mi mac enarezemec.
18 Nu jâpec enareeŋgopieŋ jaŋe qurutuanʒepieŋ,
no ine manahaŋ mi qurutuazepac;
jaŋe bipic tatara ejarezejec,
no ine manahaŋ mi enarezejec.
Goki mutec sisipiric dameŋ fisi‐jarezejec
ehame siec‐jeŋic qazuc qanʒaŋ ejarezemec!
Sabata hombaŋ e tiri fozejec
19 Wofuŋzi kecʒiŋuc nazawec: “Go ŋic jaŋere motâc sâko â Juda ŋicwofuŋfâc‐ticne jaŋe raʒic wefuc eeŋgopieŋ ira, erâ Jerusalemte motâc sasawa ira mâmâc ra doma‐fârezemec.
20 Ehuc ʒiŋuc jazazemec: ‘Judare ŋicwofuŋfâc â Judare ŋicfâc ʒengoma erâ Jerusalemte hae rune sasawa motâc ʒira raʒic wefuc eeŋgopieŋ ŋoŋe Wofuŋte dâŋ mananiŋ!
21 Wofuŋzi ʒiŋuc mukac: Ŋoŋe juju‐ŋeŋicte erâ rucjari‐ŋeŋic baniŋ, ehuc sabata hombaŋko mafa wiac moc mi bahuc Jerusalemte motâcko raʒinʒepieŋ.
22 Ficŋeŋickonec wâc iŋuc jaha sabata hombaŋko mafa wiac moc mi bawahanʒepieŋ, ehuc sabata hombaŋ i mimiŋnefâc‐ŋeŋic mutâcne‐jarepo irec sâc tiri foocte manasuhuc gie wiac i me i moc mi banʒepieŋ.
23 Jaŋe ine mi manambiŋ â dâŋnanere hazec wâc mi râembiŋ, aricne, jaŋe maŋrâŋgeŋ ehuc dâŋnane qikiŋnembiŋ â bâbâtiŋ‐nane i qaisockembiŋ.’ ”
24 Wofuŋzi mukac: “Ʒi dâŋnane mana‐jâmbâŋkerâ sabata hombaŋko mafa wiac moc mi bahuc hae kecʒirec motâc fotâcneniŋmu, ehuc sabata hombaŋ tiri foocte manasuhuc gie wiac i me i moc mi baniŋmuo
25 ine hae kecʒirec motâc i ŋicwofuŋ â fekicne jaŋe fotâcnerâ raʒiniŋmu. Ine Dawidire ŋicwofuŋ ŋeŋeo ŋeeŋgopieŋ â becâsicko â keretacko raeŋgopieŋ jaŋe â fekicnefâc‐jeŋic mecne, erâ Judare ŋicfâc â Jerusalem haeo ŋec juc eeŋgopieŋ sasawa jaŋe mecne; eme hae i ŋesanaŋkeocmu.
26 Eme Juda mâreŋko hae ŋerakac irecnec â Jerusalem hae rârec rârec irecnec â Benjamiŋ mâreŋkonec mecne; wâneŋkonec â tikionec erâ Negebe mâreŋkonec mâmâc bâzi ririkere qowi â taha bâzire wiac â wiac âsu biaŋ bafisiniŋmu, erâ Wofuŋ nore taha ufuŋko baferâ daŋge taha râeniŋmu.
27 Ŋoŋe ine dâŋnane qatarahuc sabata hombaŋ tiri foocte mi manasuniŋmu, erâ mafa wiac bahuc Jerusalemte motâcko kosa raʒic wefuc eniŋmuo ine motâc‐ticne turuŋkepe ʒaocmu; eme Jerusalem haeo ŋicwofuŋ fic ŋerakac i ʒocte nânâ efâreha ʒoczi moc mi hâpoocmu.”