18
Kuʒi bapare dâŋ
1 Wofuŋtaonec dâŋ Jeremiarao fuawec i kecʒiŋuc:
2 “Ajoc, go juwic hurâ kuʒi bapa ere ficko fezemec, eme ira dâŋnane gazape manazemec.”
3 Eme no hurâ kuʒi bapa ere ficko ferâ honepo, e kuʒi bahuc ŋewec.
4 Eme kuʒi moc bakume sâqoreme afe izia kuʒi moc baocte maname biaŋkeme sâc bawec.
5 Eme Wofuŋte dâŋ norao ʒiŋuc fuawec:
6 “Kuʒi bapa kecizi eekac sâc ijaha Israere kikefuŋ ŋoŋehec sâcne mi epemu me? Wofuŋ nore dâŋ iŋuc. Manakic, afezi kuʒi bapare meo fokac iŋuc jaha Israe kikefuŋ ŋoŋe nore meo juŋgopieŋ.
7 No dameŋ mocko ŋicguru moc me ŋicwofuŋ moc â gurufâc‐ticne jaŋe bâsirowec‐jopapemurâ me imac‐jopapemurâ me sipiric‐jopapemurâ dâŋne epemu.
8 Eme uŋ sawaŋ ejarepo ŋicguru i jaŋe maŋjeŋic bârisierâ hehesic‐jeŋic behepie busâqoc manahuc maŋnane risieme wiac hâhâwicne ejarezo mupo i fârine mi bâfuapemu.
9 Dameŋ mocko ine ŋicguru moc me ŋicwofuŋ moc â gurufâc‐ticne jaŋe heɋârec‐jopahuc sara mama ejarepemurâ mupaŋkepemu.
10 Jaŋe ine, no wiac hone aŋac mi ecneekopac i hâcne ehuc dâŋnane qataraniŋmuo ine wiac biaŋne ejarepemurâ mupaŋke‐jarepo i fârinehec ezacte aka hecnepemu.
11 Eme ʒi Judare ŋicfâc â Jerusalem ŋecjucfâc‐ticne ʒiŋuc jazac: ‘Wofuŋzi mukac, Manaŋgopieŋ, no wiac hâhâwicne fai‐ŋeŋicko feocte dâŋne mana biric ehuc jukopac. Irec ŋoŋe sasawa hata hehesicnaonec risierâ juju â eebapa biaŋne bâfuaniŋte giene banʒepieŋ.’
12 “Jaŋe ine muniŋmu: ‘Iŋuc misac, nâŋe nâŋâcne mamana biri bâjâpenʒepeneŋ, ehuc maŋnâŋec râŋgeŋne â hehesicne irec sâcko wiac ebac efârenʒepeneŋ.’ ”
13 Irec Wofuŋzi kecʒiŋuc mukac:
“Ŋoŋe ŋicne ŋicne jaŋere ŋondeŋko mu wioc eniŋ:
Mozi dâŋ iŋucne moc manawec?
Naru ʒeŋoŋ Israe e wiac hâhâwicne bâfuawec hâcne!
14 Lebanoŋko sinou fokac i Sirioŋ tikire faio
fofo sanaŋ mi foocmu me?
Me tikionec opâ mâteŋne â fifisine wahaekac
i ʒicke kereŋ moc eocmu me?
15 Ŋicfâc‐nane jaŋe ine nore nikec‐jopawec,
jaŋe nemu jabane hosâc âsu rike‐jareeŋgopieŋ,
eme jaŋe ejarepe hata‐jeŋic ira fâfâc‐jopaha
rândiŋke qa eeŋgopieŋ,
ehuc hata sâckoo mâcne, hata kosa raeŋgopieŋ.
16 Ehuc mâreŋ‐jeŋic imackepie mimi busâqoc‐ticne
i jaŋerao tatara tâmiric foocmu;
eme i jâuruniŋmuzi bipic tatara ejareha
qizec fofotaric eniŋmu.
17 No râsifâc‐jeŋic jaŋere maio kagu mâŋâŋ eekac
irec sâc jaha ehuc qâtâtiec‐jopapemu,
â sisipiric dameŋ‐jeŋicko râpec‐jopape
ʒâŋe mai‐nane basaniŋmu.”
Ŋic jaŋe Jeremia râsi ecnepie numuwec
18 Eme ŋic jaŋe mumbiŋ, “Ajoc, Jeremia dâŋ qacnenaŋ! Taha bapa jaŋerao sâcmutâc dâŋ â mamanahec jaŋerao mamana biri â porofete jaŋerao porofete dâŋ i biac mi omaewec hâcne. Irec nâŋâc e jahacne dâŋzi bitiŋ râecnepene ira kizejec, nâŋâc dâŋticne i me i mana rereŋ moc mi enʒepeneŋ.”
19 Iŋuc mupie Jeremiazi ʒiŋuc numuwec:
“O Wofuŋ, go dâŋnanere hazec râec,
ehuc kisâfâc‐nane dâŋ mueŋgopieŋ i manac!
20 Biaŋnere okacne sâqocne bâtikiepie sâckeocmu me?
Jaŋe juju‐nane omaeocte nombâŋ ronarembiŋ hâcne.
No maigao domahuc jaŋere erâ dâŋ biaŋne gazapo
â kimbeŋgezi fai‐jeŋickonec rârieocte
numu‐garepo irec manasuc!
21 Irec mutecne naru motecfâc‐jeŋic jaŋe nânâre sipirickenʒepieŋ,
â ʒikare micko fenʒepieŋ;
ŋokacfâc‐jeŋic jaŋe naru motec tâmiric hozec erâ junʒepieŋ,
ŋicfâc‐jeŋic ine huc hâmoczi rocjopazejec,
â ŋicmotecfâc‐jeŋic jaŋe ʒika fuame ʒikare nânâ enʒepieŋ.
22 Go ʒikaŋic ejaretec ututuŋ fisi‐jarepie
ficjeŋickonec ki mamakucte fânâŋ fuazejec.
Jaŋe rocnuniŋte nombâŋ ronarembiŋ,
â wiwiticzi kike‐naneo kiocte soŋsoŋko râembiŋ hâcne.
23 O Wofuŋ, nuniŋte dâŋ sâqocne mana biric eeŋgopieŋ
i goki mana‐fârekic, irec mutec
kiŋ bahac‐jeŋic okac tâmiric mi fozejec,
â sâqocne‐jeŋic maigao fokac i mi bâtâmirezemec,
aricne, fâfâc‐jopame maigao waha jopazejec,
ehame kimbeŋ dameŋgao katucne bazu‐jarezemec.”