20
Pasahuru e Jeremia jâc fifitacko râewecte sâweckekicne
1 Eme Imere ere ŋokâ, taha bapa Pasahuru e Wofuŋte taha ufuŋko soŋaŋ sâko juweczi Jeremiare findaŋdâŋ i manawec.
2 Manarâ porofete Jeremia qarâ me kikene jâc fifitacko râeme kindeŋneme fowec; ine Wofuŋte taha ufuŋte motâc moc fowec ʒâŋene Benjamiŋte Motâc faicpec ira.
3 Hae fureme ine Pasahuru e Jeremia jâc fifitackonec batarame Jeremiazi ʒiŋuc âzâcnewec: “Wofuŋ e gore ʒâŋe Pasahuru beherâ ‘Ŋifec gafac ŋic hâhâwic eejare’ iŋuc mukac.
4 Wofuŋ e ʒiŋuc mukac hâcne: Manakic, no mupe go gahacnere hâwicguha âgofâcge ʒeŋgoma jaŋe gore hâwic‐jopazejec. Go ʒâŋe fârigezi honehaŋ jaŋe râsifâc‐jeŋic jaŋere ʒikare nânâ enʒepieŋ, eme Judare ŋicfâc sasawa jaŋe Babe ŋicwofuŋ ere meo râec‐jopape eki Babe haeo bacjopa rarâ ʒikazi qâhâmoc‐jopazejec.
5 Erâ i sawa mâcne, hae ʒirec rowaŋ â gie‐jeŋicte huhure wiac â boreŋ ʒeŋaŋ erâ Juda ŋicwofuŋ jaŋere moneŋ mafa i furu jaha râsifâc‐jeŋic jaŋere meo râepemu, eme jaŋe ro nusec erâ Babe haeo baraniŋmu.
6 Pasahuru go ine wiacfâcge sasawa jaŋehec Babe haeo bacŋopa rapie ira hâmopie ducŋopaniŋmu; go gahacne mecne â âgofâcge findaŋdâŋ burecne jazahuc jumeŋ jaŋe mâmâc.”
Jeremia e Wofuŋ mu wâwâsic ecnewec
7 O Wofuŋ, go mu bâdoc enaretec mi sanaŋkepo,
gore tâpirizi nore sirickeme sanaŋke‐naremeŋ;
ehame dameŋne dameŋne nore manapie
gâgâwinehec eekac,
â ŋic sasawa jaŋe âke sisic enareeŋgopieŋ.
8 No dâŋ muekopac sâc owa ruruckehuc
ʒiŋuc muekopac: “Bâbâʒaic â sisipiric!”
I Wofuŋ gore dâŋzi ʒoaŋne ʒoaŋne
mu âke sisic â mu gâgâwi bâfua‐nareekac irec.
9 “Ere mocwâc mi manasupemu
me ere ʒâŋeo miti mocwâc mi mupemu,”
iŋuc muhape ine maŋnaneo ʒocbâruŋ tinac fuawec,
ehuc siec‐naneo fosanaŋkehuc ʒacnuwec,
eme no irec ʒâic manaku betaŋkepo.
10 Bocjahazi saŋucko dâŋ ʒiŋuc mupie manaekopac:
“Rârec rârec wiac hâhâwicne fuarâ fokac,
irec dâŋgieo râeniŋ, dâŋgieo râenaŋ me!”
Âgo enareeŋgopieŋ jaŋe waha nuocmu me mâcne,
irec ruc banarehuc mueŋgopieŋ:
“E sâcne mecne eatuckepene
menâŋecko feme okacne bazucnenaŋmu.”
11 Wofuŋ goki ine ŋic qac momori iŋucne nohec juekicte
râsifâc‐nane jaŋe fâfâc‐jopatec sâcne mi sanaŋke‐nareniŋmu.
Mimi busâqoc‐jeŋic i tatarane tâmiric
â mi ninikecne jâmbâŋ.
12 O Anutu Tâpiri Ɋuŋɋasaŋ Wofuŋ,
go ŋic tiŋne ba esâic ejareekic,
erâ maŋ â mamanasu hone taraekic go mana‐naretec
okac babazuge jaŋerao fuame honezepac,
no dâŋnane gore meo râepo hâcne.
13 Wofuŋ gae hecneniŋ, Wofuŋ muteŋkeniŋ!
Eki hâcne qarâ suriŋne jaŋe ŋic hehesicne
jaŋere meonec batarac‐jopaekac.
Jeremiazi juju‐ticne sâweckewec
14 Fufua dameŋ‐nane i sâwecte biŋe ezac,
neŋgo‐nanezi rocnuwec dameŋ i moc mi jambuŋkezo!
15 “Ŋokâge moc fuawec,” biŋe biaŋ i mamac‐nanerao bara bubiaŋ sâko qacnewec
ŋic e sâwecte biŋe jaha ezac.
16 E Wofuŋzi hae gâcne busâqoc mi mana‐jarehuc
ima bacjopawec irec sâc fuacneme sâckezac;
e furicte kio owa irec fânâŋ â guŋpiticko ʒika fânâŋ
manahuc jume sâckezac.
17 E neŋgocte bumaŋko fohape
qâhâmocnume muzac sâckezac,
eme neŋgoc‐nanezi ʒâŋeruŋ‐nane ezac
â dameŋ sâc motec kikiwechec juzac.
18 No wemocte buʒaic â maŋʒârâ sawa hone manac ezore
â juju‐nane mimi busâqoc faio jutarazore
neŋgoc bumaŋkonec fuapo?