21
1 Wofuŋtaonec dâŋ Jeremiarao fuawec irec binaŋ. Ine ŋicwofuŋ Zedekiazi Malikiare ŋokâ Pasahuru â taha bapa Zefania, Masejare ŋokâ hâcne, jahe mu wioc ecnenicte Jeremiarao sorec‐jofawec dameŋ ira fuawec.
2 “Babe ŋicwofuŋ Nebukaneza e nâŋâcnehec ʒika qakacte go nâŋâcnere erâ Wofuŋ mu indiŋ ecnezemec; eme Wofuŋ e mârâc mâsi fuŋne fuŋne bawec iŋucnea moc bahuc Nebukaneza ecneme behec‐nâporâ razac mecne.”
3 Jeremia eki ine ʒiŋuc jasawec:
4 “Ŋohe Zedekia kecʒiŋuc âzâcnezepirec, ‘Wofuŋ, Israere Anutu e ʒiŋuc mukac: Manaŋgopieŋ, ʒikare wiac meŋeŋicko badomahuc Babe ŋicwofuŋ â Kaldea ŋic sac râpenao somâc‐ŋopahapie jopahuc juŋgopieŋ wiac i mupe hae kecʒirec maŋnao risie‐fârezejec.
5 Erâ no nahac me sicnehuc meombâŋ‐nane tâpiriheczi aaricko â kimbeŋko erâ bu ʒaʒamaŋ‐nane fâuckeha ŋoŋehec ʒika qapemu.
6 Ehuc hae ʒirec ŋecjucfâc, ŋic mecne qowi mecne jopapemu; ehame huc hâmoczi rocjopame omaenʒepieŋ.
7 Wofuŋzi ʒuhuckerâ ʒiŋuc mukac: Dameŋ irec faicnao ine Judare ŋicwofuŋ Zedekia e mecne â kiŋaŋŋicfâc‐ticne mecne â ŋic ŋokac hae ʒirec maŋnao juhapie huc hâmoczi me ʒikazi me roroczi getâc‐jopawec jaŋe mâmâc Babe ŋicwofuŋ Nebukaneza â râsifâc‐jeŋic juhuc juju‐jeŋic jowac roniŋte manasuŋgopieŋ jaŋere meo râec‐jopapemu; eme eki busâqoc mana‐jarehuc ŋeŋezic me aakic‐jopa i moc mi ehuc ʒikare micko râec‐jopazejec.’
8 “Erâ ŋicguru keci jazazemec, ‘Wofuŋzi ʒiŋuc mukac: Manaŋgopieŋ, no jujure hata mecne, hâmocte hata mecne mâmâc ŋaza ŋowatuc ekopac.
9 Moc e hae ʒirec maŋnao ŋeocmu e ʒikare nânâ eocmu, me nânâ basahuc hâmoocmu, me huc hâmoczi roocmu; â moc e ine hae beherâ Kaldea ŋic somâc‐ŋopaŋgopieŋ jaŋerao ʒuhuckeocmu eki ine juocmu â juju‐ticne i ʒikare mateŋ iŋucne focneocmu.
10 No bâbâpiaŋ mâcne, sisipiric bâfuacnepemurâ hae keci maickepo, Wofuŋ nore dâŋ iŋuc. Hae i Babe ŋicwofuŋ ere meo feha turuŋkeme ʒâseŋkezejec.’
Juda ŋicwofuŋ ere findaŋdâŋ fuakac
11 “Eme Juda ŋicwofuŋ ere kikefuŋfâc jazac, ‘Wofuŋte dâŋ mananiŋ,
12 Dawidire kikefuŋ ŋoŋe! Wofuŋ e kecʒiŋuc mukac:
“Furic sâc dâŋgie baniŋ, ehuc ŋic bomac‐jopakicne
jaŋe bâbâʒâic ŋic ere meonec batarac‐jopaniŋ.
I eebapa‐ŋeŋic sâqocnere erâ kimbeŋ‐nanezi
ʒoc iŋucne fuarâ bâruŋkeme
moczi moc hehâpozore eipiezacte iŋuc enʒepieŋ.” ’
13 “Manakic, wâneŋko haroŋaŋ faio ŋesanaŋkeekic
hae go hâcne râsi egarezo mukopac,
Wofuŋ nore dâŋ iŋuc.
Ŋoŋe hâcne mueŋgopieŋ, ‘Mozi râsi enâreocmu?
Mozi ficsanaŋ‐nâŋecko wefuocmu?’
14 No eebapa‐ŋeŋicte fârine irec sâcko bâtiŋ‐ŋopapemu,
Wofuŋ nore dâŋ iŋuc.
No kâte‐ticnao ʒoc ruqepemu,
eme izi wiac hae râreckehuc fokac
i ʒâseŋke‐fâreocmu.”