24
Jâmbo hândâŋ biaŋne â sâqocne irec dâŋ
1 Babe ŋicwofuŋ Nebukaneza eki Judare ŋicwofuŋ Jekonia, Jojakimte ŋoka hâcne, e â Judare ŋic fekicne â fic bapa erâ aeŋzi wiac bapa jaŋe mâmâc Jerusalemkonec Babe haeo bacjopa rawec. Eme manaŋgopieŋ, dameŋ irec faicnao Wofuŋzi kâdoc jajahec jâmbo hândâŋnehec Wofuŋte taha ufuŋte hae ʒoŋao ŋeha nowatume honepo.
2 Kâdoc mocko jâmbo hândâŋ biaŋne jâmbâŋ fowec, jâmbo hândâŋne bâbâni qeueekac irec sâc; kâdoc moc ira ine jâmbo hândâŋ sâqocne jâmbâŋ fowec, jâmbo hândâŋne mi nânâne, gâreckekicne hâcne.
3 Eme Wofuŋzi nazawec: “Jeremia, go wemo wiac honekomec?” Mume mupo, “Jâmbo hândâŋne, jâmbo hândâŋ biaŋne i biaŋne jâmbâŋ, â jâmbo hândâŋ sâqocne i sâqocne jâmbâŋ, gâreckekicnere mocwâc mi nânâne.”
4 Mupe tarame Wofuŋzi dâŋ kecʒiŋuc nazawec:
5 “Wofuŋ, Israere Anutu no ʒiŋuc mukopac: Jâmbo hândâŋ biaŋne ʒi hone ʒiziwekopac, ehuc manahape Judaŋic mâreŋ ʒirecnec Kaldea mâreŋko bacjopa rambiŋ jaŋe irec sâc jaha hone ʒiziwec‐jopakopac.
6 Erâ hone akic ejarehuc juku jowac‐jopape mâreŋ ʒira risienʒepieŋ; eme no heɋârec‐joparâ mocwâc mi sipiric‐jopapemu, no sarac‐joparâ mocwâc mi qâfiec‐jopapemu.
7 Erâ no maŋ mamanasu tahac‐jopahape jaŋe no Wofuŋ jukopac i mana taranʒepieŋ. Eme jaŋe ŋicfâc‐nane juhapie no Anutu‐jeŋic juzepac, jaŋe maŋjeŋic bârisie‐jâmbâŋkehuc maicnunʒepieŋ.
8 “No Juda ŋicwofuŋ Zedekia â fekicnefâc‐ticne â Jerusalemte ŋic nâfocne, â mâreŋ ʒirec ŋic ʒanʒaŋne erâ Aigita mâreŋko mâckerâ juŋgopieŋ jaŋe ŋiczi jâmbo hândâŋ sâqocne, gâreckekicnere mocwâc mi nâhuc beheeŋgopieŋ sâc ijaha ejarepemu.
9 Noni mupe mâreŋte ŋicguru sasawa honec‐joparâ hâwic‐jopazejec. Ehame behec‐jopapemu sâc mâreŋ irec ŋic jaŋe mu ruruc ejarehuc mu qâqiŋ dâŋ ejarenʒepieŋ, erâ nifepupu ejarehuc sâwecdâŋ muranʒepieŋ.
10 Eme mupe ʒika mecne, roroc mecne, huc hâmoc mecne fua‐jareme jaŋe â mimiŋnefâc‐jeŋic mâreŋ jarepo ira sirowe‐fârenʒepieŋ.”