25
Babezi ima sâko bâfuahuc juhame jara 70 tarawec
1 Nebukaneza e Babe ŋicwofuŋ juhame jara wâŋ ewec, â Juda ŋicwofuŋ Jojakim, Josiare ŋokâ hâcne, e ŋicwofuŋ juhame jara 4 ewec dameŋ ira Judare ŋicfâc sasawa jaŋere erâ Jeremiarao dâŋ fuawec ʒine hâcne.
2 Eme porofete Jeremia e Juda ŋicguru sasawa â Jerusalem ŋecjucfâc‐ticne ʒeŋgoma jaŋe dâŋ i jazahuc kecʒiŋuc muwec:
3 “Amoŋte ŋokâ Josia e Juda ŋicwofuŋ jume jara 13 eha Wofuŋte dâŋ fuŋkerâ norao fuawec; erâ fua wefukuhame jara 23 sâko tarakac, ehame no hati mutaniŋke‐ŋarehuc jupo, ŋoŋe ine moc mi manambiŋ.
4 Eme Wofuŋ e dameŋ sâc kiŋaŋ qaqafâc‐ticne sasawa, porofete hâcne, ŋoŋerao sorec‐jopahuc juwec, ŋoŋe ine mi manambiŋ â dâŋticne mananiŋte hazec mi râembiŋ.
5 E ʒiŋuc nazawec hâcne: ‘Ŋoŋe ru sâc hata hehesicne â eebapa‐ŋeŋic sâqocne râpeckenʒepieŋ; iŋuc erâ Wofuŋ noni ŋoŋe â mimiŋnefâc‐ŋeŋic mâreŋ tahac‐ŋopapo ira jurâ ju ehuc juniŋmu sanaŋ.
6 Ŋoŋe nemu gâcne jaŋerao qohotahuc kiŋaŋ mi qajarenʒepieŋ â mi fodape‐jarenʒepieŋ, erâ wiac hâhâwicne eŋarezipore eebapa‐ŋeŋiczi mi bâiŋnunʒepieŋ.’
7 Ŋoŋe ine dâŋnane mi manambiŋ, irec eebapa‐ŋeŋiczi bâiŋnumbiŋte wiac hâhâwicne fua‐ŋarezejec, Wofuŋ nore dâŋ iŋuc.”
8 Irec Anutu Tâpiri Ɋuŋɋasaŋ Wofuŋ e ʒiŋuc mukac: “Ŋoŋe dâŋnane mi manambiŋte
9 no faic mâreŋkonec ŋicguru sasawa jaŋere mecne erâ Babe ŋicwofuŋ Nebukaneza, kiŋaŋ qaqa‐nane ere mecne, dâŋ râe‐jarepe rame jaŋe ware mâreŋ ʒi â ŋecjucfâc‐ticne erâ ŋicne ŋicne rârec rârec juraŋgopieŋ ŋoŋe râsi eŋarenʒepieŋ. Eme no sipiric‐ŋopa‐jâmbâŋkepe ŋiczi honec‐ŋoparâ bipic tatara ejarezejec, ehame mu ruruc â âkebic sanaŋ eŋarenʒepieŋ. Wofuŋ nore dâŋ iŋuc.
10 Eme no ŋondeŋ‐ŋeŋickonec aŋac ʒeri â ʒeri bubiaŋ â ŋic ŋokac roroc ehuc ʒeri fânâŋ eeŋgopieŋ â hâmu fâfâze irec fânâŋ erâ lambe tatamac i bârâriezepac.
11 Mâreŋ sasawazi sesuctac fuarâ tuhu fozejec, ehame ŋicguru ʒi jaŋe Babe ŋicwofuŋ ere kiŋaŋ qahuc juhapie jara 70 tarazejec.
12 Juku jara 70 tarame ine Babe ŋicwofuŋ â ŋicfâc‐ticne jaŋe kiŋjeŋicte okacne bazu‐jarepemu, ehuc Kaldea ŋic jaŋere mâreŋ imackepe sesuctac fuarâ fozejec sanaŋ, Wofuŋ nore dâŋ iŋuc.
13 No mâreŋ i hâcne râsi ecnerâ dâŋ muhuc jupo i mupe fârinehec efâreocmu; papia kecʒirec maŋnao dâŋ qâreŋke‐fârekicne fokac, ine Jeremiazi ŋicne ŋicne findaŋdâŋ‐jeŋic muwec i hâcne.
14 Eme jaŋe iŋuc jaha ŋicguru kâcɋene â ŋicwofuŋ fekicne jaŋere kiŋaŋ qaqa erâ junʒepieŋ, ehame juju â eebapa‐jeŋicte furine jarepemu.”
Wofuŋte kimbeŋzi ŋicne ŋicne jaŋere faio feocmu
15 Wofuŋ, Israere Anutu e ʒiŋuc hâcne nazawec: “Go menaneonec waiŋ râqâc kimbeŋzi fusekicne ʒi rorâ ŋicne ŋicne jaŋerao sorecgupe rarâ ejaretec nânʒepieŋ.
16 Eme jaŋe nârâ biric boroc epie mupe ŋondeŋ‐jeŋicko ʒika fuame honerâ maŋsifuc ejarezejec.”
17 Iŋuc mume Wofuŋte meonec râqâc rorâ Wofuŋzi ŋicne ŋicne jaŋerao sorecnuwec sâc rarâ ejarepe nâmbiŋ.
18 Ine Jerusalem hae â Juda mâreŋko hae ŋerawec sâc erâ ŋicwofuŋfâc‐jeŋic â fekicnefâc‐jeŋic jaŋe hâcne. Hae izi sesuctac â niniŋ siarereŋ fuarâ foocte, erâ ŋic gâcnezi mu ruruc ejarehuc sâwecdâŋ muraniŋte iŋuc ejarepo; eme dameŋ ʒi iŋuc hâcne fuawec fokac.
19 Erâ ŋic kecʒi jaŋe mâmâc gumec‐jopape nâmbiŋ: Aigita ŋicwofuŋ Farao â kiŋaŋ qaqafâc‐ticne â fekicnefâc‐ticne erâ ŋicfâc‐ticne sasawa.
20 Erâ ŋondeŋ‐jeŋicko ŋic sahac hawari fuŋne fuŋne juŋgopieŋ jaŋe; erâ Uzi mâreŋte ŋicwofuŋ sasawa â Filisa mâreŋte ŋicwofuŋ sasawa, ine Asikaloŋ â Gaza â Ekoroŋ erâ Asidode mâreŋ nâfocne irec ŋicwofuŋ jaŋe hâcne.
21 Erâ Edom â Moabi â Amoŋ mâreŋ rune jaŋe.
22 Erâ Tirore ŋicwofuŋ sasawa â Sidoŋte ŋicwofuŋ sasawa, erâ hâwec ocniŋuc hâwecmecko ŋicwofuŋ juraŋgopieŋ jaŋe.
23 Erâ Dedaŋ â Tema â Buʒi irec rune â qizec susuc‐jeŋic naki ŋifec â ŋifec bâtâcneeŋgopieŋ jaŋe.
24 Erâ Arabia mâreŋ irec ŋicwofuŋ sasawa, â ŋic sahac hawari fuŋne fuŋne mâreŋ sawao juraŋgopieŋ jaŋere ŋicwofuŋ sasawa.
25 Erâ Ʒimiri irec ŋicwofuŋ sasawa, â Elamte ŋicwofuŋ sasawa erâ Mede mâreŋte ŋicwofuŋ sasawa.
26 Erâ faic mâreŋte ŋicwofuŋ bembeŋko me ʒoricko juŋgopieŋ sasawa, ine hâcne mâreŋte faio ŋic gurune gurune ŋicwofuŋ‐jeŋichec sasawa; mâc Babe ŋicwofuŋ eki ine gâcne nâfârepie ʒâhec nâzejec.
27 “Go iŋuc ejarehuc jazazemec: ‘Anutu Tâpiri Ɋuŋɋasaŋ Wofuŋ, Israere Anutu e ʒiŋuc mukac: Nâku maŋsifuc eŋareme maŋunʒepieŋ, erâ waha ŋopame mocwâc mi faharenʒepieŋ; no ŋondeŋ‐ŋeŋicko ʒika bâfuapemu irec erâ iŋuc enʒepieŋ.’
28 “Jaŋe ine megaonec râqâc rorâ nâniŋte qikiŋneniŋmuo ine jazazemec, ‘Anutu Tâpiri Ɋuŋɋasaŋ Wofuŋ e ʒiŋuc mukac: Ŋoŋe nâjâmbâŋkenʒepieŋ!
29 Manaŋgopieŋ, hae nore ʒâŋe rowec erao hâcne fuŋkerâ ʒârâ hâriŋ bâfuakopac, ehame bâbâtiŋzi ŋoŋe wemocko ŋowaruzac! No mâreŋ ŋecjucfâc‐ticne ʒeŋgoma ʒika bâfua‐jarepemu i ŋoŋe wâc mi ŋowaruocmu, Anutu Tâpiri Ɋuŋɋasaŋ Wofuŋ nore dâŋ iŋuc.’
Wofuŋzi ŋicne ŋicne jaŋere dâŋ mutaraocmu
30 “Irec go jaŋere findaŋdâŋ kecʒiŋuc muhuc jaza‐fârezemec:
‘Wofuŋ owa‐ticnere fânâŋzi faickonec wahaocmu,
â tiri ufuŋ‐ticnaonec marac fânâŋ‐ticne fuame mananiŋmu.
E owa kâcɋene owackeme ŋeŋe hae‐ticne sâcke‐fâreocmu,
ehame waiŋ hândâŋne âte pisickehuc aŋara heeŋgopieŋ
irec sâc mâreŋ ŋecjucfâc‐ticne sasawa râsi ejarehuc aŋara heocmu.
31 Eme irec fânâŋ i mâreŋ qaŋeŋnao ra fisiocmu.
Wofuŋ e ŋicne ŋicne dâŋko râec‐joparâ
jaŋerao dâŋgie bahuc kiŋhec jaŋe mutara‐jareme
ʒikare biŋe eniŋmu. Wofuŋte dâŋ iŋuc.’
32 “Anutu Tâpiri Ɋuŋɋasaŋ Wofuŋ e dâŋ kecʒiŋuc mukac:
Jei, wiac hâhâwicnezi ŋicne ŋicne fua‐jare raocmu,
â mânâŋ ɋicwânʒâŋnehec moczi mâreŋ qaŋeŋnaonec fuarâ fisiocmu.
33 “Wofuŋzi qâhâmoc‐jopaocmu jaŋe ʒoaŋ dameŋ ira mâreŋ qaŋeŋne ŋifeckonec fuŋkerâ foware raku ŋifecko fotaraniŋmu; jaŋere erâ ki mamakuc moc mi fuaocmu, erâ ro nusec ejarerâ duducjopa i wâc mi fuaocmu, aricne, jaŋe mâreŋ faio jawa iŋucne fohuc mâreŋte guec enʒepieŋ.
34 “Lama soŋaŋ ŋoŋe kio huse erâ owackeniŋ,
lama rune ŋoŋe ʒafeo rândiŋke qarâ risimbiŋne qaniŋ;
qa hezuc eŋarezore dameŋ maickekac hâcne,
henʒaŋ‐ŋopapie kuʒi furi sâko waha qanʒaŋneekac
irec sâc enʒepieŋ.
35 Iŋuc fuame lama soŋaŋ jaŋe dapeŋ basa‐bipieniŋmu,
â rune jaŋe wiseniŋte eipieniŋmu.
36 Mananiŋ! Lama soŋaŋ jaŋere kio owa
â rune jaŋere ki uu fuakac,
i Wofuŋzi kecɋaŋ gie‐jeŋic sipirickekacte
37 â sapa biaŋne i Wofuŋ kimbeŋ‐ticnere
ʒocbâruŋte erâ imackekicnere.
38 E laioŋ iŋucne kâte uupic‐ticnaonec wefuwec;
eme mâreŋ‐jeŋic i ʒika sisipiric‐ticnehecte
â kimbeŋ‐ticnere ʒocbâruŋte tuhutac fuawec fokac.”