28
Hananiazi findaŋdâŋ burecne muwec
1 Eme jara dameŋ ijaha, Juda ŋicwofuŋ Zedekia e gie‐ticne fuŋkerâ bahuc juhame mosa 4 tarame Aʒurure ŋokâ, porofete Hanania e Gibeoŋ haeoneczi Wofuŋte ufuŋko taha bapa â ŋic ŋokac sasawa jaŋere maio dâŋ ʒiŋuc nazawec:
2 “Anutu Tâpiri Ɋuŋɋasaŋ Wofuŋ, Israere Anutu eki ʒiŋuc mukac: No Babe ŋicwofuŋ e tagi‐ticne fai‐ŋeŋicko râewec i ŋowac ro behepemu.
3 Jara jajahec mi taraha Babe ŋicwofuŋ Nebukaneza e Wofuŋte ufuŋkonec râqâc wiac hae ʒirecnec Babe haeo barawec i mupe ʒira mocwâc risie warezejec.
4 Erâ i sawa mâcne, Jojakimte ŋokâ Juda ŋicwofuŋ Jekonia e â Juda mâreŋkoneo ŋic Babe haeo bacjopa rakicne sasawa jaŋe wâc mâmâc jowac‐jopape hae mâreŋ ʒira risie‐fâreniŋmu, no Babe ŋicwofuŋ e tagi‐ticne fai‐ŋeŋicko râewec i ŋowac ro behec epemu hâcne, Wofuŋ nore dâŋ iŋuc.”
5 Eme porofete Jeremia e porofete Hanania â taha bapa erâ ŋic ŋokac sasawa Wofuŋte ufuŋko domambiŋ jaŋere maio dâŋ âzâcnewec.
6 Ehuc muwec: “Jâmbomac, Wofuŋ e iŋuc ezejec! Go findaŋdâŋ mumec irec fârine Wofuŋzi bâfuazejec, ehuc mume ufuŋ‐ticnere râqâc wiac mecne â kâpâcwâru ŋic sasawa mecne Babe haeonec ʒira risie warenʒepieŋ.
7 Mâc gore maio â ŋic ŋokac sasawa jaŋere maio dâŋ kecʒiŋuc mufuape manazemec:
8 Porofete gâcne, go â no nâhâc mi fuarâ juhapere mâmâc jaha fuŋkerâ juwefumbiŋ jaŋe mâreŋ bocjaha â ŋicguru sâko ŋicwofuŋhec jaŋere findaŋdâŋ muhuc ʒikare â rorocte â huc hâmocte dâŋ mumbiŋ.
9 Wamare findaŋdâŋ muhuc jukac porofete e jâmbomac Wofuŋzi soreme mukac me weniŋuc, irec fuŋne i findaŋ‐ticnere fârine fuame sawa mana tarazo.”
10 Eme porofete Hanania e Jeremia kioŋ‐ticne upenaonec jâoc rorâ qazuwec.
11 Qazurâ ŋic ŋokac sasawa jaŋere maio kecʒiŋuc muwec: “Wofuŋzi ʒiŋuc mukac: Jara jajahec mi taraha ine Babe ŋicwofuŋ Nebukaneza ere tagi ŋicne ŋicne jaŋere faio fokac i jowac ro behec epemu.” Jeremia eki ine mâc behec‐joparâ rawec.
12 Eme porofete Hanania e Jeremia kioŋ‐ticne upenaonec jâoc rorâ qazuwec, dameŋ irec faicnao Wofuŋte dâŋ Jeremiarao kecʒiŋuc fuawec:
13 “Go rarâ Hanania âzâcnec, ‘Wofuŋzi ʒiŋuc mukac: Go kioŋ jâczi bakicne qazu behec emeŋ, noni ine irec okacne aeŋzi kioŋ i bâfuapemu.
14 Anutu Tâpiri Ɋuŋɋasaŋ Wofuŋ, Israere Anutu no ʒiŋuc mukopac hâcne: No ŋicne ŋicne ʒi sasawa jaŋere faio aeŋ tagi râepe feocmu, eme Babe ŋicwofuŋ Nebukaneza ere kiŋaŋ qahuc junʒepieŋ; erâ jaŋe sawa mâcne, kâte qowi jaŋe wâc ere meo qikiŋ‐jopakopac.’ ”
15 Eme porofete Jeremia e Hanania ʒiŋuc âzâcnewec: “Hanania, go manac, Wofuŋ e go mi sorecguwec, go ine ŋic ŋokac keci jaŋe eatuc‐jopatec burecko roweckeeŋgopieŋ.
16-17 Irec Wofuŋzi ʒiŋuc mukac: ‘Manakic, no mâreŋkonec bârâriecgupemu, go dâŋgezi qafeŋ‐jopatec Wofuŋ no râsi enarembiŋte jara ʒijaha hâmozemec.’ ” Eme porofete Hanania e jara ijaha mosa namba 7 ira hâmowec.