29
Jeremia e ŋic kâpâcwâruo jumbiŋ jaŋere papia qâreŋkewec
1 Porofete Jeremia e Jerusalem haeo ŋehuc soŋaŋ micne kâpâcwâru bacjopa rakicne irec ʒanʒaŋne erâ taha bapa â porofete â ŋic ŋokac sasawa, Nebukanezazi Jerusalem haeonec Babe haeo bacjopa rawec jaŋe papiarae‐jarewec irec dâŋ ʒine hâcne.
2 Ine ŋicwofuŋ Jekonia â neŋgoc‐ticne mecne, kiŋaŋ qaqafâcne erâ Juda mâreŋkonec â Jerusalem haeonec ŋic fekicne jaŋe mecne, erâ fic bapa â aeŋzi wiac bapa ŋic jaŋe mâmâc Jerusalem haeonec bacjopa rakicne, dameŋ irec faicnao papia râeme rawec.
3 Papia i Safaŋte ŋokâ Elasa â Hilikiare ŋokâ Gemaria jahe ŋicwofuŋ Zedekia eki Babe haeo ŋicwofuŋ Nebukaneza erao sorec‐jofame barapic.
4 Papiare dâŋ ine kecʒiŋuc: “Anutu Tâpiri Ɋuŋɋasaŋ Wofuŋ, Israere Anutu e Jerusalem haeonec Babe haeo bacjopa rakicne jaŋe ʒiŋuc jaza‐fârekac:
5 ‘Ŋoŋe fic barâ maŋnao juju fofo enʒepieŋ, erâ nânâ gie bâra fârine fuame nânʒepieŋ!
6 Ŋoŋe ŋokac rocjoparâ motec bâfuac‐jopanʒepieŋ, erâ ŋokâfâc‐ŋeŋic ŋokac jarenʒepieŋ â otâfâc‐ŋeŋic ŋicko râec‐jopanʒepieŋ; eme jaŋe naru motec rocjopapie ŋoŋe mâreŋ ira fua sawec epie ʒare‐ŋeŋic mi wahazejec.
7 Ŋoŋe hae mâreŋ jowac‐ŋopa rapo ira wama foocte giene banʒepieŋ, erâ hae mâreŋ irec erâ Wofuŋ no numu‐narenʒepieŋ; mâreŋ ira wama foha ŋoŋe wama faio jaha juhâmoniŋmu hâcne.
8 Anutu Tâpiri Ɋuŋɋasaŋ Wofuŋ, Israere Anutu no ʒiŋuc mukopac: Porofete me findaŋdâŋ mumufâc‐ŋeŋic ŋondeŋ‐ŋeŋicko jueŋgopieŋ jaŋe eatuc‐ŋopazo epie mi mana‐jarenʒepieŋ, ehuc guŋ manaeŋgopieŋzi irec dâŋ mupie hazec mi râenʒepieŋ wâc.
9 Jaŋe nore ʒâŋeo âke hotahuc findaŋdâŋ ŋazapie burec eekac hâcne, no jaŋe moc mi sorec‐jopapo, Wofuŋ nore dâŋ iŋuc.’ ”
10 Wofuŋ e kecʒiŋuc mukac: “Babe hae jara dameŋ 70 taracneme iqic‐ŋopapemu. Eme mumupaŋ dâŋ biaŋne fokac i fârinehec eocte hae mâreŋ ʒira jowac‐ŋopape risie wareniŋmu.
11 No ŋoŋere dâŋ weniŋuc mana biric eekopac i mana‐jâmbâŋkekopac, wamare dâŋ hâcne, sisipiricte dâŋ aricne; ine juju worickehuc jueŋgopieŋ i ŋarepemurâ iŋuc eekopac, Wofuŋ nore dâŋ iŋuc.
12 Eme ŋoŋe wira wâwâsic enarepie mana‐ŋarepemu.
13 Ŋoŋe wira basac enareku bâfuacnuniŋmu ine maŋ hâcbuc jaha wira basac enarepie
14 mana‐ŋarepe bâfuacnuniŋmu hâcne. Eme no kâpâcwâruonec batarac‐ŋopahuc mâreŋ sâc ŋicne ŋicne jaŋere ŋondeŋko bâtâtiec‐ŋopapo irecnec ro nusec eŋarerâ jowac‐ŋopape hae mâreŋ beherâ raniŋte mupo ijaha mocwâc risie warenʒepieŋ. Wofuŋ nore dâŋ iŋuc.”
Porofete burecne jajahec jahere dâŋ
15 “Ŋoŋe ine mueŋgopieŋ, ‘Wofuŋ e Babe haeo porofete bâfuac‐jopame junâreŋgopieŋ.’
16 Manaŋgopieŋ, Wofuŋ e ŋicwofuŋ Dawidire eri ŋeŋeo ŋekac ere dâŋ mecne, â ŋic ŋokac hae ʒirec maŋnao jufâreŋgopieŋ, qomâfâc‐ŋeŋic kâpâcwâruo mi bacjopa rakicne, jaŋere dâŋ mâmâc bajukac.
17 Anutu Tâpiri Ɋuŋɋasaŋ Wofuŋ e ʒiŋuc mukac: ‘Jâmbomac, no mupe ʒika â nânâre hâhâmo erâ huc hâmoc fua‐jarezejec, ehame jâmbo hândâŋne sâqorekicne ŋiczi mocwâc mi nânâne irec sâc enʒepieŋ.
18 Eme ʒika â roroc erâ huc hâmoc izi jâpec‐jopame mâreŋte ŋicguru sasawazi honec‐joparâ hâwic‐jopaocmu; ŋicne ŋicne ŋondeŋ‐jeŋicko bâtâtiec‐jopapo jaŋe jaŋerao sâc hehuc sâwecdâŋ muniŋmu â bipic tatara ejareocmu, ehame mu ruruc â mu âkebic ejareniŋmu.
19 I dâŋnane mana rereŋ moc mi embiŋte iŋuc fua‐jareocmu, Wofuŋ nore dâŋ iŋuc. No dameŋ sâc kiŋaŋŋicfâc‐nane, porofete hâcne, ŋoŋerao sorec‐jopape fâmbiŋ, ŋoŋe ine sifu mi manambiŋ, Wofuŋ nore dâŋ iŋuc.
20 Kâpâcwâru ŋic mupe Jerusalemkonec Babe haeo bacjopa rakicne ŋoŋe sasawa Wofuŋ nore dâŋ mananʒepieŋ.’
21 “Kolajare ŋokâ Ahaba erâ Masejare ŋokâ Zedekia jahe Anutu Tâpiri Ɋuŋɋasaŋ Wofuŋ ere ʒâŋeo âke hotahuc findaŋdâŋ burecne ŋazaekopirecte Israere Anutuzi jahere ʒiŋuc mukac: Manaŋgopieŋ, no Babe ŋicwofuŋ Nebukaneza ere meo râec‐jofape ʒâŋe fai‐ŋeŋicko qâhâmoc‐jofazejec.
22 Eme Judare ŋicfâc sasawa Babe haeo bacjopa rakicne jaŋe jahere qâqiŋ qahuc sâwecdâŋ kecʒiŋuc muhuc juniŋmu: ‘Wofuŋzi mume Zedekia â Ahaba fua‐jactewec sâc ijaha go fua‐garezejec, jahe Babe ŋicwofuŋzi ʒocko rikec‐jofame hâmopic hâcne.’
23 Jahe Israe ŋondeŋko sindaŋ ehuc âgofâc‐jekic jaŋere ŋokac jaŋehec boe sau ejupirec, ehuc no mi mutâcne‐jactehape nore ʒâŋeo âke hotahuc burecdâŋ muromacke jupirec. No i manakopaczi mutaniŋkekopac, Wofuŋ nore dâŋ iŋuc.”
24 Semaja Nehelam haeonec e ine ʒiŋuc âzâcnezemec:
25 “Anutu Tâpiri Ɋuŋɋasaŋ Wofuŋ, Israere Anutu eki kecʒiŋuc mukac: Go gahacne maŋte Jerusalemte ŋic ŋokac sasawa â Masejare ŋokâ, taha bapa Zefania hâcne, erâ taha bapa sasawa jaŋerao papia kecʒiŋuc râetec rawec:
26 ‘Wofuŋ e taha bapa Jojada ere okacne taha bapa râecguwec, i Wofuŋte ufuŋko maŋjeŋic sifuckekicnezi findaŋdâŋ burecne mueŋgopieŋ jaŋere rucjari bahuc jâc fifitacko â aeŋ niŋgiŋko râec‐jopacmurâ iŋuc ewec.
27 Eme ʒi wemocte Anatoti haeonec Jeremiazi ŋoŋerao findaŋdâŋ muhuc juekac e aka mi hecnekomec?
28 Eki hâcne papia moc kecʒiŋuc râe‐nâreme Babe haeo ware fisiwec i: “Kâpâcwâru dameŋ‐ŋeŋic i ʒoricne fokac, irec fic barâ maŋnao juju fofo enʒepieŋ, erâ nânâ gie bapie fârine fuame nâhuc junʒepieŋ.” ’ ”
29 Taha bapa Zefania eki ine papia porofete Jeremia wosecnewec.
30 Eme Wofuŋte dâŋ Jeremiarao kecʒiŋuc fuawec:
31 “Kâpâcwâru ŋic sasawa dâŋ ʒiŋuc râe‐jaretec razejec, ‘Wofuŋ e Nehelam hae rune Semaja ere dâŋ ʒiŋuc mukac: Semaja e mi sorehape findaŋdâŋ ŋazahuc burecdâŋko roweckeniŋte eatuc‐ŋopawec.
32 Irec Wofuŋ no ʒiŋuc mukopac: Manaŋgopieŋ, no Nehelam rune Semaja â ɋâricfâc‐ticne jaŋe irec okacne bazu‐jarepemu. Ɋaricfâcne jaŋeraonec moczi ŋicguru ʒi jaŋere ŋondeŋko moc mi juzejec, ehuc ŋicfâc‐nane jujuhâmo bâfua‐jarepemu i wâc mi honezejec, e ŋic jaŋe Wofuŋ no râsi enareniŋte mu qafeŋ ejarewec irec. Wofuŋ nore dâŋ iŋuc.’ ”