30
Kâpâcwâruonec risieniŋte mupaŋke‐jarekicne
1 Wofuŋtaonec dâŋ Jeremiarao fuawec i ʒiŋuc:
2 Wofuŋ, Israere Anutu e kecʒiŋuc mukac: “No dâŋ gazapo sâc i papia mocko qâreŋke‐fârezemec.
3 Manakic, dameŋ moc maikeocmu ira Israe â Juda ŋicfâc‐nane jaŋe kâpâcwâruonec batarac‐joparâ ine mimiŋnefâc‐jeŋic mâreŋ jarepo ira bârisiec‐jopape rauckenʒepieŋ. Wofuŋ nore dâŋ iŋuc.”
4 Wofuŋ e Israere â Judare dâŋ muwec i kecʒiŋuc:
5 “Hâhâwicte erâ kio owa fuame manakopac,
wama aricne, bipic tatara sawa fokac.
6 Mu wioc erâ honeniŋ,
ŋiczi motec rocjopazo eŋgopieŋ me weniŋuc?
No wemocte ŋic sasawa jaŋe ŋokac gozi kicjopame eeŋgopieŋ
iŋuc ehuc mejeŋic gâjoŋ‐jeŋicko râehapie honec‐jopaekopac,
ehame ʒâŋe mai‐jeŋic weaŋke‐fârekac?
7 Jei, dameŋ keci i dameŋ hâhâwicne,
iŋucne moc mi fowec,
i Jakobore ʒârâ hâriŋ dameŋ hâcne;
e ine sifu irecnec batarazo.”
8 Anutu Tâpiri Ɋuŋɋasaŋ Wofuŋ ere dâŋ ʒiŋuc: “Dameŋ ira kecʒiŋuc fuaocmu: No tagi ɋawe‐jeŋickonec jowac ro behec erâ niŋgiŋ‐jeŋic hetâcnepemu, eme jaŋe ŋic jabane jaŋere kiŋaŋ mocwâc mi qanʒepieŋ.
9 Aricne, jaŋe Wofuŋ Anutu‐jeŋic no mecne â ŋicwofuŋ‐jeŋic Dawidi âkendâŋne‐jarepemu e mecne mâmâc kiŋaŋ qanâctenʒepieŋ.
10 “Kiŋaŋŋic‐nane Jakobo go mi hâwicguzejec,
â Israe go mi fâfârezemec.
Manakic, no mâreŋ ʒorickonec bataracgupemu,
â ɋâricfâcge jaŋe kâpâcwâru mâreŋ‐jeŋickonec batarac‐jopapemu.
Eme Jakobozi mâreŋ‐ticnao risierâ sahac mâteŋ ŋezejec,
erâ juhâc qâhâmoha moczi moc hâhâwic mi ecnezejec.
Wofuŋ nore dâŋ iŋuc.
11 No hâcne baficguzore gohec jupemu;
ŋicne ŋicne ŋondeŋ‐jeŋicko bâtâtiecgupo jaŋe bâsirowec‐jopapemu,
go ine mi bâsirowecgupemu;
aricne, sâcge manahuc bâtiŋgupemu,
wemocko akicguhuc mi bâtiŋguzapo.
Wofuŋ nore dâŋ iŋuc.”
Israe e hehesic‐ticnere erâ sipirickeocmu
12 Wofuŋ e kecʒiŋuc mukac hâcne:
“Sipiricgukicne i hâhâwicne
â wic fogarekac i mi bâbâsomiene.
13 Moczi moc dâŋge mi dopeckeocmu,
wicgere marasiŋ i mi fokac,
â mocwâc ɋiɋic qacmu i wâc mi fokac.
14 Âgofâcge jaŋe sasawa gore nikec‐jopawec,
jaŋe gore mu wioc mocwâc mi eeŋgopieŋ;
i noni kiŋ bahacge â hehesicge bocjahare
râsi egarehuc qa bâtiŋ hâhâwicne egarepo irec.
15 Go sipiricgukicne â ʒâicge mi oomaene,
irec wemocte boc owackekomec?
No kiŋ bahacge â hehesicge bocjaha fokacte
wiac i egarepo hâcne.
16 Irec go ɋâcgumbiŋ jaŋe ɋâcjopa‐fârezo wâc,
go sipiricgumbiŋ sasawa jaŋe kâpâcwâruo bacjopa razo wâc;
mafa wiacge gowac rombiŋ jaŋe wiac‐jeŋic jowac rozo,
â wiac fiuc rombiŋ sasawa jaŋere wiac i mupe
fiuc roniŋmu jaha.
17 No mocwâc bâpiaŋguhuc wicge bâsomiepemu,
Wofuŋ nore dâŋ iŋuc.
Jaŋe gore ʒiŋuc mumbiŋte: ‘Qaisockekicne’,
erâ ‘Zioŋ hâcne hone suŋgiŋ ecnekicne.’ ”
18 Wofuŋzi ʒiŋuc mukac:
“Manaŋgopieŋ, no Jakobo qoruc boze‐ticne ŋehâmoocte mocwâc heɋârepemu,
â jufofo hae‐ticne busâqoc manacnepemu,
ehame hae i me i ŋeŋetac‐ticnao heɋârehuc banʒepieŋ,
â ŋicwofuŋ fic i mârâc ŋeweckoa ŋezejec.
19 Eme ira mumuteŋ gae â mu gâgâwi irec fânâŋ fuazejec;
no basawec‐jopape ʒare‐jeŋic mi wahazejec,
no ʒâŋe biŋe bâfua‐jarepe
moczi ro waha âte mocwâc mi ejarezejec.
20 Naru motecfâc‐jeŋic jaŋe mârâc jaha jumbiŋ
sâc ijaha erâ junʒepieŋ,
â kikefuŋfâc‐jeŋic jaŋe nore maio qiŋ herâ domanʒepieŋ;
bâbâʒâicfâc‐jeŋic jaŋe ine sasawa bâtiŋ‐jopapemu.
21 Ŋicbomboŋ‐jeŋic e jaŋacne guruonec moc fuazejec,
â guriŋ bapa‐jeŋic e jaŋacne ŋondeŋkonec jaha;
eme no manacnehape mai‐naneo ware fuazejec,
me mi manacnehape moczi moc juju‐ticnere manabâc mi ehuc
nore maio kosa moc fuazac?
22 Eme ŋoŋe ŋicfâc‐nane juhapie
no Anutu‐ŋeŋic juzepac. Wofuŋ nore dâŋ iŋuc.”
23 Manaŋgopieŋ, Wofuŋtaonec mâŋâŋ ɋicwânʒâŋnehec,
kimbeŋ‐ticne hâcne fuarâ warekac;
oorâŋ mânâŋ hâhâwicnezi
ŋic hehesicne jaŋere faio waha qaocmu.
24 Eme Wofuŋ e gie‐ticne mana biric ewec sâc
i fârine bâfua‐fâreme sawa kimbeŋ‐ticnere ʒocbâruŋzi hâpoocmu.
Ŋoŋe irec fuŋne i dameŋ tataranao mana taraniŋmu.