34
Jeremiazi Zedekia uŋdâŋ âzâcnekac
1 Babe ŋicwofuŋ Nebukaneza e momori gurufâc‐ticne ʒeŋgoma â mâreŋ sâc ŋicguru ere meo jufârembiŋ erâ ŋicguru gâcne sasawa jaŋehec Jerusalem â hae piticfâc‐ticne furu jaha somâc‐jopambiŋ dameŋ ira Wofuŋtaonec dâŋ Jeremiarao fuawec i kecʒiŋuc:
2 “Wofuŋ Israere Anutu e ʒiŋuc mukac: Go ra Juda ŋicwofuŋ Zedekia e dâŋ âzâcnerâ muc, Wofuŋzi ʒiŋuc mukac: ‘Manakic, no hae ʒi Babe ŋicwofuŋ ere meo râepe feme turuŋkeme ʒazejec.
3 Ehame go ere meonec waharâ sâcne mi wisecmu, aricne, jaŋe rojâmbâŋgurâ ere meo râecgupie fecmu, eme Babe ŋicwofuŋ ehec ʒâŋezi hohonec enicmu â miczi dâŋ nazaŋ gazaŋ enicmu, erâ irec faicnao Babe haeo razemec.’
4 Juda ŋicwofuŋ Zedekia go ine Wofuŋte dâŋ manac! Wofuŋ e gore ʒiŋuc mukac: ‘Go ʒikare nânâ mi ecmu.
5 Go wamao hâmozemec. Eme apa ŋosafâcge go mi fuarâ juhaŋtec mârâc jaha ŋicwofuŋ juwefumbiŋ jaŋe hâmopie hosâc âsu rike‐jare jumbieŋ iŋuc jaha go rike‐garerâ gore ʒiŋuc muhuc makuc baniŋmu: “Jai, bomboŋ‐nâŋec!” ’ No iŋuc eniŋte mupo hâcne. Wofuŋ nore dâŋ iŋuc.”
6 Eme porofete Jeremia e dâŋ i sasawa Juda ŋicwofuŋ Zedekia Jerusalem haeo âzâcne‐fârewec.
7 I Babe ŋicwofuŋ ere momorifâc jaŋe Jerusalem hae â Juda mâreŋte hae nâfocne ŋepic, Lakisa â Aʒeka hâcne biac somâ bacjofahapie iŋuc ewec; Judare hae basanaŋkekicne jaŋeraonec hae i jahe hâcne nâfocne ŋepic.
Kiŋaŋ qaqa jujure dâŋ
8 Ŋicwofuŋ Zekedia e kiŋaŋ qaqa rambaŋko rârâec‐jopa irec dâŋ moc mufua‐jareocte Jerusalem hae rune ʒeŋgoma jaŋehec ʒâʒâfic ewec; eme faicnao Wofuŋtaonec dâŋ Jeremiarao fuawec irec binaŋ ʒi.
9 Ʒiŋuc fuaocte ʒâʒâfic embiŋ: Ŋic sasawa jaŋe Hebiraio kiŋaŋŋic ŋokacfâc‐jeŋic firuec‐jopanʒepieŋ, ehame Judaŋic moczi Judaŋic qomâ‐ticne mocwâc ecneme kiŋaŋ qaqa‐ticne mi juzejec.
10 Eme ŋic fekicne mecne wahakicne mecne ʒâʒâfic embiŋ jaŋe sasawa dâŋ i mana rereŋ embiŋ, ehuc kiŋaŋŋic ŋokacfâc‐jeŋic jaŋe mocwâc mi bacjopapie jujareniŋte firuec‐jopambiŋ; ine hâcne jaŋe dâŋ mana rereŋ ehuc rambaŋ juniŋte firuec‐jopambiŋ.
11 Juku ʒâhec ine maŋjeŋic risieme kiŋaŋŋic ŋokac firuec‐jopambiŋ jaŋe mocwâc rocjoparâ bawahac‐jopahuc kiŋaŋ qaqa bacjopambiŋ.
12 Iŋuc epie Wofuŋte dâŋ Jeremiarao kecʒiŋuc fuawec:
13 “Wofuŋ Israere Anutu e ʒiŋuc mukac: No mimiŋnefâc‐ŋeŋic Aigita mâreŋkonec, kiŋaŋ qaqa jumbiŋkonec hâcne batarac‐joparâ kecʒiŋuc muhuc jaŋehec ʒâʒâfic epo,
14 ‘Ŋoŋeraonec moczi Hebiraio qomâ‐ticne furine bame kiŋaŋ qaqa‐ticne jukume jara 7‐ko firuezejec; e jara 6 sawa kiŋaŋ qaŋareme firuepie rambaŋ juzejec hâcne.’ Mimiŋnefâc‐ŋeŋic jaŋe ine dâŋnane mana rereŋ mi embiŋ, â dâŋnanere hazec‐jeŋic wâc mi râembiŋ.
15 Ŋoŋe ine maŋŋeŋic bârisierâ nore maio wiac tiŋkeekac i ehuc ŋic kiŋaŋ qaqahec sasawazi qomâfâc‐jeŋic firuec‐jopaniŋte dâŋne mumbiŋ. Ehuc nore ʒâŋe fokac fic ira mai‐naneo ʒâʒâfic embiŋ.
16 Ʒi ine maŋŋeŋic risieme ru sâc kiŋaŋŋic ŋokacfâc‐ŋeŋic rambaŋko juniŋte ejareme sâc firuec‐jopakicne jaŋe kiŋaŋ qaqa mocwâc bacjopaniŋte ʒoɋac erâ rocjopahuc ʒâŋe‐nane bâsâqorembiŋ.
17 Irec Wofuŋ no ʒiŋuc mukopac: Ŋoŋe dâŋnane mana rereŋ mi embiŋ, ehuc ru sâc qomâfâc‐ŋeŋic rambaŋko juju i mi bâfua‐jarembiŋte noni rambaŋ fuŋmoc mupe fua‐ŋarezejec; ine ʒika â huc hâmoc erâ roroczi ŋoŋerao niŋgiŋ tâmiric gie bazejec, Wofuŋ nore dâŋ iŋuc. Eme mupe mâreŋko ŋicne ŋicne jaŋe honec‐ŋoparâ bipic tatara ejarezejec.
18 “Â ʒâʒâfic‐nane hetâcnembiŋ erâ nore maio ʒâʒâfic embiŋ irec dâŋ mana rereŋ wâc mi embiŋ jaŋe bulimakao motecne hefâuckepie dâkâne jajahec eha ŋondeŋ‐jeŋicko fotâcnembiŋ irec sâc ejarepemu.
19 Ehuc Juda fekicnefâc‐ticne â Jerusalemte fekicnefâc, â ŋicwofuŋte soŋaŋ sâko, â taha bapa erâ mâreŋ irec ŋic ŋokac omane bulimakao hefâuckekicne irec ŋondeŋnao fotâcnembiŋ
20 jaŋe hâcne râsifâc‐jeŋic â juju‐jeŋic sipirickeniŋte muŋgopieŋ jaŋere meo râec‐jopape fenʒepieŋ, eme qâŋɋâŋfâc‐jeŋic i sawa wipe â kâte qowi jaŋere nânâ enʒepieŋ.
21 Eme Juda ŋicwofuŋ Zedekia â fekicnefâc‐ticne jaŋe iŋuc jaha râsifâc‐jeŋic â juju‐jeŋic sipirickeniŋte muŋgopieŋ jaŋere meo râec‐jopapemu, Babe ŋicwofuŋ momorifâc‐ticne behec‐joparâ rambiŋ jaŋere meo hâcne.
22 Manakic, no dâŋ mutâcne‐jarehuc ejarepe hae ʒira risienʒepieŋ; eme ʒika qaku ro rauc ehuc turuŋkepie ʒazejec. Ehame Judare hae ŋerakac i ima bape tuhutac fozejec. Wofuŋ nore dâŋ iŋuc.”