35
Rekaba kikefuŋ jaŋe micrereŋ bâfuambiŋ
1 Josiare ŋokâ Jojakim e Judare ŋicwofuŋ juhame Wofuŋtaonec dâŋ Jeremiarao fuawec i kecʒiŋuc:
2 “Go Rekaba kikefuŋ jaŋerao rarâ dâŋ jazahuc jowac‐jopatec Wofuŋ nore ufuŋko fic maŋne mocko fepie waiŋ opâ gumec‐jopazemec.”
3 Dâŋ iŋuc fua‐nareme no Habaziniare ŋosa, Jeremia mocte ŋokâ Jaʒania e mecne â hahac qafâcne â ŋokâfâcne mecne erâ Rekaba kikefuŋ furu jaha jaŋe mâmâc rocjopapo.
4 Rocjoparâ Wofuŋte ufuŋko Igedalia ere ŋokâ Hanaŋ, Anuture ŋic fârine hâcne, ere motecfâc jaŋere ficmaŋko râec‐jopapo. Ficmaŋ izi ine ŋic fekicne jaŋere ficmaŋ irec heririŋnao â Salumte ŋokâ Maseja, motâc soŋaŋ juwec ere ficmaŋ faicnao fowec.
5 Eme Rekaba kikefuŋkonec ŋic jaŋe waiŋ râqâc fusucmakicne â kap râe‐jarehuc jazapo: “Waiŋ opâ nâniŋ!”
6 Jaŋe ine mumbiŋ: “Nâŋe waiŋ opâ mi nâeŋgopeneŋ, i Rekaba ŋokâ‐ticne, mamac‐nâŋec Jonadaba eki hâcne ʒiŋuc mutâcne‐nârewecte, ‘Ŋoŋe waiŋ opâ moc mi nâhuc junʒepieŋ, ŋoŋe mecne â ɋâricfâc‐ŋeŋic fua rahuc juniŋmu jaŋe mecne.
7 Ŋoŋe fic moc mi banʒepieŋ, â wiac hândâŋne moc mi tienʒepieŋ, erâ waiŋ gie he sarac me ro rauc mi enʒepieŋ wâc; ŋoŋe ine qoruc bozeo ŋec foc erahuc junʒepieŋ, iŋuc ehuc mâreŋ jaba juŋgopieŋ ira dameŋ ʒora jufenʒepieŋ.’
8 Eme nâŋe mimiŋne‐nâŋec Jonadaba, Rekabare ŋokâ hâcne, e dâŋ mutâcne‐nârewec i mana rereŋ efârembeŋ, irec nâŋe mecne ŋokac naru motecfâc‐nâŋec jaŋe mecne waiŋ opâ moc mi nâeŋgopeneŋ.
9 Erâ fic wiac barâ maŋnao juju fofo ee i wâc mi eeŋgopeneŋ, â waiŋ gie me nânâ gie me wiac gâcne irec ukicne i wâc mi rauckerâ bajueŋgopeneŋ.
10 Nâŋe qoruc bozeo ŋeŋe juju ehuc mimiŋne‐nâŋec Jonadabazi dâŋ mutâcne‐nârewec sâc i mana rereŋ efârembeŋ hâcne.
11 Eme Babe ŋicwofuŋ Nebukaneza e mâreŋ ʒirec râsi fisime mumbeŋ, ‘Ajoc, Kaldea momorifâc‐jeŋic â Siria momorifâc‐jeŋic jaŋere hâhâwicte erâ Jerusalem haeo fenʒepeneŋ.’ Iŋuc murâ Jerusalem haeo wefumbeŋ juŋgopeneŋ hâcne.”
12 Eme Wofuŋte dâŋ Jeremiarao ʒiŋuc fuawec:
13 “Anutu Tâpiri Ɋuŋɋasaŋ Wofuŋ, Israere Anutu e kecʒiŋuc mukac: Go ra Judare ŋicfâc â Jerusalem hae rune ʒiŋuc jazac: Ŋoŋe bâbâtiŋ bâsuehuc dâŋnane mana rereŋ eniŋte takic‐ŋopakac me? Wofuŋ nore dâŋ iŋuc.
14 Rekabare ŋokâ Jonadaba e ɋâricfâcne jaŋe waiŋ opâ mi nâniŋte muac‐jopawec, eme jaŋe dâŋticne mi qatarambiŋ; ehuc waiŋ opâ moc mi nâhuc jumbiŋzi juŋgopieŋ jaha, i mimiŋne‐jeŋic ere sâcmutâc dâŋ reŋkeniŋte. No dâŋ ʒuʒuhuc jaha ŋazahuc jupo, ŋoŋe ine dâŋnane mi manambiŋ.
15 Eme no kiŋaŋŋicfâc‐nane sasawa, porofete hâcne mu qâmoc ʒiŋuc eŋareniŋte ʒuʒuhuc jaha ŋoŋerao sorec‐jopapo: ‘Ŋoŋe ru sâc maŋŋeŋic bârisierâ hata hehesic‐ŋeŋic behenʒepieŋ, ehuc eebapa biaŋne bâfuarâ nemu jaŋerao qohotahuc kiŋaŋ mi qajarenʒepieŋ; iŋuc epie ŋoŋe â mamacfâc‐ŋeŋic mâreŋ ŋarepo ira jusanaŋkeniŋmu.’ Ŋoŋe ine hazec‐ŋeŋic râehuc dâŋnane mi manambiŋ.
16 Jâmbomac, Rekabare ŋokâ Jonadaba ere ɋâricfâc jaŋe mimiŋne‐jeŋiczi sâcmutâc jarewec i mana rereŋ embiŋ; ŋicguru ʒi jaŋe ine nore dâŋ moc mi manambiŋ.
17 Irec Wofuŋ Anutu Tâpiri Ɋuŋɋasaŋ Wofuŋ, Israere Anutu hâcne, no kecʒiŋuc mukopac: Manaŋgopieŋ, no Judare ŋicfâc â Jerusalem hae rune sasawa jaŋere faio ʒârâ hâriŋ feocte uŋ sawaŋ ejarepo i mupe fârio qafâreocmu, i dâŋ jazape mi manambiŋte â wira‐jarepe okacne mi bâtikie‐narembiŋte.”
18 Rekaba kikefuŋ jaŋe ine Jeremiazi ʒiŋuc jazawec: “Anutu Tâpiri Ɋuŋɋasaŋ Wofuŋ, Israere Anutu eki kecʒiŋuc mukac: Ŋoŋe mimiŋne‐ŋeŋic Jonadaba ere sâcmutâc dâŋ manahuc mumutâc dâŋticne furu jaha mana rereŋ embiŋ â dâŋ mutâcne‐ŋarewec irec sâcko jâmbâŋ wiac ebac embiŋ.
19 Irec Anutu Tâpiri Ɋuŋɋasaŋ Wofuŋ, Israere Anutu no ʒiŋuc mukopac: Jonadaba, Rekabare ŋokâ hâcne, e dameŋ sâc ŋic moc nore maio kiŋaŋ qaqa gie baocte mi basa‐jâmbâŋkezejec.”