47
Filisa ŋic jaŋere findaŋdâŋ
1 Farao e ʒika qahuc Gaza hae ima mi bahame Filisa jaŋere biŋe Wofuŋte dâŋ porofete Jeremiarao fuawec ʒine hâcne.
2 Wofuŋzi kecʒiŋuc mukac:
“Manaŋgopieŋ, faic mâreŋkonec opâ sâko warehuc jukac,
fisirâ rumi iŋucne roma roma baocmu,
ehuc mâreŋ â fainao wiac forakac,
erâ hae maŋnao ŋec juc eeŋgopieŋ
jaŋe mâmâc qâuruc‐jopa‐fâreocmu.
Eme ŋic jaŋe owa bitaŋ enʒepieŋ,
â mâreŋ ŋecjufâc‐ticne jaŋe kio huse efârenʒepieŋ.
3 Becâsicfâc‐ticne jaŋere kike fânâŋ
â keretac â ʒafeŋgâŋnere fânâŋ irec erâ
mamac jaŋe naru motecfâc‐jeŋic honec‐jopaniŋte mi fotikieniŋmu,
bipic tatara ejareha maŋjeŋic gâckeme iŋuc eniŋmu.
4 I Filisa ŋic jaŋe sipiricke‐fâreniŋte
â Tiro â Sidoŋ jaŋere âgofâc nâfocne juŋgopieŋ
jaŋe wâc siroweniŋte dameŋne maickekacte iŋuc eniŋmu.
Wofuŋ noni hâcne Filisa ŋic,
Kafatori nuc irecnec ŋic ʒanʒaŋne sipiric‐jopapemu.
5 Gaza haezi makuc bakac,
â Asikaloŋ haezi niniŋkekac.
Anaka ŋic irec ʒanʒaŋne ŋoŋe sahac‐ŋeŋic
hetâcneeŋgopieŋ i wezimucko beheniŋmu?
6 Ŋoŋe muŋgopieŋ: ‘Jei, Wofuŋte ʒika
go wezimucko ŋemanacmu?
Go becsahacgao risierâ huc,
erâ niniŋkerâ fohuc juzemec!’
7 Mâc Wofuŋ noni giedâŋ mucnepore
wemocko ŋemanaocmu?
No hâcne Asikaloŋ hae â hâwec mâreŋ
ira ra râsi ejareocte mutâcnecnepo.”