48
Moabi mâreŋte findaŋdâŋ
1 Moabi mâreŋte dâŋ. Anutu Tâpiri Ɋuŋɋasaŋ Wofuŋ, Israere Anutu e ʒiŋuc mukac:
“Jei, Nebo hae i ima bakicne,
â Kiriataim hae i mimi qaqa ecnerâ rauckekicne.
Hae sanaŋ i qurutuawec
â heroc qâropiekicne.
2 Moabi ʒâŋe biŋe‐ticne omaewec.
Sisipiric fuacneocte râsi jaŋe Hesiboŋ haeo
dâŋticne mana biric ehuc ʒiŋuc muŋgopieŋ:
‘Ajoc, mâreŋ i imackenaŋ,
eme irec rune ŋicguru mocwâc mi junʒepieŋ!’
Eme Madameŋ haeo go iŋuc jaha bâniniŋguzo,
eme ʒikazi kikeo kikeo egarehuc bâjâpecguocmu.
3 “Mananiŋ! Horonaim haeonec kio owa ʒiŋuc fuarâ warekac,
‘Ima samaki â sisipiric sâko!’
4 Moabi i ima bakicne,
eme irec kio owa epie Zoari haeo ira manaŋgopieŋ.
5 Jei, Luhiti haeo kiohuc feŋgopieŋ,
jei, Horonaim heâŋko wahahuc sisipiricte erâ
kio owa epie dâŋ ʒiŋuc fuakac:
6 Wiseniŋ, juju‐ŋeŋic ŋezickeniŋ;
kâte doŋgi irec sâcko mâreŋ burocnao juniŋ!
7 Go ficsanaŋ ŋerakac â moneŋ mafa wiage fogarekac
irec manatec fewecte gowac rozo,
â Kemosi nemu e taha bapafâc‐ticne jaŋehec
kâpâcwâru ficko ranʒepieŋ.
8 Sisipiric ŋic e hae ŋerakac sâc fisi‐jareocmu,
hae moc mi akickeocmu;
ŋic opâ qacnerâ juraŋgopieŋ jaŋe omaeniŋmu
â wâneŋne wâneŋne jaŋe sisipiricte biŋe eniŋmu,
ine Wofuŋ noni mupo irec sâcko.
9 “Moabi fafakec râcnepie
furuc furuc qarâ wisezejec;
hae‐ticne ŋerakac i sesuctac fuarâ fozejec,
maŋnao ŋic mocwâc mi junʒepieŋ!
10 “Moc e Wofuŋte gie ʒoɋac tâmiric mâc bâpârâckeocmu e sâwecte biŋe ezejec, â ŋic moc e ʒika‐ticne soczi ruacnezacte aka hecneocmu e iŋuc jaha sâwecte biŋe ezejec.
Moabi ŋic okacne fisi‐jareocmu
11 “Moabi ŋic jaŋe juwicnaonecteaŋ
wama faio juwarembiŋ.
Ehuc moseŋ e mâreŋ ijaha sesuc‐ticne barâ ba eekac
irec sâc jaha jaŋe mâreŋ‐jeŋicko jurâ ju embiŋ,
ehame batac bawarec mi ejarekicne,
â kâpâcwâruo moc mi bacjopa rakicne.
Irec juju‐jeŋic aŋacnehec foweczi fokac,
â hosâc‐jeŋic mi omaewec.
12 “Irec manaŋgopieŋ, dameŋ moc maickeocmu ira ine gie bapa ŋic râec‐jopape fisi‐jarerâ rowaŋfic‐jeŋic heroc qâropieniŋmu â ʒocjeŋic hetâc qâtâtieniŋmu.
13 Iŋuc fuame Moabi ŋic jaŋe nemu‐jeŋicte mimierâ qurutuanʒepieŋ, ine Israe kikefuŋzi Bete haeo roweckehuc mimierâ qurutuawec irec sâc.
14 “Ŋoŋe wemo‐ŋeŋiczi ʒiŋuc muniŋmu:
‘Nâŋe ŋic qac momorihec â ʒikaŋic fârine?’
15 Ima bapazi Moabi mâreŋ â hae‐ticne sasawa fisi‐jareocmu,
ehame ŋicmotecfâc‐jeŋic sanaŋne jaŋe
ʒikare nânâ eniŋmu.
Wofuŋ Sâko, Anutu Tâpiri Ɋuŋɋasaŋ Wofuŋ
nore dâŋ iŋuc.
16 Moabi sisipiric dameŋ‐ticne bembeŋkekac,
â ʒârâ ʒâpâ‐ticne i biac jaha maickezo ekac.
17 Râreckehuc ŋec juc eeŋgopieŋ
â ʒâŋe‐ticne manaeŋgopieŋ ŋoŋe sasawa busâqoc manacneniŋ,
ehuc muniŋ: ‘Ŋicwofuŋ gunu sanaŋ biaŋ
i weniŋmu erâ hericke ʒaŋ ewec’?
18 “Diboŋ hae rune,
ŋoŋe popoonec waharâ rufe faio ŋeniŋ,
Moabi mâreŋte ima bapazi fisi‐ŋarerâ
ficsanaŋ‐ŋeŋic heroc qâropieocmu hâcne.
19 Aroe haere ŋecjucfâc,
ŋoŋe hatamecko ra ʒâŋe fipie raoc!
Ehuc ŋic ŋokac wisehuc juŋgopieŋ
jaŋe wio‐jarehuc muniŋ, ‘Wemo wiac moc fuawec?’
20 Moabi e qurutuawec, maŋticne omaewec hâcne;
kio huse â kio owa eniŋ!
Ehuc Moabi ima bakicne
i Aronoŋ opâo fisirâ mufuaniŋ.
21 “Mareŋ wâneŋ sâko i okacne fisicnewec, hae kecʒiŋuc jaŋe fisi‐jarewec hâcne: Holoŋ, Jaza â Mefata,
22 erâ Diboŋ â Nebo â Bete‐Dibilataim,
23 erâ Kiriataim â Bete‐Gamulu â Bete‐Meoŋ,
24 erâ Kerioti â Bozera erâ Moabi mâreŋko hae sâko gâcne sasawa, bembeŋko me ʒoricko ŋeraŋgopieŋ jaŋe mâmâc.
25 Moabi tâpiri‐ticne bawahakicne â mene qazukicne, Wofuŋ nore dâŋ iŋuc.
Moabi ŋic jaŋe Israe mu gâgâwi ecnepie sâqorewec
26 “Opâ sanaŋ gumepie maŋne sifuckezejec, e Wofuŋ râsi ecnehuc sahac fefe boc ewec irec. Moabi e waha qarâ e jahacne mamaŋu ruame ŋic jaŋe honerâ mu gâgâwi ecnenʒepieŋ.
27 Me goki Israe mu gâgâwi mi ecnehuc jumeŋ me? E fiuc roro jaŋere ŋondeŋko moc bâfuakicne, irec ere dâŋ mu bâuac ehuc qizec fofotaric ecnehuc jumeŋ me?
28 “O Moabi mâreŋte ŋecjucfâc,
ŋoŋe hae sâko beherâ qânâ hawecko juniŋ me!
Ŋoŋe sâro fozic wipe jaŋe hârâc mecko
sareŋ‐jeŋic baeŋgopieŋ irec sâc eniŋ!
29 Nâŋe Moabi sahac fefe‐ticnere manambeŋ,
sahac fefe‐ticne i hâhâwicne.
E pepec ʒâŋehec, penaroŋhec,
pepec sâkohec â maŋfefehec.
30 Wofuŋ no pepec penaroŋ‐ticne manakopac;
jawadâŋ‐ticne i racne â eebapa‐ticne i wiac fârine aricne.
31 No irec hâcne Moabi jaŋere erâ
kio huse ekopac,
Moabi sasawa jaŋere erâ kio owa ekopac,
â Kiri‐Heresi ŋic jaŋere erâ makuc bakopac.
32 O Sibemanec waiŋ qizec, no gore erâ kiokopac
i Jazere haere kiombiŋ irec sâc sawa mâcne,
fehuc kiokopac hâcne.
Qaŋeŋfâcge jaŋe hâwec fotâcnerâ
haŋ baraku Jazere haeo fisimbiŋ.
Sisipiric ŋic eki ine ro nusec dameŋko fisirâ
nânâ wiacge â waiŋ hândâŋge imackewec.
33 Bubiaŋ â ʒeri i mâreŋ guec‐ticnehec
â Moabi mâreŋ ira arictac ewec;
noni mupe oto sâko ŋerakac ira waiŋzi omaezejec,
waiŋ bapazi waiŋ hândâŋne aŋara hehuc
mocwâc mi âte pisickeniŋmu,
aŋara heniŋmu i aŋara fârine aricne.
Moabi qa sipiric ecneniŋmu
34 “Hesiboŋ â Eleale rune kio owa‐jeŋicte fânâŋ i raku Jahazi ira fisikac; jaŋe marac fânâŋ‐jeŋic bafaharepie Zoarionec Horonaim â Egela‐Selisia fisikac, i Nimirim opâzi ʒicke kereŋ ekac wâc.
35 No Moabi ira bâzi ririkere tikio ferâ nemu‐jeŋic hosâc âsu rikecneeŋgopieŋ jaŋe hâcne omaec‐jopapemu, Wofuŋ nore dâŋ iŋuc.
36 Irec maŋnanezi Moabi mâreŋte erâ ŋafe wipe iŋucne dâŋehuc kio huse ekac, â Kiri‐Heresi ŋic jaŋere erâ maŋnanezi ŋafe wipe iŋucne dâŋehuc kio huse ekac; i huhure wiac‐jeŋic sipirickewecte.
37 “Qizec â mecʒâwâ‐jeŋic i bâtâcne‐fârekicne; mesahac‐jeŋic sasawa hetâcnekicne â mateŋ qonaŋkepie waha domakac.
38 Moabi mâreŋte ficbupu sâc wâwâneŋ bakicne irec faio â hae ʒoŋa sâc ira ki mamakuc fua‐fârekac; i noni Moabi mâreŋ kuʒi qaisockehuc qanʒaŋnekicne irec sâc qanʒaŋnepo, Wofuŋ nore dâŋ iŋuc.
39 Jei, qanʒaŋnekicne i sâc moc, â kio huse eeŋgopieŋ i sâc moc! Jei, Moabi e fotikierâ mimiehuc wisekac i sâc moc! Ehame râreckehuc ŋec juc eeŋgopieŋzi nifepupu ecneeŋgopieŋ, ehuc ere manapie bipic tataranehec ekac.”
40 Wofuŋ no ʒiŋuc mukopac hâcne:
“Manaŋgopieŋ, moczi tucwipe iŋucne Moabi râsi fisicnerâ
fakecne qaratiehuc sâocke‐fâreocmu.
41 Ehame hae ŋerakac i ro rauc eniŋmu
â ficsanaŋ wiac i sakareniŋmu.
Dameŋ ira Moabi qac momorifâc‐ticne jaŋere maŋ
i ŋokac moc motec roocte gozi kime
maŋne gâckeekac irec sâc eocmu.
42 Moabi qa sipiric ecnepie
ŋicguru mocwâc mi juocmu,
e Wofuŋ no fenarehuc penaroŋ ewec irec.
43 O Moabi ŋecjucfâc,
ŋoŋe hâhâwic â nombâŋ â wiwitic wiac
izi maic‐ŋopazejec, Wofuŋ nore dâŋ iŋuc.
44 Eme moc e wiac hâhâwicne wisecneocmu
e nombâŋko huzejec,
â moc e nombâŋkonec wefuocmuczi
wiwiticko ferâ kizejec.
No Moabi rune jaŋere faio wiac i hâcne
okac babazu dameŋ‐jeŋicko râepe feocmu,
Wofuŋ nore dâŋ iŋuc.
45 “Ŋic wiseniŋmu jaŋe betaŋkerâ
Hesiboŋ haere mumucko domaniŋmu;
Hesiboŋ haeonec ine ʒoc
â Sihoŋte fickonec ʒocbâruŋ fuarâ
Moabi ŋic ojowa qaŋgopieŋ jaŋere qizec ʒâseŋkeocmu.
46 Jei, Moabi rune!
Kemosi nemu ŋicfâc‐ticne ŋoŋe sipiric‐ŋopakicne;
naru motecfâc‐ŋeŋic jaŋe rocjoparâ
kâpâcwâruo bacjopa rakicne hâcne.
47 No ine dameŋ tataranao Moabi kâpâcwâruo juju‐ticne
i mupe arictac eocmu.”
Wofuŋzi Moabi mâreŋte okacdâŋ muwec i ʒira tarakac hâcne.