49
Amoŋŋic jaŋere findaŋdâŋ
1 Amoŋŋic jaŋere dâŋ. Wofuŋzi kecʒiŋuc mukac:
“Israe e ŋokâfâcne moc mi jucneŋgopieŋ me?
Me merâfâc‐ticne rauckeniŋte
irec ŋic wâc arictac me?
Eme Milikom nemu e Gade mâreŋ wemocte rauckewec,
â ŋicfâcne jaŋe wemocte hae sâko‐ticne
ŋerakac irec maŋnao ŋec juc eeŋgopieŋ?
2 Irec mananiŋ: Dameŋ moc maickeocmu
ira Amoŋŋic jaŋere hae sâko Raba irec mupe
ʒikare ojowa fuacnezejec;
eme hae i sesuctac fuarâ foha
hae piticfâc‐ticne ʒoczi ʒâseŋ‐jopazejec.
Eme Israe e mâreŋ‐ticne jâoc rombiŋ
i mocwâc jowac rozejec, Wofuŋ nore dâŋ iŋuc.
3 “O Hesiboŋ hae, go ima bapazi fisi‐garekacte
kio owa ezemec;
Rabare otâfâc ŋoŋe wira wâwâsic enʒepieŋ,
ŋoŋe mateŋ qonaŋkehuc ki mamakuc eniŋ,
ehuc ŋaŋaczia sahac‐ŋeŋic hetâc qâtâcneniŋ!
Milikom nemu e taha bapafâc‐ticne
â fekicnefâc‐ticne jaŋehec kâpâcwâru ficko raniŋmu hâcne.
4 Naru maŋrâŋgeŋne micrereŋ tâmiric
go mâriri rowaŋgao roweckehuc
wemocte opâwâcgere penaroŋ boc ekomec,
ehuc mukomec, ‘Mozi sâcne sanaŋke‐nareocmu?’
5 Manakic, no mupe rârecguhuc jueŋgopieŋ
jaŋeraonec wiac hâhâwicnezi fua‐garezejec,
Anutu Tâpiri Ɋuŋɋasaŋ Wofuŋ nore dâŋ iŋuc.
Eme ŋoŋe ru sâc bâtâtiec‐ŋopazo,
ehame wiseniŋmu jaŋe moczi moc mi hetumaŋ‐jopaocmu.
6 Eme juku ʒâhec ine Amoŋŋic kâpâcwâruo juju‐jeŋic
i mupe arictac eocmu, Wofuŋ nore dâŋ iŋuc.”
Edomŋic jaŋere findaŋdâŋ
7 Edomŋic jaŋere dâŋ. Anutu Tâpiri Ɋuŋɋasaŋ Wofuŋ e kecʒiŋuc mukac:
“Temaŋ hae mâreŋko maŋɋârâŋ arictac efârewec me?
Fuŋne mamana jaŋe mamana‐jeŋic omaewec
â maŋɋârâŋ‐jeŋic sifuckewec me?
8 O Dedaŋ mâreŋ rune,
ŋoŋe ʒirecnec wiserâ ra soŋkepaŋkeniŋ!
No Esau, Edom hâcne sisipiric‐ticne,
okac dameŋ‐ticne hâcne i fainao râepe feocmu irec.
9 Waiŋ hândâŋne bâtâcneeŋgopieŋ ŋic i jaŋe
fisi‐garerâ hândâŋ nâfocne mi behepie foocmu,
ŋafeo fiuc roro jaŋe fisirâ ejareme sâc roniŋmu.
10 No hâcne Esau wiac‐ticne jâoc rofârekopac,
â haesoŋ‐ticne ŋerakac i bataniŋke‐fârekopac,
irec soŋkeocte eipiekac.
Naru motecfâcne mecne,
qomâfâc‐ticne â diguracfâc‐ticne jaŋe mâmâc
jopa sipiric ejarekicne, eme arictac ewec.
11 Bekâfâcge behec‐jopatec noni hone maiŋ ejarezepac,
â hozecfâcge jaŋe norao roweckenʒepieŋ.”
12 Wofuŋzi ʒiŋuc mukac: “Manakic, opâ ʒaʒacne nânâ irec sâc mi jumbiŋzi sifu nâjâmbâŋkeniŋmuo ine go wemocko bâbâtiŋ tâmiric mâc jufecmu? Aricne, go bâbâtiŋ tâmiric moc mi juhuc opâ ʒaʒacne nâjâmbâŋkezemec jaha.
13 No nahacne ʒâŋeo ɋetickehuc mupaŋkepo; ŋic gâcnezi Bozera haere qâqiŋ qahuc mu hâhâwic â mimi busâqoc â sâwecdâŋ munʒepieŋ, ehame hae piticfâc‐ticne sasawa jaŋe sesuctac fuarâ fonʒepieŋ sanaŋ. Wofuŋ nore dâŋ iŋuc.”
14 Eme Jeremiazi muwec:
No Wofuŋtaonec biŋedâŋ moc manapo,
ehame ŋicne ŋicŋe jaŋerao kiŋaŋŋic moc ʒiŋuc muocte sorewec:
“Ŋoŋe qâturerâ Edom râsi fisicneniŋ,
ʒikare fahareniŋ!
15 Manakic, ŋicne ŋicne jaŋere ŋondeŋko
bawahacgupe qaisocgunʒepieŋ.
16 Ŋic gâcne jaŋe gore hâwic‐jopame
honec‐joparâ maŋge sifuckeme maŋfefe emeŋ,
haroŋaŋ hawecko me tiki botâŋko
jukomec go hâcne.
Go tucwipe iŋucne sareŋge hahaŋko jâmbâŋ batecne
no sifu irecnec tuŋgupe huzemec,
Wofuŋ nore dâŋ iŋuc.
17 “Edom e niniŋ siarereŋ fuarâ foha ŋic sasawa jâuruniŋmu jaŋe bipic tatara ejareocmu, â qa bâtiŋ ecnekicne irec mu ruruc ecneniŋmu.
18 Ine Sodom â Gomora â hae gâcne rârec‐jofahuc ŋerambiŋ jaŋe sisipiric fua‐jarewec irec sâc jaha fuacneme ŋiczi ira ŋec juc mocwâc mi enʒepieŋ, â hae maŋnao jaba juju i wâc mi fuazejec, Wofuŋ nore dâŋ iŋuc.
19 Manakic, laioŋ e Jordaŋ uupickonec wefurâ lama jaŋere sapao fisiekac irec sâc jaha ututuŋ jâpec‐jopape wisenʒepieŋ; ehame ŋic moc biac bâwosâekicne e irec soŋaŋ juocte mucnepemu. Me no iŋucne mozi moc jukac? Me mozi moc dâŋgieo râecnuocmu? Me mo soŋaŋzi nore maio sanaŋkerâ domaocmu?
20 Irec Wofuŋ no Edom mâreŋte dâŋ mupaŋkepo i mecne â Temaŋ mâreŋ rune jaŋere dâŋ mana biric epo i mâmâc mananiŋ: Jei, lama wahakicne jaŋe wâc mâmâc bawisec‐jopaniŋmu. Jâmbomac, wiac fua‐jareocmu irec erâ sapa‐jeŋic weaŋkerâ foocmu.
21 Jaŋe rândiŋkerâ jopame fânâŋ sâko fuame mâreŋzi ɋiɋiteckeocmu, ehame kio owa‐jeŋic i Hâwec Bâbâroŋko mananiŋmu.
22 Manakic, moczi tucwipe iŋucne faharerâ furuc furuc qahuc Bozera hae râsi fisicnerâ fafakecne qaratiehuc sâockeocmu. Dameŋ ira Edom qac momorifâc‐ticne jaŋere maŋ i ŋokac moc gozi kime maŋne omaeekac irec sâc eocmu.”
Damasko haere findaŋdâŋ
23 Damasko irec dâŋ.
“Hamati â Arapada hae rune jaŋe
biŋe bâroŋ moc manambiŋte qurutuambiŋ.
Mana mezac ehapie maŋjeŋic omaekac,
maŋwama bâfuaniŋte eipieŋgopieŋ.
24 Damasko hae rune jaŋe maŋjeŋic betaŋkeme
wiseniŋte fotikiembiŋ,
jaŋe ɋarac ɋarac qaŋgopieŋ;
ehame ŋokac gozi kime hâwickeha
ʒâic manaekac irec sâc ejarekac.
25 Jei, hae ʒâŋe biŋehec â ʒeri‐ticnehec
i sesuctac jâmbâŋ fuarâ fokac i!
26 Irec ŋicmotecfâc‐ticne jaŋe hae ʒoŋa‐ticnao hâmoniŋmu,
â ʒikaŋicfâc‐ticne jaŋe ʒoaŋ ira sipiricke‐fâreniŋmu;
Anutu Tâpiri Ɋuŋɋasaŋ Wofuŋ nore dâŋ iŋuc.
27 Eme no Damasko haere sac turuŋkepe ʒaocmu,
ehame Beŋhada erific wiac‐ticne ʒâseŋkezejec.”
Kedara â Hazoro irec findaŋdâŋ
28 Kedara mâreŋ rune â Hazoro hae irec ŋicguru ŋicwofuŋ‐jeŋichec Babe ŋicwofuŋ Nebukanezazi jopawec jaŋere dâŋ.
Wofuŋzi ʒiŋuc mukac:
“Ajoc, ŋoŋe Kedara mâreŋ râsi ecnehuc ira ranʒepieŋ,
ehuc ʒoaŋ wewefunaonec ŋic jopanʒepieŋ!
29 Qoruc boze‐jeŋic â lamafâc‐jeŋic jowac rozo,
bilaŋke â wâcwiac‐jeŋic gâcne mâmâc;
kamelefâc‐jeŋic bacjopa razo,
ehame ŋic ʒiŋuc mu ojowa ejarenʒepieŋ:
‘Rârec rârec wiac hâhâwicne fofârekac i!’
30 Hazoro rune, ŋoŋe wiseniŋ,
Babe ŋicwofuŋ Nebukaneza e wiac repicne eŋarezo maŋkekacte
â sipiric‐ŋopaocte dâŋne manasu biric ekacte
bâruŋ jaha ra tâmirerâ soŋkepaŋkeniŋ me!
Wofuŋ nore dâŋ iŋuc.
31 “Ajoc, ŋoŋe faharerâ ŋicguru mana mezac tâmiric
wama faio jueŋgopieŋ jaŋe râsi fisi‐jareniŋ;
jaŋe hae‐jeŋicte motâc babasanaŋ‐ticne aricne,
bucjeŋic juŋgopieŋ hâcne,
Wofuŋ nore dâŋ iŋuc.
32 Kamelefâc‐jeŋic jowac ronʒepieŋ,
â hae qowifâc‐jeŋic guru sâko i ŋoŋere biŋe ezejec.
Noni ine qizec susuc‐jeŋic naki ŋifec â ŋifec bâtâcneeŋgopieŋ
ŋic i jaŋe hâcne mâreŋ sâc bâtâtiec‐jopapemu,
erâ mupe rârec rârec irecnec sisipiriczi maic‐jopazejec,
Wofuŋ nore dâŋ iŋuc.
33 Eme Hazoro hae i kâte qâto jaŋere ŋeŋe hae ezejec,
ehuc sesuctac fohuc juzejec sanaŋ.
Ehame moczi moc ira ŋec juc mocwâc mi ezejec,
â ŋic moczi maŋnao ju fofo wâc mi ezejec.”
Elamŋic jaŋere findaŋdâŋ
34 Juda ŋicwofuŋ Zedekia e ŋicwofuŋ gie‐ticne fuŋkerâ juha Elamŋic jaŋere dâŋ Wofuŋtaonec porofete Jeremiarao fuawec ine ʒiŋuc:
35 Anutu Tâpiri Ɋuŋɋasaŋ Wofuŋ e kecʒiŋuc mukac: “Manakic, no Elamŋic tâpiri‐jeŋicte ŋesiŋ, tepe‐jeŋic hâcne i bazu‐jarepemu.
36 Ehuc mupe mâreŋ tuturuŋne 4 irecnec mâŋâŋ 4 jaŋe fisirâ Elamŋic jopapie faic â juwic, ŋifec â ŋifec rafârenʒepieŋ. Erâ Elamŋic qâtâtiec‐jopakicne jaŋe ŋicguru juraŋgopieŋ sasawa jaŋerao sâckerâ fisiniŋmu.
37 Râsi ejarehuc juju‐jeŋic sipirickezo muŋgopieŋ jaŋere maio ejarepe maŋjeŋic gâckezejec; ehame sisipiric, maŋnanere ʒocbâruŋ hâcne, i fai‐jeŋicko râepe fezejec, â mupe ʒikazi bâjâpec‐jopa rahuc nâmiziec‐jopazejec, Wofuŋ nore dâŋ iŋuc.
38 No dâŋ mumutara ŋeŋe‐nane Elam mâreŋko hepe ŋezejec, erâ ŋicwofuŋ‐jeŋic mecne, fekicnefâc‐jeŋic mecne mâmâc bâsirowec‐jopazepac.
39 Dameŋ tataranao ine Elamte faio wiac hâhâwicne râepe fewec i bârâriezepac, Wofuŋ nore dâŋ iŋuc.”