50
Babe haere findaŋdâŋ
1 Wofuŋ e Babe hae â Kaldea mâreŋte dâŋ porofete Jeremia ere micko râeme mufuawec i kecʒiŋuc:
2 “Ŋicne ŋicne jaŋere ŋondeŋko dâŋ binaŋ ʒiŋuc ejarepie mananʒepieŋ,
ehame filac fârepie fezejec!
Dâŋ moc mi hesoŋkehuc musaweniŋ:
‘Babe hae i ro rauc ekicne,
Beli nemuzi qurutuawec,
â Merodac nemu e henʒaŋ qanʒaŋnekicne;
nemuɋâŋfâc‐jeŋic jaŋe qurutuambiŋ,
â ɋâŋ qâqâtâcfâc‐jeŋic henʒaŋ qanʒaŋ‐jopakicne.’
3 “Faic mâreŋkonec hâcne ŋicguru moc jaŋe râsi fisi‐jarerâ mâreŋ‐jeŋic ima baniŋmu, eme ŋic moczi moc ira ŋec juc mocwâc mi ezejec, aricne, ŋic mecne qowi mecne irecnec wiserâ ratâmirenʒepieŋ.”
4 Wofuŋzi ʒiŋuc mukac: “Dameŋ ira Israe ŋic â Judaŋic jaŋe mâmâc jaha kiohuc ware fisiniŋmu, ehuc Wofuŋ Anutu‐jeŋic no wira basac enareniŋmu.
5 Jaŋe Zioŋ hatare mu wioc eniŋmu, ehuc irapec ʒâŋe fihuc muniŋmu: ‘Ajoc, nâŋâc Wofuŋtao qohotarâ ʒâʒâfic fofo sanaŋ moc enʒepeneŋ, eme irec ninikec moc mi fua‐jâmbâŋkezejec.’
6 “Ŋicfâc‐nane jaŋe lama sifuckekicne iŋucne; soŋaŋfâc‐jeŋic jaŋe eatuc‐jopapie qac qâsoric embiŋ, jaŋe ejarepie tiki mâreŋko rac warec ehuc jumbiŋ, ehuc mâreŋ tikine facne bazu behec eku sapa‐jeŋicte nikec‐jopawec.
7 Eme bâfuac‐jopambiŋ sâc jaŋe nâcjopambiŋ, â kisâfâc‐jeŋic jaŋe mumbiŋ, ‘Nâŋe kiŋ mi hotâckeŋgopeneŋ, jaŋe Wofuŋ sapa‐jeŋic fârine, mamacfâc‐jeŋic jaŋe worickehuc jumbiŋ e hâcne bunao bambiŋ irec.’
8 “Ajoc, ŋoŋe Babe haeonec wiseniŋ, Kaldea ŋic jaŋere mâreŋ beheniŋ, ehuc lama ŋicne jaŋe gurufâc‐jeŋic bânie‐jareeŋgopieŋ irec sâc eniŋ.
9 Manaŋgopieŋ, no faic mâreŋkonec ŋicne ŋicne guru sâko mu qafeŋ ejarepe Babe hae râsi fisicnenʒepieŋ, ehuc meo roroc erâ sanaŋkehuc rauckenʒepieŋ, tepe motec‐jeŋic ine ʒikaŋic fârinezi metariŋ mi risieekac e iŋucne.
10 Iŋuc fuame Kaldea mâreŋ i ʒikare mateŋ eocmu, eme mateŋ roniŋmu jaŋe sâcjopa‐fârezejec, Wofuŋ nore dâŋ iŋuc.
11 “Oi, nore mâreŋkonec wiac fiuc rombiŋ
ŋoŋe bubiaŋ manazo murâ mananiŋ,
â ʒeri ezo murâ eniŋ,
ehuc bulimakao motecne kecɋaŋ geunao
kiwac qawac eeŋgopieŋ iŋuc eniŋ,
â becâsic ŋicnezi dâŋsâko dâŋeekac iŋuc dâŋeniŋ!
12 Neŋgoc‐ŋeŋiczi ine qurutua‐jâmbâŋkeocmu
â rocŋopawec e mimieocmu;
jâmbomac, e ŋicne ŋicne jaŋere wahamicne ehuc
mâreŋ burocne â kereŋne â sawane iŋucne ezejec.
13 I Wofuŋ kimbeŋ‐nanere erâ tuhutac fuame
niniŋ siarereŋ fojâmbâŋkeocmu;
eme Babe hae jâuruniŋmu sâc jaŋe bipic tatara ejareocmu,
â ʒârâ ʒâpâ‐ticnere mu ruruc ecneniŋmu.
14 Tepeŋic sasawa ŋoŋe Babe hae somâ baniŋ,
jaŋe sâqocne bahuc Wofuŋ bunaneo bambiŋte
tepe qâtâcnepie haeo feoc,
tepe motec moc mi sakareniŋ!
15 Rârec rârec ʒiŋuc muhuc aŋara heniŋ:
E dockewec, wâtuŋ‐ticne rândiŋke qawec,
qânâsac‐ticne heroc qâropiekicne.
Wofuŋ nore okac babazu dameŋ fuakacte
okacne bazucneniŋ;
eki wiac ewec sâc ijaha ecnenʒepieŋ.
16 Wiac hândâŋne tieeŋgopieŋ jaŋe mecne
â qa roro dameŋko sâqe mictarazi gie baeŋgopieŋ
jaŋe mâmâc bâsirowec‐jopaniŋ!
Eme ŋic gâcne jaŋe ru sâc ʒikazi hâmoc bâfuaekac
i hâhâwic bacnerâ guru‐jeŋicko risieniŋmu,
â ru sâc jaha mâreŋ‐jeŋicko wiserâ raniŋmu.
Israe e juju‐ticnao risieocmu
17 “Israe kikefuŋ e lama moc laioŋ jaŋe jâpepie qac qâsoric eekac irec sâc; e qanaŋ Asiria ŋicwofuŋte nânâ ewec, izi ʒâhec ine Babe ŋicwofuŋ Nebukaneza eki siec‐ticne kinʒaŋnewec.
18 Irec Anutu Tâpiri Ɋuŋɋasaŋ Wofuŋ, Israere Anutu no ʒiŋuc mukopac: Manakic, no Asiria ŋicwofuŋ okac bazucnepo irec sâc jaha Babe ŋicwofuŋ â mâreŋ‐ticne ejactepemu.
19 Erâ Israe e juju‐ticnao bârisiepe Karamele tikio â Basaŋ mâreŋko nânâ nâhuc juzejec, erâ Eferaim tiki mâreŋko â Gileade ira wâc nâku gapeckezejec.
20 Dameŋ ira Israe kiŋticnere mu wioc ehuc sifu mi bâfuaniŋmu. Ehame Juda sâqocne‐ticne wâc basaniŋmu, no ŋic nâfocne juniŋte mana‐jarepemu jaŋe sâqocne bâtâmire‐jarepemu irec. Wofuŋ nore dâŋ iŋuc.
Babe mâreŋ okac babazu dameŋ‐ticne maickewec
21 “Go Merataim mâreŋ râsi ecnehuc ira razemec,
erâ Pekodo ŋecjucfâc‐ticne jaŋe wâc râsi fisi‐jarezemec.
Ehuc joparâ bâsirowec‐jopa‐fârezemec,
â dâŋ gaza mutâc epo i efârezemec.
Wofuŋ nore dâŋ iŋuc.
22 Mâreŋ‐jeŋicko ʒikare ojowa
â sisipiric sâko fuawec fokac.
23 Jei, mâreŋ sâko mâreŋ irec hama sâko
i hefâuckekicne â qanʒaŋnekicne i!
Jei, Babe hae e ŋicne ŋicne jaŋe honepie
wiac bipic tataranehec ewec i!
24 O Babe hae, no bitiŋ râe‐garepo,
eme go qicqucne juhuc ferâ mi kicguzejec i!
Go Wofuŋ no râsi enaremeŋte
bâfuacgurâ rocgupo.
25 Wofuŋ no ʒika rowaŋ‐nanere motâc rorâ
kimbeŋ‐nanere sându maro rope wahakac;
ine hâcne, Anutu Tâpiri Ɋuŋɋasaŋ Wofuŋ
nore gie Kaldea ŋic jaŋere mâreŋko fuakac.
26 Mâreŋ tuturuŋne sâc irecnec râsi fisicneniŋ â!
Padi jacgoŋ rowaŋfic‐ticne baandaŋkeniŋ,
ehuc padi iŋucne ro guruc ecnerâ ʒoczi rikepie
wiac nâfocne moc mi fozejec.
27 Bulimakaofâc‐ticne ŋicne qâhâmoc‐jopa‐fâreniŋ,
hezuc‐jopaniŋte bacjopa raniŋ!
Jei, dameŋ‐jeŋic maickekac,
okacne babazu‐jare dameŋ hâcne!
28 “Mananiŋ! Babe mâreŋ beherâ wiseŋgopieŋzi mu ojowa eŋgopieŋ. Jaŋe Wofuŋ Anutu‐nâŋeczi okac babazu gie bawec, taha ufuŋ‐ticnere okac babazu gie hâcne, irec biŋe Zioŋko musokaniŋte iŋuc eŋgopieŋ.
29 “Tepeŋiczi tepe tikokoc herâ qâtâcneeŋgopieŋ jaŋe Babe hae râsi ecneniŋte hetumaŋ‐jopa‐fâreniŋ! Eme ra somâ bahapie ŋic moczi moc mi wisezejec. E Wofuŋ Israere Tiri rune no pepec penaroŋ enarewecte eebapa‐ticnere sâcko okacne bazucneniŋ, ehuc wiac eŋarehuc juwec irec sâc jaha ecnenʒepieŋ.
30 Irec ŋicmotecfâc‐ticne jaŋe hae ʒoŋa‐ticnao ʒikare nânâ enʒepieŋ, â momorifâc‐ticne jaŋe ʒoaŋ ira sipiricke‐fârenʒepieŋ, Wofuŋ nore dâŋ iŋuc.
31 “Manakic, pepec penaroŋhec go hâcne râsi egarepemu,
Anutu Tâpiri Ɋuŋɋasaŋ Wofuŋ nore dâŋ iŋuc.
No okacne bazu‐garepemurâ
dameŋge maikekac hâcne.
32 Pepec penaroŋhec e dameŋ ira fâfâckeme waha qame
moczi mocwâc mi bafaharezejec.
Eme no hae‐ticne ŋerakac i turuŋkepe ʒazejec,
ehuc rârec rârec wiac forakac i ʒâseŋke‐fârezejec.”
33 Anutu Tâpiri Ɋuŋɋasaŋ Wofuŋ e kecʒiŋuc mukac: “Israe ŋic mecne â Judaŋic mecne jaŋe mâmâc jaha fific bacjopakicne. Eme kâpâcwâru ficko bacjopa rambiŋ jaŋe sasawa sakarec‐jopahuc firuec‐jopaniŋte takic‐jopakac.
34 Fifirue‐jeŋic ʒâŋene Anutu Tâpiri Ɋuŋɋasaŋ Wofuŋ e ine sanaŋne. Eki hâcne dâŋjeŋic dopecke‐jâmbâŋkehuc bafic‐jopame mâreŋko wama fuazejec, Babe ŋecjucfâc‐ticne jaŋe ine ejareme sisi hâhâŋ faio junʒepieŋ.
35 “Kaldea ŋic mecne, Babe ŋecjucfâc‐ticne mecne,
fekicnefâc‐ticne mecne erâ ŋicfâc‐ticne mamanahec
jaŋere faio ʒikazi fezejec,
Wofuŋ nore dâŋ iŋuc.
36 Faŋfaŋdâŋ mumu jaŋere faio ʒikazi feme
ŋic mutucne enʒepieŋ.
Qac momorifâcne jaŋere faio ʒikazi feme
maŋjeŋic omaezejec.
37 Becâsicfâc‐jeŋic â keretac‐jeŋic
erâ ŋondeŋ‐jeŋicko ŋic sahac hawari fuŋne fuŋnehec juŋgopieŋ
jaŋere faio ʒikazi feme
ŋokac iŋucne enʒepieŋ.
Boreŋ ʒeŋaŋ fojarekac sâc
i ʒika fuame ŋiczi fiuc ronʒepieŋ.
38 Ʒoaŋ sanaŋne qame opâ wiac‐ticne ʒicke kereŋ ezejec.
Wiac mâreŋ i nemuɋâŋ jaŋere mâreŋ i!
 ŋicfâcne jaŋe nemuɋâŋfâc‐jeŋic repicne
irec erâ maŋjeŋic sifuckekac i!
39 “Irec Babezi kâte qowi â kâte qâto jaŋere ŋeŋe hae ezejec â hae maŋnao qerazi juzejec wâc; ŋiczi ine ira ŋec juc mocwâc mi enʒepieŋ, â moczi maŋnao ju fofo mocwâc mi ejâmbâŋkezejec.
40 Anutuzi Sodom â Gomora erâ hae rârec‐jofahuc ŋerambiŋ jaŋe bâsirowec‐jopawec irec sâc jaha fuame ŋic moczi hae ira ŋec juc mocwâc mi ezejec, erâ moczi moc maŋnao ju fofo ee i wâc aricne. Wofuŋ nore dâŋ iŋuc.
41 “Manakic, faic mâreŋkonec ŋicguru moc ware fisiniŋmu;
ŋicguru kâcɋene sâko erâ ŋicwofuŋ bocjaha
jaŋe mâreŋ qaŋeŋnaonec jâmbâŋ faharerâ wareniŋmu hâcne.
42 Jaŋe tepe â sându‐jeŋichec,
jaŋe ŋic ʒâʒâicne â busâqoc‐jeŋic tâmiric.
Ojowa‐jeŋic i hâwec sirizi fânâŋkeekac iŋucne,
jaŋe becâsicko rara ŋic, jaŋe ʒikaŋic iŋucne
fisirâ Babe rune go râsi egareniŋmu.
43 “Babe ŋicwofuŋ e jaŋere biŋe manarâ mene betaŋkekac;
e hâhâwic ehuc ŋokac moczi gozi kime fâfâreekac irec sâc ekac.
44 “Manakic, laioŋzi Jordaŋ uupickonec wefurâ lama jaŋere sapao fisiekac irec sâc no bâruŋ jaha jâpec‐jopape wisenʒepieŋ; eme ŋic biac bâwosâekicne e hâcne âkendâŋnepe ŋicbomboŋ ejarezejec. Mozi nore sâc moc jukac, me mozi dâŋgieo moc râecnuocmu, me mo soŋaŋzi nore maio sanaŋkerâ domaocmu?
45 Irec Wofuŋ no Babe haere dâŋ mupaŋkepo i mecne â Kaldea mâreŋte dâŋ mana biric epo i mâmâc mananiŋ, kecʒiŋuc: Jei, lama wahakicne jaŋe wâc bacjopa raniŋmu, jâmbomac, wiac fua‐jareocmu irec erâ sapa‐jeŋic weaŋkerâ foocmu.
46 Eme mâreŋzi wiwira ʒiŋuc manarâ ɋiɋiteckeocmu: Babe hae i ro rauc ekicne! Ehame kio owa‐ticne fuame ŋicne ŋicne hazec‐jeŋicko huocmu.”