51
Wofuŋzi Babe hae dâŋticne mutarakac
1 Wofuŋzi ʒiŋuc mukac:
“Manakic, no sisipiric ŋic moc qafeŋkepe
Babe hae â Kaldea mâreŋ ŋecjucfâc‐ticne fisi‐jarezejec.
2 No Babe haeo ŋic oofaŋ‐jeŋichec sorec‐jopape
ofaŋne behec enʒepieŋ,
ehuc hae mâreŋ nânâ mafa wiac‐ticne jâoc ronʒepieŋ;
i sisipiric dameŋko rârec rârec irecnec fisirâ
hae somâ bahuc iŋuc hâcne eniŋmu.
3 Tepeŋic jaŋe tepe tikocko hezo eipienʒepieŋ,
â marukuheczi penaroŋ ehuc mi domanʒepieŋ.
Ŋoŋe ŋicmotecfâc‐jeŋic mi akic‐jopanʒepieŋ,
ehuc momorifâc‐jeŋic bâsirowec‐jopa‐fârenʒepieŋ.
4 Eme qâhâmoc‐jopakicne i Kaldea ŋic jaŋere mâreŋko
â âke mârâŋ‐jopakicne jaŋe hae ʒoŋa‐jeŋicko foranʒepieŋ.
5 Kaldea mâreŋ i Israe Tiri rune no bunaneo bahuc kiŋhec efârewecte
Israe â Juda jahe Anutu‐jekic,
Anutu Tâpiri Ɋuŋɋasaŋ Wofuŋ hâcne no behec‐jofape
hozec iŋucne moc mi juzepirec.
6 “Babe hae mâreŋkonec wiseniŋ, ehuc ere kiŋte erâ
mi sipirickehuc ru sâc juju‐ŋeŋic ŋezickenʒepieŋ.
Dameŋ i Wofuŋ nore okac babazu dameŋ hâcne,
no eebapa‐ticnere okacne râcnepemu.
7 Babe e Wofuŋ nore meo gol râqâc iŋucne ŋeme
mâreŋ sâc ŋicne ŋicne jaŋe hone aŋac ehuc
waiŋ opâ‐ticne gapecmâc nâpie
maŋjeŋic sifuckewec.
8 Babe haezi ututuŋ waha qahuc qanʒaŋnewec,
irec erâ kio owa eniŋ!
Ʒâic‐ticnere wokemaŋ rorâ ruacne honeniŋ,
eme biaŋke wiac moc eocmu me weniŋuc.
9 ‘Nâŋe Babe bâpiaŋkezo mumbeŋ,
e ine bâbâpiaŋkenere sâc mi ewec;
irec e beherâ mâreŋ‐nâŋec sâc rafârenaŋ,
erao okac babazu fuawec i feku sambâŋ heuakac,
â faic karorac fokacko fe fisikac.’
10 Wofuŋ e bafic‐nâpohuc fuŋne‐nâŋec bataniŋkewec,
irec Wofuŋ Anutu‐nâŋecte eebapa i
Zioŋko muromackenaŋ.
11 “Tepe motec qâteckeniŋ!
Maro hepie huoc!
Wofuŋ e Babe bâsiroweocte manasuhuc Mede ŋicwofuŋ qafeŋ‐jopame momori wânʒâŋ eŋgopieŋ, izi Wofuŋ okac babazu gie‐ticne, taha ufuŋ‐ticnere okac babazu gie hâcne.
12 Babe haere qânâsackopec filac fârepie feoc,
rucgereŋ juniŋ, soŋaŋ râec‐jopaniŋ
â ruc bapa ŋic ejarepie ruc bahuc domaniŋ!
Wofuŋ e Babe ŋecjucfâc‐ticne wiac ejareocte mana biric ewec
i fârine bâfuaocte ekac hâcne.
13 Jei, opâ sâko heririŋnao ŋec juc ekomec,
â boreŋ ʒeŋaŋge guru sâko fokac
go hâmoc dameŋge maickekac
â juju dameŋge bâtâcnekicne.
14 Anutu Tâpiri Ɋuŋɋasaŋ Wofuŋzi
e jahacne ʒâŋeo ɋetickerâ mupaŋkehuc muwec:
Jâmbomac, haemaŋgao ŋic jaŋe jagitotoc iŋucne juipiehapie
ine râsi jaŋe sifu fisi‐garehuc semuja hegarenʒepieŋ.
15 “Tâpiri‐ticnezi mâreŋ bâfuawec
â maŋɋârâŋ‐ticnezi mâreŋ sâko mâreŋ irec hobeteŋne râewec,
erâ mamana‐ticnezi sambâŋ qaratiehuc râe rawec
16 eki hâcne ɋuŋmaŋko dâŋeme
sambâŋ rurumaŋnao opâ fânâŋ sâko fuaekac,
eki hâcne hoe heocte bâbâric bâfuaekac,
â rowaŋ‐ticnaonec mâŋâŋ soreme fisiekac.
17 Mâreŋŋic jaŋe furu jaha mutucne â mamana tâmiric,
golzi wiac bapa sasawa jaŋe ɋâŋ qâqâtâc‐jeŋicte qurutuaeŋgopieŋ,
nemuɋâŋfâc‐jeŋic jaŋe wiac jabane â mi jujune irec.
18 Jaŋe wiac fârine aricne,
wiac hone gâgâwine hâcne;
jaŋe bâbâtiŋ dameŋ‐jeŋicko siroweniŋmu.
19 Anutuzi Jakobore rowaŋ jukac e jaŋere sâc aricne,
e hâcne wiac sasawa irec bâbâfua,
Israe ŋic jaŋe fuŋfuŋfâc‐ticne,
ʒâŋe‐ticne Anutu Tapiri Ɋuŋɋasaŋ Wofuŋ.”
20 Wofuŋzi kecʒiŋuc mukac:
“Babe go hama‐nane â ʒika‐nane ehuc jumeŋ,
iŋuc junarehaŋ no ŋicne ŋicne henʒaŋ‐jopapo
erâ ŋicwofuŋ â gurufâc‐jeŋic sipiric‐jopapo.
21 No hama izi becâsic â becâsicko rara ŋic henʒaŋ qanʒaŋ‐jopapo,
erâ keretac â ŋic fainao ŋeeŋgopieŋ jaŋe mâmâc.
22 No hama izi ŋic mecne ŋokac mecne,
ŋic ŋokac qizecne erâ socɋâri,
ŋicmotec â ŋokac ʒeŋoŋ jaŋe henʒaŋ‐jopapo.
23 No hama izi soŋaŋ â qowifâc‐jeŋic mecne,
hesarac ŋic â bulimakaofâc‐jeŋic
giere bafic‐jopaeŋgopieŋ mecne,
erâ wâc kia sâko â momori micne jaŋe mâmâc henʒaŋ‐jopapo.
24 “No Babe â Kaldea mâreŋ ŋecjucfâc‐ticne sasawa jaŋe Zioŋ sindaŋ ecnembiŋ irec okacne ʒâŋe fai‐jeŋicko bazu‐jarepemu. Wofuŋ nore dâŋ iŋuc.
25 “Sisipiric tiki go manac:
Mâreŋ sâc sisipiric bâfuameŋ go râsi egarepemu,
gorao hâcne tâpiri‐nanere fuŋne bataniŋkehuc
haroŋaŋ faionec tuŋgupe
hurâ tiki ʒoczi ʒâseŋkekicne iŋucne ezemec.
26 Eme goraonec wâtuŋ ropie izi jâmâ wâtuŋ eha
râepie huekac i arictac ezejec,
me jâc wiac woke qâtâcte biŋe ropie fifisi
i wâc arictac jaha ezejec;
go hae mâreŋ ima bacgukicne
iŋuc fohuc juzemec sanaŋ. Wofuŋ nore dâŋ iŋuc.
Babe hae e kiŋticnere okacne fisicnekac
27 “Ŋoŋe mâreŋko filac fârepie feoc!
Ŋicne ŋicne jaŋere ŋondeŋko qeŋ qapie dâŋeoc!
Ŋicne ŋicne jaŋe Babe hae râsi ecneniŋte baʒawiec‐jopaniŋ!
Ŋoŋe Ararata â Mini erâ Asekena ŋicguru
jaŋe hefârec‐jopapie râsi fisicnenʒepieŋ!
Ʒikare micne râec‐jopaniŋ
â becâsic ine jagitotoc guru sâko iŋucne bacjopa wareniŋ.
28 Ŋicne ŋicne jaŋe râsi ecneniŋte baʒawiec‐jopaniŋ,
ine Mede mâreŋte ŋicwofuŋ â ŋic fekicne
â kia sâkofâc‐jeŋic
erâ uucmaŋ‐jeŋicko ŋic juraŋgopieŋ sasawa jaŋe hâcne.
29 Mâreŋ i qiriŋ qahuc ɋiɋiteckeocmu,
Wofuŋzi Babe hae mâreŋte dâŋ mana biric ewec
i fârine bâfuahuc ima bame
tuhutac fuarâ foocmu irec.
30 Babe qac momorifâc‐ticne jaŋe ʒika gie behembiŋ,
ehuc ficsoŋ‐jeŋic ŋerakac sâc ira ŋeŋgopieŋ;
jaŋe tâpiri‐jeŋic omaeme
ŋokac jaŋe iŋucne embiŋ juŋgopieŋ.
Ficjeŋic turuŋkepie ʒakac,
â motâc babasanaŋ‐jeŋic i wâc qazukicne.
31 Hae qizec‐ticne orâŋkehuc ro rauc ekicne
irec dâŋ Babe ŋicwofuŋ âzâcneniŋte kiŋaŋŋic
â biŋe mumu jaŋe ʒuʒuhuc jaha fisihuc domaŋgopieŋ.
32 Opâ rendac ŋebâzickerâ soŋaŋkeŋgopieŋ,
aka sanaŋ wiac ʒoczi rikepie ʒakac,
ehame momori hâbi‐jeŋic goroŋkekac.
33 Anutu Tâpiri Ɋuŋɋasaŋ Wofuŋ,
Israere Anutu e ʒiŋuc mukac hâcne:
Babe haere otâ e nânâ rowaŋficko mâreŋ âtepie
sanaŋkeekac irec sâc;
eme dameŋ bembeŋne sawa tarame
okac dameŋ maickeocmu.”
34-35 Zioŋ ŋecjucfâc‐ticne jaŋe ʒiŋuc munʒepieŋ:
“Babe ŋicwofuŋ Nebukaneza e sipiricnuhuc nâcnuwec,
e kuʒi tacne iŋucne behecnuwec,
e oâ iŋucne erâ ɋâcnume hobu‐ticne fusucmawec,
e hae mâreŋ biaŋnaonec jâpecnuwec.
No â soctofafâc‐nane wiac sâqocne enârekicne
irec kiŋtofa Baberao fozejec.”
 Jerusalemzi ʒiŋuc muzejec:
“Socnane hoŋkekicne irec kiŋ i
Kaldea mâreŋ rune jaŋerao fozejec.”
36 Irec Wofuŋzi kecʒiŋuc mukac:
“Manakic, no dâŋge dopeckehuc
âkehocgurâ okac babazu gie bapemu.
Noni mupe opâ sâko‐ticne kereŋkezejec,
â opâ ʒâŋe‐ticne ʒickezejec.
37 Babe hae ima bapie sesuctacne fuarâ fome
kâte qâto jaŋere fic hae ezejec;
i ŋic tâmiric foha gâcnezi honehuc bipic tatara ejareha
mu ruruc ecnenʒepieŋ.
38 “Jaŋe babafic ehuc laioŋ iŋucne owackeeŋgopieŋ,
jaŋe laioŋ motecne iŋucne ŋuruŋkeeŋgopieŋ.
39 Jaŋe bujeŋic bâruŋkeme
tiwâ ʒepec moc bâmocke‐jarepemu,
ehuc maŋsifuc opâ gumec‐jopapemu;
eme jaŋe docke betaŋ erâ guŋsanaŋ foku
mocwâc mi ɋârenʒepieŋ.
40 Lama â noniŋ hezuc‐jopaniŋte bacjopa raeŋgopieŋ
irec sâc mupe bacjopa raniŋmu.
41 “Jei, Babe hae i ro rauc ekicne,
mâreŋ sâko mâreŋ irec ʒâŋe biŋe i bawahakicne i!
Jei, ŋicne ŋicne Babe hae honerâ
bipic tatara ejarewec i!
42 Hâweczi wefurâ Babe hae bârârâŋnewec,
â siri sâko‐ticnezi fânâŋkehuc qâuruckewec.
43 Hae‐ticne ŋerawec i tuhu erâ niniŋ siarereŋ fuawec,
mâreŋ kereŋne â burocne hâcne;
moczi moc maŋnao ŋec juc mocwâc mi ejâmbâŋkeocmu
â ŋic moczi ira sicne fotâc wâc mi eocmu.
44 Eme no Babe haeo Beli nemu okacne râcnepemu,
ehuc wiac ɋâckewec i gozi bape micticnaonec
maŋume wahazejec,
erâ ŋicne ŋicne jaŋe erao mocwâc mi heâckerâ ranʒepieŋ.
Babe hae irec qânâsac i heropiekicne hâcne.
Wofuŋ nore dâŋ iŋuc.
Babe haere ki mamakuc ekicne
45 “Ŋicfâc‐nane, ŋoŋe hae irec maŋnaonec wiserâ raniŋ,
ŋoŋe sasawa Wofuŋ kimbeŋ‐nanere ʒocbâruŋzi
sipiric‐ŋopazacte juju‐ŋeŋic ŋezickeniŋ!
46 Erâ maŋŋeŋic mi omaezejec,
â mâreŋ ira sawadâŋ moc fuame
manarâ mi hâwic‐ŋopazejec.
Ine jara moc sawadâŋ moc
â jara moc ira sawadâŋ moc fuaocmuo,
me bâbâʒâic fuaocmu,
me ŋicbomboŋ moczi ŋicbomboŋ âgo‐ticne râsi ecneocmuo
ine mi hâwic‐ŋopazejec.
47 “Manaŋgopieŋ, dameŋ moc maickeocmu ira
Babe haere ɋâŋ qâqâtâcfâc bâsirowec‐jopapemu,
ehame hae mâreŋ i weaŋke‐fâreocmu
â qâhâmoc‐jopakicnefâc‐ticne jaŋe sasawa
hae maŋnao foraniŋmu.
48 Eme sambâŋ â mâreŋ jahere maŋnao wiac jufâreekac
izi Babe haere mu ʒeri ezejec,
i ima bapafâcne jaŋe faic mâreŋkonec fisicneniŋmu irec.
Wofuŋ nore dâŋ iŋuc.
49 Israe qâhâmoc‐jopakicnefâc‐ticne jaŋere erâ Babe ima bazo,
ine Babe haere erâ mâreŋ sâc ŋic qâhâmoc‐jopakicne irec sâc.
50 “Ʒika wisecnembiŋ ŋoŋe ine
ŋeŋe râqâc mi ehuc ranʒepieŋ!
Ŋoŋe ʒoricko juhuc Wofuŋ nore manasunʒepieŋ,
ehuc maŋŋeŋic Jerusalemko râepie domazejec.
51 ‘Nâŋe mimi qaqa enârekicnere
mimi busâqoc manaeŋgopeneŋ;
mimizi ŋecnâpome ʒâŋe mai‐nâŋec bâsoŋkehuc jueŋgopeneŋ,
i ŋic jabanezi Wofuŋ ufuŋ‐ticnere tiri wiac ima bambiŋte.’
52 “Irec manaŋgopieŋ, dameŋ moc maickeocmu ira
Babe nemuɋâŋfâcne okacne bazu‐jarepemu,
eme hae mâreŋ‐ticne sasawa ira
ʒâpâ âkec‐jopakicnezi kio huse enʒepieŋ.
53 Eme Babe hae bafekupie sambâŋ heuaocmuo
me qânâsac‐ticne hâŋ bafekupie
huhuckene mi eocmuo ine
no sifu sisipiric ŋic sorec‐jopape fisicnenʒepieŋ,
Wofuŋ nore dâŋ iŋuc.
54 “Mananiŋ! Babe haeonec kio owa fuarâ fânâŋne warekac,
erâ ima sâko irec fânâŋ Kaldea ŋic jaŋere mâreŋkonec fisikac.
55 Ine hâcne, Wofuŋ no Babe ima bahuc
hae maŋnao ojowa sâko foekac i bâniniŋkekopac;
râsi jaŋe hâwec siri iŋucne fisihuc opâ sâko fânâŋkeekac
irec sâc fânâŋkeŋgopieŋ,
micʒonʒoŋ‐jeŋic fuakac i hâhâwicne.
56 Sisipiric ŋic e Babe fisicnekac hâcne;
eme hae irec momorifâc kâpâcwâru bacjopaniŋmu
â tepe neŋgoc‐jeŋic i bazuniŋmu;
Wofuŋ no okac babazu Anutu,
irec okac bazu‐jare‐jâmbâŋkepemu.
57 Fekicnefâc‐ticne mecne, mamana ŋicfâc‐ticne mecne,
mâreŋ soŋaŋfâc‐ticne mecne, kia sâkofâc‐ticne mecne,
erâ qac momorifâc‐ticne mecne jaŋe opâ sanaŋ gumec‐jopape
guŋzi qâmâc‐jopame foku mocwâc mi ɋârenʒepieŋ;
Wofuŋ Sâko, Anutu Tâpiri Ɋuŋɋasaŋ Wofuŋ
nore dâŋ iŋuc.”
58 Anutu Tâpiri Ɋuŋɋasaŋ Wofuŋ e ʒiŋuc mukac:
“Babe haere qânâsac kâcɋene i heroc qâropiepie
mâreŋhec sâc mocjaha ezejec,
â motâc mimiŋ‐ticne i ʒoczi rikepie ʒazejec.
Iŋuc fuame dâŋ ʒiŋuc fokac i fârio qaocmu:
Ŋic gurune gurune jaŋe wiac ebac epie
fâri tâmiric eekac,
â ŋicne ŋicne jaŋe gie sâko bakupie
fârine fuame ʒocte biŋe eekac.”
Babe hae omaeocte mukicne
59 Juda ŋicwofuŋ Zedekia e ŋicwofuŋ jume jara 4 eha, Neriare ŋokâ Seraja, Masejare ŋosa hâcne, e ŋicwofuŋhec Babe haeo razo eme porofete Jeremiazi dâŋ âzâcne mutâc ewec ʒine hâcne. Seraja e hata jujure mumutâc â soŋaŋ juwec.
60 Jeremia eki ine Babe hae wiac hâhâwicne fuacneocte mukicne irec dâŋ i papiao qâreŋke‐fârewec, ine Babere dâŋ qâreŋkekicne i sasawa hâcne.
61 Erâ Jeremiazi Seraja ʒiŋuc âzâcnewec: “Go Babe haeo fisirâ dâŋ ʒi ʒoɋac erâ wose‐jare‐fârezemec.
62 Erâ muzemec, ‘Wofuŋ, go gahac hae ʒi râsi ecnehuc bâsirowecmurâ mumeŋ, i maŋnao ŋic mecne qowi mecne mocwâc mi juhapie tuhutac fuarâ fosanaŋkeocte iŋuc emeŋ.’
63-64 Eufrata opâo behetec hutâmirezejec. Ehame ʒiŋuc muzemec, ‘Babe hae e irec sâc jaha tâmirezejec, eme wiac hâhâwicne mupe fainao feocmu i hetararâ mocwâc mi faharezejec!’ ”
Jeremiare dâŋ i ʒira hâcne tarakac.