7
Hata â eebapa‐jeŋic sâqocne bebehe irec dâŋ
1 Wofuŋtaonec dâŋ Jeremiarao fuawec i kecʒiŋuc:
2 “Wofuŋte taha ufuŋ irec motâcko ra domahuc dâŋ ʒiŋuc jazazemec: Juda mâreŋ rune Wofuŋ mai ecneniŋte motâc ʒi fotâcneeŋgopieŋ ŋoŋe ʒeŋgoma Wofuŋte dâŋ ʒi mananiŋ!
3 Anutu Tâpiri Ɋuŋɋasaŋ Wofuŋ, Israere Anutu hâcne, eki ʒiŋuc mukac: Ŋoŋe juju â eebapa‐ŋeŋic bâtiŋnepie biaŋkezejec, eme no hae ʒira ʒuhuckerâ juniŋte mana‐ŋarepemu.
4 Ŋoŋe burecdâŋ kecʒiŋuc muhuc ira mi roweckenʒepieŋ, ‘Ohec, Wofuŋte taha ufuŋ, Wofuŋte taha ufuŋ, Wofuŋte taha ufuŋ ʒine hâcne.’
5 “Ŋoŋe jâmbomac juju â eebapa‐ŋeŋic bâtiŋnepie biaŋkeocmuo â ŋaŋackoaŋ sâcmutâc dâŋ tiŋnere sâcko wiac ebac eec eniŋmuo
6 erâ ŋic jabane me hozec bekâ fific mi bacjopaniŋmuo, me ŋic bahacmâc jaŋere soc hae ʒira mi hoŋkeniŋmuo â ŋaŋac sipirickenʒipiŋte nemu jabane jaŋerao mi qohotaniŋmuo
7 ine mana‐ŋarepe mimiŋnefâc‐ŋeŋic mârâc jaha mâreŋ tahac‐jopapo ʒira ʒuhuckerâ juraʒiniŋmu sanaŋ.
8 “Manaŋgopieŋ, ŋoŋe maŋgâŋ jaha eeatuc dâŋko roweckeeŋgopieŋ.
9 Ŋoŋe fiuc roeŋgopieŋ, ŋic qâhâmoc‐jopaeŋgopieŋ, sasec gie baeŋgopieŋ, burecko ɋetickehuc mumupaŋ dâŋ mueŋgopieŋ, Baali nemu hosâc âsu rikecneeŋgopieŋ â nemu jabane mârâc kâuc bacjopambiŋ jaŋerao qohotaeŋgopieŋ.
10 Eme weniŋuc? Mâsi i eeŋgopieŋzi fic ʒira nore ʒâŋe fokacko mai‐naneo fuazo muŋgopieŋ me? Ehuc muŋgopieŋ, ‘Nâŋe ʒira sâcne juŋgopeneŋ’, iŋuc murâ wiac mamakâcne sasawa keci ʒuhuckerâ eniŋte maŋkeŋgopieŋ.
11 Fic kecʒira nore ʒâŋe fokac i ŋoŋe honepie fiuc roro ŋic jaŋere qânâuŋ tinac ekac me? Jâmbomac, no nahac wâc honepe iŋuc tinac ekac, Wofuŋ nore dâŋ iŋuc.
12 Ajoc, ŋoŋe ficnane Silo haeo ŋewec erâ mârâc jaha ʒâŋe‐nane ira foocte mupo ira hâcne raniŋ, ehuc Israe ŋicfâc‐nane jaŋere hehesicte erâ ficnane weniŋuc ecnepo i honeniŋ!
13 Wiac sindaŋne i sasawa embiŋ â no uŋ sawaŋ ʒoɋachec eŋare‐bipiehape mi manambiŋ erâ wira‐ŋare‐bipiehape micnaneo mi rombiŋ. Wofuŋ nore dâŋ iŋuc.
14 Irec ʒi, fic kecʒira nore ʒâŋe fokac â ŋoŋe manapie huec sanaŋ‐ŋeŋic ekac, erâ mimiŋnefâc‐ŋeŋic hae tahac‐jopapo i Silo ecnepo sâc ijaha ecnezepac.
15 Ehuc ʒâŋe mai‐naneonec tuŋŋopazepac, i qomâfâc‐ŋeŋic, Eferaimte ɋâricfâc hâcne, furu jaha tuŋjopa‐fârepo irec sâc.”
Anutuzi nemu araŋ bajareeŋgopieŋ jaŋere maname sâqorekac
16 Wofuŋzi kecʒiŋuc mukac: “Jeremia, goki ine ŋic i jaŋere erâ mi numuzemec â jaŋere erâ wira wâwâsic ehuc ʒoɋac mi enarezemec, no mi mana‐garepemu irec.
17 Jaŋe Juda mâreŋko hae ŋerakac irec maŋnao â Jerusalem haere hata forakac ira wiac ebac eeŋgopieŋ i go mi honeekic me?
18 Naru motec jaŋe ʒoc ro nusec eeŋgopieŋ â mamacfâc‐jeŋic jaŋe ʒoc ruqueeŋgopieŋ, ŋokac jaŋe ine sawa qânikiŋ irec ŋokac wofuŋ ere nânâ poroŋ rikeniŋte poroŋ ɋâricne ba hetikic eeŋgopieŋ; erâ no bâiŋnuniŋte nemu jabane waiŋzi taha hoŋke‐jareeŋgopieŋ.
19 Ehame jâmbomac no moc bâiŋnueŋgopieŋ me? Me jaŋe jaŋaczia bâbâiŋ eec erâ qurutuaeŋgopieŋ?
20 Irec Wofuŋ Anutu no kecʒiŋuc mukopac: Manakic, kimbeŋ â aaric‐nane i hae mâreŋ ʒirec faio feocmu, eme ŋic faio mecne, qowi faio mecne, gieo jâc doma rakac irec faio mecne, erâ mâreŋte wiac fârine fua raekac irec faio mâmâc ferâ mi hâhâpo ʒarahuc foocmu.”
Judaŋic jaŋe râŋgeŋkepie okacne fisi‐jareocte mukicne
21 Anutu Tâpiri Ɋuŋɋasaŋ Wofuŋ, Israere Anutu e ʒiŋuc mukac: “Ŋoŋe qowi hâcbuc ririkene i taha bâzi‐ŋeŋichec qâturerâ râeniŋ, erâ qowi nâjâmbâŋkeniŋ me!
22 No mimiŋnefâc‐ŋeŋic Aigita mâreŋkonec jowac‐jopa wahahuc qowi hâcbuc ririke me taha bâzi irec dâŋ moc mi jazahuc sâcmutâc ejarepo.
23 Aricne, ʒiŋuc ine mutâcne‐jarepo, ‘Ŋoŋe dâŋnane mana rereŋ epie no Anutu‐ŋeŋic juhape ŋoŋe ŋicfâc‐nane junʒepieŋ, ehuc hata mutâcne‐ŋarepemu sâc i juhâc qâhâmoniŋte âte rahuc junʒepieŋ.’
24 Jaŋe ine mi manambiŋ â hazec‐jeŋic i nore dâŋte wâc mi râembiŋ, aricne, jaŋe jaŋacne mamanasu biri bâjâpembiŋ â maŋrâŋgeŋ‐jeŋicte hata hehesicne âtembiŋ, ehuc no mi maicnuhuc râpecnumbiŋ hâcne.
25 Mimiŋnefâc‐ŋeŋic Aigita mâreŋkonec wahambiŋ dameŋ ira fuŋkerâ kiŋaŋŋicfâc‐nane sasawa, porofete hâcne, jaŋe dameŋne dameŋne ŋoŋerao sorec‐jopapozi sorec‐jopahuc juekopac.
26 Jaŋe ine dâŋnane mi manambiŋ â hazec‐jeŋic i nore dâŋte mi râembiŋ wâc; aricne, jaŋe mimiŋnefâc‐jeŋic siric‐jopahuc maŋrâŋgeŋ embiŋ.
27 “Jeremia, go dâŋ i furu jaha jaza‐fâretec dâŋge sifu mi mananiŋmu â wira‐jaretecne micgao mi roniŋmu.
28 Irec ʒiŋuc jazazemec: ‘Wofuŋ Anutu‐ŋeŋicte mumutâc dâŋ mana rereŋ mi eeŋgopieŋ â bâbâtiŋ qâsuaeŋgopieŋ i ŋicguru ʒi ŋoŋe hâcne. Siocmâc juju‐ŋeŋic i omaewec, â irec dâŋ micŋeŋicko mocwâc mi fokac.
29 Irec qizec susuc‐ŋeŋic bâtâcnerâ behepie rahame
tiki burocnao ki mamakuc eniŋ;
Wofuŋ e ŋicguru kimbeŋ qajarewec
jaŋe suŋgiŋ‐jopahuc behec‐jopawec hâcne.’
30 “Judare ɋâricfâc jaŋe wiac hone aŋac mi ecneekopac i hâcne embiŋ, jaŋe nore ʒâŋe fokac fic ira wâwânâŋ bâfuaniŋte wiac‐jeŋic mamakâcne, ɋâŋ qâqâtâc hâcne, i âkendâŋnembiŋ. Wofuŋ nore dâŋ iŋuc.
31 Erâ naru motecfâc‐jeŋic ʒocko rikec‐jopaniŋte Beŋ‐Hinom wâneŋko bâzi ririke hae Tofete bambiŋ. No ine wiac iŋucnere dâŋ moc mi mutâcne‐jarepo, erâ nore maŋkonec wiac iŋucnere dâŋ moc mi fuawec wâc.
32 Irec ʒiŋuc mananiŋ: Dameŋ moc maickeocmu ira Tofete mecne, Beŋ‐Hinom wâneŋ mecne irec ʒâŋe jâmbâŋ mocwâc mi muhuc ‘Sisipiric Wâneŋ’ muniŋmu; Wofuŋ nore dâŋ iŋuc. Jaŋe mâreŋ gâcne basahuc qâŋɋâŋfâc‐jeŋic Tofete haeo ducjopaniŋmu hâcne.
33 Eme ŋicguru keci qâŋɋâŋfâc‐jeŋic i sawa wipe â kâte qâto jaŋere nânâ eniŋmu, jaŋe nâcjopahapie moczi moc mi jâpec‐jopaocmu.
34 Eme no Juda mâreŋko hae ŋerakac â Jerusalem haeo hata forakac sâc ʒeri bubiaŋ fua raekac i mecne, erâ ŋic ŋokac roroc ehuc ʒeri wiac eeŋgopieŋ i mâmâc bâniniŋke‐fârepemu, mâreŋ i tuhutac fuarâ fozejec hâcne.”