8
1 Wofuŋte dâŋ ʒiŋuc fokac: “Dameŋ ira Judare ŋicwofuŋfâc â fekicnefâcne â taha bapa â porofete erâ Jerusalem ŋecjucfâc‐ticne jaŋere siec wiac i ʒâŋeruŋ‐jeŋickonec wisepie wefuocmu.
2 Ehame mosa ʒoaŋ â bâpiŋ jaŋere tatamacko qandaŋkeniŋmu, i ine maŋjeŋic jaŋerao râepie domaha kiŋaŋ qajare jumbieŋ â jaŋerao qohotahuc mu wioc ejarerâ fodape‐jare jumbieŋ irec; eme ro nusec me duducke i mocwâc mi eniŋmu, aricne, jawa iŋucne eme behepie mâreŋte guec eocmu.
3 Eme ŋicguru repicne ʒi jaŋere nâfocne ira me ira jâpec‐jopape ra juniŋmu jaŋe jujure mâcne, hâmocte manapie aŋacne eocmu. Anutu Tâpiri Ɋuŋɋasaŋ Wofuŋ nore dâŋ iŋuc.”
Sâqocnere okac babazu â mumutara dâŋ
4 “Jeremia, go ŋicfâc‐nane jazazemec,
Wofuŋ e ʒiŋuc mukac:
Ŋic mâreŋko waha jopame mocwâc mi fahareeŋgopieŋ me?
Me moc e qâsorieocmuzi
hata mocwâc i risieocmu me?
5 Ŋicguru ʒi, Jerusalem hae rune hâcne,
jaŋe ine wemocte dameŋ sâc qâsoriehuc jueŋgopieŋ,
ehuc eeatucko qohotahuc risieniŋte qikiŋneeŋgopieŋ?
6 No hazec râerâ manapo: Jaŋe burecdâŋ muhuc jueŋgopieŋ,
moczi moc hehesic‐ticnere busâqoc moc mi manaekac,
ehuc wemocko muzac, ‘Jei, no weniŋuc epo?’
Aricne, ʒeŋgoma becâsiczi ʒikao kosa gasacke sâqoreeŋgopieŋ
irec sâc hata‐jeŋicko fâro rahuc qâsorieeŋgopieŋ.
7 Sawao qeʒo juekac e dameŋ‐ticne manaekac,
â buni mecne, sawa hehetâc wipe mecne,
koneŋ mecne jaŋe wâc iŋuc jaha
ririsie dameŋ‐jeŋic manaeŋgopieŋ.
Ŋicfâc‐nane jaŋe ine Wofuŋ nore
mumutâc dâŋte kâuc baeŋgopieŋ.
8 “Ŋoŋe wemocko ʒiŋuc muniŋmu, ‘Nâŋe maŋɋârâŋhec
â Wofuŋte sâcmutâc dâŋ i fonârekac wâc?’
Manaŋgopieŋ, qâqâreŋ ŋic jaŋe
dâŋ hetikiehuc qâreŋkepie burecdâŋ ewec.
9 Maŋɋârâŋhec jaŋe qurutuaniŋmu,
ehuc bipic tatara ejareme
jaŋacne dâŋzi ufic ejareha ira jowaniŋmu.
Manakic, jaŋe Wofuŋ nore dâŋ qâsuambiŋte
jaŋacne mamanazi wemocko moc bafic‐jopaocmu?
10 Irec ŋokacfâc‐jeŋic i ŋic furune jarepemu,
â gie wiac‐jeŋic i mâreŋ‐jeŋic rauckembiŋ
jaŋe qikiŋne‐jarepemu.
Fekicne mecne, wahakicne mecne jaŋe ʒeŋgoma
burecko moneŋ mafa hureniŋte andac eeŋgopieŋ hâcne;
porofete â taha bapa jaŋe wâc ʒeŋgoma
eatuc ehuc jueŋgopieŋ.
11 Jaŋe wama moc mi fohame ŋicfâc‐nane jaŋere
huc wic burec burec bâsomie‐jarehuc ‘Wama wama’ mueŋgopieŋ.
12 Jaŋe wiac mamakâcne bâfuambiŋte mimiepie muzac sâckezac,
jaŋe ine mimi‐jeŋic jaŋgeŋkekicnere
mimi busâqocte kâuc baeŋgopieŋ.
Irec gâcne waha jopaocmu jaŋehec mâmâc waha jopazejec;
no bâtiŋ‐jopapemu dameŋ ira fâfâc‐jopame rândiŋkenʒepieŋ hâcne,
Wofuŋ nore dâŋ iŋuc.
13 Erâ dâŋnane moc ʒiŋuc fokac: No jaŋerao fârine
ro nusec epemurâ fisi waiŋ qizecko hândâŋne basaekopac,
â jâmbojâcko hândâŋne basaekopac wâc,
ehame rehacne ɋaŋarâ hâmoekac;
irec ŋiczi ofaŋne behec ejareniŋte
biac mutâcne‐jarepo.”
14 Jaŋe wioŋgopieŋ, “Wemo wiacte niniŋkerâ ŋeŋgopeneŋ?
Ajoc, tumaŋnerâ hae sanaŋko rarâ sipirickenaŋ me!
Wofuŋ Anutu‐nâŋec e sipirickenaŋte maname fokac,
nâŋac Wofuŋ bunao bahuc sâqocne bambeŋte
qotâre micopâ gumec‐nâpoocmu hâcne.
15 Nâŋâc wamare ʒâŋe fihapene
wiac biaŋne i me i moc mi fua‐nârewec;
jei, bâbâpiaŋ dameŋte enâre‐bipieha
wiac bipic tataranehec fuawec fokac.
16 “Becâsicfâc‐jeŋic jaŋere nokafe fânâŋ i
Daŋ mâreŋkonec fisime manaeŋgopeneŋ,
becâsicfâc‐jeŋic ŋicne jaŋere dâŋfânâŋte
mâreŋzi ɋiɋitecke‐fâreekac.
Jaŋe ware fisirâ mâreŋ fainao wiac fuarâ fokac
i nâmizieniŋmu,
erâ hae sâko â ŋecjucfâc‐ticne
i mâmâc omaec‐jopaniŋmu.
17 Manaŋgopieŋ, no qotâ homa wiac ejarepe fisi‐ŋareniŋmu,
eme qaŋgecte fuŋne mamanazi bâmâteŋ‐jopaniŋte
eipiehapie kicŋopaniŋmu.” Wofuŋte dâŋ iŋuc.
Juda mâreŋte â Jerusalem haere ki wâwâsic fuawec
18 No ʒârâ ʒâpâ faio juhape wiac moczi bâpiaŋnuocmu i mi fokac,
no busâqoc mana utuckehuc juekopac.
19 Keci manac, ŋicfâc‐nane jaŋere oowa â marac fânâŋzi
mâreŋ ʒorickonec ʒiŋuc fisikac:
“Wofuŋ e Zioŋko mocwâc mi jukac me?
 ŋicwofuŋ‐ticnezi hae maŋnao mi jukac me?”
“Jaŋe wemocte ɋâŋ qâqâtâczi
â mâreŋ jabaonec nemuɋâŋzi bâiŋnumbiŋ?”
20 “Nânâ bâbâsu dameŋ i jâurukicne,
â ʒoaŋ dameŋ i tarakac wâc,
ehame babafic moc mi fua‐nârewec.”
21 Ŋicfâc‐nane ba sipiric ejarekicnere buheric enarekac
no busâqoc manahuc bipic tatara ekopac.
22 Gileade haeo wokemaŋ moc mi fokac me?
Me dota ira moc mi jukac me?
Ŋicfâc‐nane jaŋere bâbâpiaŋ
i wemocte mi fuakac?