15
Ŋic sahac opâ wâwânâŋhec jaŋere dâŋ
1 Wofuŋzi Mose â Aroŋ kecʒiŋuc jasawec:
2 “Ŋohe Israe ŋic ŋokac kecʒiŋuc jazanic: Ŋic moc sahac tofa‐ticnaonec opâ wahaocmu i wâwânâŋhec eocmu.
3 Ehame sahac opâ‐ticne wâwânâŋhec irec sâcmutâc kecʒiŋuc fokac: Sahac opâ‐ticne wahahuc foekac me waharâ mocwâc omaewec ŋic e sifu wâwânâŋhec jaha ekac.
4 Irec ira me ira fome fofozi wâwânâŋhec jaha eocmu, me ira me ira ŋeme ŋeŋezi wâc wâwânâŋhec jaha eocmu.
5 Me ŋic izi me izi fofo‐ticne ba bâuac eocmu e qoruc wiac‐ticne ʒurerâ e jahacne wâc opâ ruazejec, ehuc wâwânâŋhec jaha juha hae ŋafezejec.
6 Me ŋic izi me izi ŋic sahac opâ‐ticne wahame ŋewec ijaha ŋeocmu e qoruc wiac‐ticne ʒurerâ e jahacne wâc opâ ruazejec, ehuc wâwânâŋhec jaha juha hae ŋafezejec.
7 Me ŋic izi me izi ŋic sahac opâ‐ticne wahaekac e ba bâuac ecneocmuzi qoruc wiac‐ticne ʒurerâ e jahacne wâc opâ ruazejec, ehuc wâwânâŋhec jaha juha hae ŋafezejec.
8 Me ŋic sahac opâ‐ticne wahaekac e ŋic moc tâfeckeme eki qoruc wiac‐ticne ʒurerâ e jahacne wâc opâ ruazejec, ehuc wâwânâŋhec jaha juha hae ŋafezejec.
9 Me ŋic sahac opâ‐ticne wahaekaczi sate faio ŋeme sate i wâwânâŋhec jaha eocmu.
10 Me ŋic e wiac i me i ŋefackeocmu i ŋic moczi ba bâuac erâ wâwânâŋhec jaha juha hae ŋafezejec; me moc e wiac iŋucne baraocmu e qoruc wiac‐ticne ʒurerâ e jahacne wâc opâ ruazejec, ehuc wâwânâŋhec jaha juha hae ŋafezejec.
11 Me ŋic sahac opâ‐ticne wahaekaczi meticne mi ʒuʒure ŋic moc ba bâuac ecneocmu e qoruc wiac‐ticne ʒurerâ e jahacne wâc opâ ruazejec, ehuc wâwânâŋhec jaha juha hae ŋafezejec.
12 Me ŋic sahac opâ‐ticne wahaekaczi kuʒi moc ba bâuac eme kuʒi i henʒaŋnenʒepieŋ, oto wiac ine opâzi ʒurenʒepieŋ.
13 “Eme ŋic sahac opâ‐ticne wâwânâŋhec e ɋiɋic qarâ ɋaɋackeocte ʒoaŋ gie bapa 7 wose fezejec. Dameŋ i tarame qoruc wiac‐ticne ʒurerâ e jahacne wâc opâ fifisinao rarâ ruahuc ɋaɋackezejec.
14 Erâ ʒoaŋ gie bapa namba 8 ira ine hapâ me buni jajahec rocjofarâ tutumaŋ qoruc bozere motâcko Wofuŋte maio taha bapa râcnezejec.
15 Eme taha bapazi taha râeme moc i sâqocne tâtâmire tahare biŋe eha moc ine taha bâzire biŋe ezejec. Ehame taha bapa e Wofuŋte maio ŋic wâwânâŋ‐ticnere erâ kiwiric jâoc rozejec.
16 “Ŋic moc e wie gorewac‐ticne hoŋkeocmu e sahac‐ticne sasawa opâzi ʒure‐fârezejec, ehuc wâwânâŋhec jaha juha hae ŋafezejec.
17 Ehame wie gorewac‐ticnezi ŋaqi wiac me fofo mâki bânâŋkeme opâo ʒure‐fârenʒepieŋ, eme wâwânâŋhec jaha foha hae ŋafezejec.
18 Me ŋic moczi ŋokac mochec fohuc wie gorewac‐ticne hoŋkeme jahe mâmâc jaha opâ ruarâ wâwânâŋhec jaha juhapire hae ŋafezejec.
Ŋokac wâwânâŋhec jaŋere dâŋ
19 “Ŋokac moc e mosa dameŋ‐ticnao soc rohuc juocmu e wâwânâŋhec erâ juhame ʒoaŋ gie bapa 7 tarazejec; ehame moczi ba bâuac ecnerâ wâwânâŋhec jaha juha hae ŋafezejec.
20 Eme ŋokac e wiac irec me irec fainao fome wiac izi wâwânâŋhec jaha eocmu; me wiac i me i irec fainao ŋeme wâwânâŋhec jaha eocmu.
21 Me moc e fofo‐ticne ba bâuac eocmu e qoruc wiac‐ticne ʒurerâ e jahacne wâc opâ ruazejec, ehuc wâwânâŋhec jaha juha hae ŋafezejec.
22 Me ŋokac e wiac i me i irec fainao ŋeha ŋic moczi ba bâuac erâ ŋaqi wiac‐ticne ʒurerâ e jahacne wâc opâ ruazejec, ehuc wâwânâŋhec jaha juha hae ŋafezejec.
23 Me ŋokaczi ŋec foc ewecko wiac moc fowec i ŋic moczi ba bâuac ehuc wâwânâŋhec erâ juha hae ŋafezejec.
24 Me ŋic moc e ŋokac iŋucne ehec foha ere wâwânâŋzi erao fotâcneme wâwânâŋhec jaha juha ʒoaŋ gie bapa 7 tarazejec. Ehame ŋic e fofo foraocmu sâc fofo izi wâwânâŋhec efârezejec.
25 “Me ŋokac moc e mosa dameŋ‐ticne mi maickeha soc roocmu, me mosa dameŋ‐ticne tarame sifu soc ʒuhuckerâ roocmuo ine soc rohuc juocmu dameŋ irec sâc wâwânâŋhec erâ juzejec, mosa dameŋ‐ticnao wâwânâŋhec eekac irec sâc hâcne wâwânâŋhec ezejec.
26 Soc rohuc fofo fainao foocmu fofo izi mosa dameŋ‐ticne maickeme fofo foekac irec sâc ezejec, me wiac i me i irec fainao ŋeocmu izi wâwânâŋhec ezejec, ine mosa dameŋ‐ticnao ŋeŋe wiac‐ticne wâwânâŋhec eekac irec sâc.
27 Eme moczi wiac i ba bâuac eocmu e wâwânâŋhec ehuc qoruc wiac‐ticne ʒurerâ e jahacne wâc opâ ruarâ sifu wâwânâŋhec jaha juha hae ŋafezejec.
28 Me socticne kereŋkeme ʒoaŋ gie bapa 7 wose fezejec; eme irec faicnao ɋaɋackezejec.
29 Ʒoaŋ gie bapa 8 ira ine hapâ me buni jajahec rocjofarâ tutumaŋ qoruc bozere motâcko taha bapa râcnezejec.
30 Eme taha bapazi taha râeme moc i sâqocne tâtâmire tahare biŋe eha moc izi ine taha bâzire biŋe ezejec. Eme taha bapa e Wofuŋte maio ŋokac wâwânâŋ‐ticnere erâ kiwiric jâoc rozejec.
31 “Israe ŋic jaŋe tirific‐nane ŋondeŋ‐jeŋicko ŋekac i gâc hecnehuc hâmonʒipiŋte wâwânâŋ‐jeŋicte erâ uŋ sawaŋ ejarezemec.”
32 Ʒi ŋic moc sahac opâ‐ticne wahaocmu me sahac tofa‐ticnao opâ hoŋkehuc wâwânâŋhec eocmu ere sâcmutâc.
33 Erâ sâcmutâc i ŋokac moc mosa dameŋ‐ticne maickeme wâwânâŋhec eocmu, me ŋic ŋokac i me i sahac opâ‐jeŋic wahaocmu jaŋere biŋe, me ŋic moczi ŋokac wâwânâŋhec ehec foocmu ere biŋe wâc mâmâc eocmu.