16
Kiwiric rorore hombaŋ sâko
1 Aroŋ ŋokâ jahec‐ticne jahe Wofuŋte maio fuarâ hâmopic irec faicnao Wofuŋzi Mose dâŋ kecʒiŋuc âzâcnewec:
2 “Go hahacge Aroŋ e hâmozacte âzâcnetec tirificte ââketâc râpenao katapa tapanere maŋfuŋko dameŋ sâc mi warezejec, no ʒira hâcne karorac maŋko fuapemu.
3 Aroŋ e tirificko wefuocte wiac kecʒiŋuc rorâ wefuzejec: Sâqocne tâtâmire tahare biŋe bulimakao motecnezi ŋicne moc â taha bâzire biŋe lama ŋicne moc, iŋuc rocjofarâ wefuzejec.
4 Ehuc ŋaqi maŋne â kike ŋaqi heme hume umbikazi basanaŋkerâ du kakambuc mâmâc heme huzejec. Wiac izi gie ŋaqi tirine ekac, i hâcne opâ ruarâ heme huzejec.
5 Erâ e Israe kikefuŋ jaŋeraonec noniŋ ŋicne jajahec sâqocne tâtâmire tahare biŋe rocjofahuc lama ŋicne moc taha bâzire biŋe rozejec.
6 “Eme Aroŋ e jahacne â wiacfâc‐ticne jaŋere kiwiric roocte bulimakao i sâqocne tâtâmire tahare biŋe râezejec.
7 Iŋuc erâ noniŋ jajahec rocjofarâ Wofuŋte maio tutumaŋ qoruc bozere motâcko râec‐jofazejec.
8 Râec‐jofarâ moc Wofuŋte biŋe â moc Aʒaʒele nemure biŋe eocte ɋâsâi qazejec.
9 Erâ Wofuŋte biŋe âke fuaocmu i sâqocne tâtâmire tahare biŋe râezejec.
10 Aʒaʒelere biŋe âke fuaocmu i ine ɋâricne domahame Wofuŋte maio râehuc kiwiric rorâ mâreŋ burocnao Aʒaʒelerao ecneme razejec.
11 “Aroŋ e bulimakao i e jahacne â wiacfâc‐ticne jaŋere kiwiric roocte sâqocne tâtâmire tahare biŋe râezejec, ehuc e jahacnere wâc manasuhuc sâqocne tâtâmire tahare biŋe qâhâmozejec.
12 Ehuc alata Wofuŋte maio ŋekac irecnec ʒoc kine gomba tâtâcko hezurâ hosâc âsure wiac uucne me jajahec fufusuc i ââketâc maŋnao bafisizejec.
13 Erâ hâmozacte ʒoc ʒahuc fokac ira râeme hosâc âsure rombâŋzi qorac tapa katapa tapane sâckezejec.
14 Ehame bulimakao soc gâcne rorâ meticnezi qorac tapa katapa tapane maŋfuŋnao â fainao tieme arec 7 ezejec.
15 “Eme irec faicnao sâqocne tâtâmire tahare biŋe noniŋ moc ŋic jaŋere erâ qâhâmozejec, ehuc socticne ââketâc râpenao bafisihuc bulimakao soc tiewec irec sâc jaha ehuc qorac tapa katapa tapane fainao â maŋfuŋnao tiezejec.
16 E iŋuc ehuc Israe ŋic jaŋe wâwânâŋhec â qaqatara erâ sâqocne‐jeŋic sasawazi tirific hegâpârembiŋ i bâtirizejec. Jaŋe wâwânâŋhec juhapie tutumaŋ qoruc bozere manasuhuc iŋuc hâcne ezejec.
17 Aroŋ e jahacne me wiacfâc‐ticne â Israe ŋic jaŋere kiwiric roocte tirificko ferâ juhame ŋic moczi tutumaŋ qoruc bozemaŋko moc mi juzejec.
18 Kiwiric rome tarame waharâ Wofuŋte maio alata ŋekac i bâtirizejec, ehuc noniŋ bulimakao soc gâcne rorâ alata ʒuŋene râreckehuc ruacnezejec.
19 Ehame meticnezi soc gâcne tieme arec 7 eha Israe ŋic jaŋe alata hegâpârembiŋ i ʒure ɋaɋackehuc bâtirizejec.
20 “Eme tirific â tutumaŋ qoruc boze erâ alata irec bâbâtiri gie bame tarame noniŋ moc i tahare biŋe ɋâricne râezejec.
21 Ehuc mejahec‐ticne noniŋ qizecnao râehuc Israe ŋic ŋokac jaŋere kiŋ bahac â qaqatara erâ sâqocne mutaniŋkezejec, ehuc noniŋte faio mume feha ŋic moc ʒawierâ jukac e hâcne soreme mâreŋ burocnao jowa razejec.
22 Eme noniŋ e kiŋ bahac fainao râekicne i de âsic erâ mâreŋ tuhu pectâcko fisime ŋiczi soreme mâreŋ burocnao ra juzejec.
23 “Eme Aroŋ e tirificko feocte ŋaqi hewec i tutumaŋ qoruc bozeo ferâ hetara ira râeme fozejec.
24 Ehame fic maŋne moc bâtirikicne ira opâ ruarâ gie ŋaqi‐ticne moc i heme hume waharâ e jahacne â ŋic jaŋere biŋe taha bâzi rikezejec, ehuc e jahacne â ŋic jaŋere kiwiric rozejec.
25 Ehuc sâqocne tâtâmire tahare wokemaŋ i alatao rikezejec.
26 Eme noniŋ Aʒaʒele nemurao jowac rawec ŋic e ŋaqi‐ticne ʒurerâ e jahacne wâc opâ ruarâ teuŋko raʒizejec.
27 Erâ socjekic bâbâtiri gie bazore tirificko bafekicne bulimakao â noniŋ i jahere fâri hae râpenao bacjofa hunʒepieŋ, ehuc sahac â biuc erâ hojekic ʒocko behepie ʒâtâmirezejec.
28 Eme wiac i rikeocmu ŋic e iŋuc jaha ŋaqi‐ticne ʒurerâ e jahacne wâc opâ ruarâ teuŋko raʒizejec.
29 “Eme dâŋsanaŋ kecʒiŋuc foŋarehuc juzejec: Ŋoŋe mosa namba 7 irec ʒoaŋ gie bapa 10 ira sowa juhuc ŋaŋacne mecne â ŋic jabane ŋondeŋ‐ŋeŋicko jueŋgopieŋ jaŋe mecne gie moc mi banʒepieŋ.
30 Ʒoaŋ ira ɋaɋackeniŋte kiwiric ŋowac rozo, ehame Wofuŋte maio sâqocne tâmiric domanʒepieŋ.
31 Ʒoaŋ i sabata hombaŋ fekicne, irec erâ sowa junʒepieŋ; dâŋ izi hâcne foŋare rahuc juzejec.
32 Eme taha bapa mamac‐ticnere âkehoc wokemaŋ ruacnekicne â mufiriekicne e tiri ŋaqi heme hume tiri gie bazejec.
33 Ehuc furufic â tutumaŋ qoruc boze erâ alata bâtirihuc taha bapa âgofâcne erâ kikefuŋ guru sasawa jaŋere kiwiric rozejec.
34 Israe ŋic sâqocne‐jeŋicte erâ jara mocte maŋnao arec wâŋ kiwiric‐jeŋic rozo, dâŋ izi hâcne dâŋsanaŋ‐ŋeŋic erâ foŋare rahuc juzejec.” Eme Mose e Wofuŋzi mutâcnecnewec irec sâc ewec.