26
Haesac motâc soŋaŋ â micne jaŋere ʒâŋe biri
1 Haesac motâc soŋaŋ jaŋere ʒâŋe biri kecʒiŋuc: Korare ɋâricfâc jaŋeraonec Korere ŋokâ Meselemia, e Asafare ɋâricfâc jaŋeraonec.
2 Eme Meselemiare ŋokâfâc ine ʒiŋuc fuambiŋ: Mârâc ŋokâ Ʒekaria, eme ere râpeo Jediae fuawec. Eme ere râpeo Ʒebadia, eme ere râpeo Jataniele fuawec.
3 Eme ere râpeo Elam, eme ere râpeo Johanaŋ, eme ere râpeo Elihoenai fuawec.
4 Eme Obededom ere ŋokâfâc ine ʒiŋuc fuambiŋ: Mârâc ŋokâ Semaja, eme ere râpeo Joʒabada, eme ere râpeo Netanele;
5 eme ere râpeo Amiele, eme ere râpeo Isasa, eme ere râpeo Peuletai, Obededom e Anutuzi jambuŋkewec hâcne.
6 Ehame ŋokâ‐ticne Semaja ere ŋokâfâc wâc fuambiŋ. Erâ jaŋe ŋic tâpiri sâkohec jumbiŋte kikefuŋfâc‐jeŋic qaŋeŋ‐jopahuc jumbiŋ.
7 Eme Semajare ŋokâfâc ine ʒiŋuc: Otini, Refaele, Obede â Eliʒabada. Eme ɋa jahecne Elihu â Semakia jahe ʒoɋac‐jekichec jaha.
8 Ŋic i jaŋe jaŋacne ŋokâ ɋafâc‐jeŋic jaŋe Obededomte ɋâricfâc sasawa. Jaŋe gie bapare ʒoɋac‐jeŋic fowec; qâqâhâc ʒare‐jeŋic 62.
9 Eme Meselemiare ŋokâ ɋafâc ʒoɋachec 18 jumbiŋ.
10 Eme Merarire ɋâricfâc jaŋeraonec Hosa ere ŋokâfâc ʒiŋuc jumbiŋ: Micne Simiri, e mârâc fufua aricne, erâ sifu mamac‐ticnezi micne âkendâŋnewec.
11 Eme ere râpeo ine Hilikia, eme ere râpeo Tebalia, eme ere râpeo Ʒekaria, Hosare ŋokâ ɋafâc sasawa jaŋere ʒare 13.
12 Haesac motâc soŋaŋ i jaŋe micnefâc‐jeŋic jaŋerao ʒuhuckehuc qomâfâc‐jeŋic jaŋe embiŋ irec sâc jaha ehuc kiŋaŋ gie‐jeŋic i Wofuŋte ufuŋko bahuc jumbiŋ.
13 Eme kâcɋene â piticne jaŋe garikiŋ‐jeŋic sâc motâc‐jeŋic forawec irec ɋâsâi mâmâc qambiŋ.
14 Ehuc ʒoaŋ wewefunaopec motâc fowec irec ɋâsâi qapie Selemia âke fuawec. Eme ŋokâ‐ticne muketeŋ saric Ʒekaria ere wâc ɋâsâi qapie motâc faicpec irec soŋaŋ e âke fuawec.
15 Ehame Obededomte ɋâsâi qapie motâc juwicpec irec soŋaŋ e âke fuawec; ehame ŋokâfâcne jaŋe rowaŋfic qikiŋne‐jarembiŋ.
16 Eme Supim â Hosa jahere ɋâsâi qapie ʒoaŋ huhunao motâc fowec erâ hata hâŋ fekac ira Salekete motâc fowec irec soŋaŋ âke fuac‐jofawec. Ehame ŋifec â ŋifec soŋaŋ domambiŋ.
17 Ʒoaŋ wewefunaopec ira ʒoaŋ gie bapa sâc ŋic 6 jaŋe soŋaŋ domambiŋ â faicpec ira ʒoaŋ gie bapa sâc ŋic jahec â jaheczi jumbiŋ â juwicpec ira iŋuc jaha ʒoaŋ gie bapa sâc jahec â jaheczi jumbiŋ. Eme rowaŋfic ira ine ʒoaŋgie bapa sâc jajahec jajahec iŋuc jumbiŋ.
18 Eme ʒoaŋ huhunaopec ʒae fowec ira jahec â jahec jaŋe hatao jumbiŋ â jajahec jahe ine ʒaeo jupic.
19 Korare ɋâricfâc â Merarire ɋâricfâc jaŋere guruoneczi haesac motâc soŋaŋ jumbiŋ jaŋere ʒâŋe biri ine hâcne.
20 Eme Lewiŋic jaŋeraonec Ahiazi Anuture ufuŋko ʒeŋaŋ ŋerawec i mecne â tahare ʒeŋaŋ mutirikicne i mâmâc soŋaŋkewec.
21 Eme Geresoŋte ɋâricfâc jaŋeraonec ɋâric‐ticne moc Ladaŋ, eme erao fuambiŋ jaŋere micne ine Jehiele.
22 Eme Jehielere ŋokâ jajahec Ʒetam â ɋaticne Joele jahe Wofuŋ ufuŋ‐ticnere ʒeŋaŋ i soŋaŋkehuc jupic.
23 Eme Amaram â Izara â Heboroŋ â Uʒiele jaŋere ɋâricfâc jaŋeraonec
24 ine Geresomte ŋokâ Mose ŋosa‐ticne Sebuelezi ʒeŋaŋ ŋerawec irec soŋaŋ kâcɋene juwec.
25 Eme ɋaticne Elieʒere ŋokâ Rehabia â Rehabiare ŋokâ Jesaja; eme Jesajare ŋokâ Joram â Joramte ŋokâ Ʒikiri â Ʒikirire ŋokâ Selomoti.
26 Eme Selomoti e â qomâfâcne jaŋe ŋicwofuŋ Dawidi â garikiŋ gurune gurune jaŋere micne erâ momori tauseŋ gurune gurune â 100 gurune gurune jaŋe tahare ʒeŋaŋ mutiripie ŋerawec irec soŋaŋ jumbiŋ.
27 Eme ʒikao wiac gâcne rokicne taha izi Wofuŋte ufuŋ ba bâpiaŋ eniŋte irec biŋe bâtirimbiŋ.
28 Erâ wâc findaŋdâŋ mumu ŋic Samue â Kisi ŋokâ‐ticne Saulo, erâ Nerare ŋokâ Abene â Zeruja ŋokâ‐ticne Joabe jaŋe wiac bâtirimbiŋ, ine hâcne taha bâtirikicne sasawa i Selomoti â qomâfâcne jaŋe hone soŋaŋ efârembiŋ.
29 Eme Izarare ɋâricfâc jaŋeraonec Kenania â ŋokâfâcne jaŋe Israe ŋic jaŋere erâ sahackopec giere fekicne â mumutara ŋic âkendâŋ‐jopambiŋ.
30 Eme Heboroŋte ɋâricfâc jaŋeraonec ine Hasabia â qomâfâcne ŋic ʒoɋac‐jeŋichec 1 tauseŋ 700 jaŋe Jordaŋ opâonec ʒoaŋ huhunaopec Israe ŋic jumbiŋ jaŋe Wofuŋte gie â ŋicwofuŋte gie bahapie hone soŋaŋ ejarembiŋ.
31 Eme Heboroŋte ɋâricfâc jaŋeraonec ine Jeria e Heboroŋte ɋâricfâc gaŋne gaŋne fua wefumbiŋ â garikiŋ gurune gurune jaŋere micne juwec. Eme Dawidizi ŋicwofuŋ juhame jara 40 ewec dameŋ ira babasa gie bahuc jaŋere guruo momori ŋic ʒoɋac sâko‐jeŋichec Gileade mâreŋko Jazere haeo jupie bafuac‐jopambiŋ.
32 Eme Dawidizi Jeria â qomâfâcne ŋic ʒoɋac‐jeŋichec 2 tauseŋ 700 garikiŋfâc‐jeŋic jaŋere micne hâcne, jaŋe Rubeŋ guru â Gade guru â Manase guru dâkâne jaŋe Anuture gie â ŋicwofuŋte gie bahapie hone soŋaŋ ejareniŋte âkendâŋ‐jopawec.