3
Ŋokac e ŋicbiŋe‐ticnere maŋhâhâŋ ecnewec
1 No maŋnanezi ʒâfickeekopac e hâcne
ŋafene ŋafene guŋɋâri juhuc basapo,
basahuc mi bâfuapo,
â wiracnepe okacne mi bâtikie‐narewec.
2 Eme no ʒiŋuc mupo: “No faharerâ hae sâkoo razepac,
ehuc hae hata sâc â hae ʒoŋa sâc babasa gie bazepac.”
No iŋuc murâ ra basaku mi bâfuapo,
â wiracnepe okacne wâc mi bâtikie‐narewec.
3 Eme ruc bapa ŋic jaŋe hae soŋaŋ juhuc bâfuacnupie
ʒiŋuc wio‐jarepo: “Ŋoŋe maŋnanezi ʒâfickeekopac
e moc honembieŋ me?”
4 Erâ no wio‐jarerâ jowaruhuc izia
maŋnanezi ʒâfickeekopac e bâfuapo.
Ehuc mocwâc behecnurâ razacte ro basanaŋkerâ
neŋgoc‐nanere ficko jowa rapo,
erâ neŋgoc‐nanezi rocnuwec ficmaŋ ira râepo.
5 O Jerusalemte otâfâc,
no tiki noniŋ â kâte bulimakao
jaŋerao ɋetickehuc ŋaza sanaŋkepe:
Ŋoŋe joroc biaŋ‐nane kosa mi wiwickenʒepieŋ,
e jahac mana ɋâɋârerâ faharezejec.
Bâbâtumaŋ fuaocte birickerâ warembiŋ
6 Mâreŋ burocnaonec wemo wiac warekac?
Wiac i honepene âbârâ ŋic jaŋeraonec
wiac âsu biaŋ fuŋne fuŋne
ʒocko râepene ʒame hosâc feekac
irec sâc ekac.
7 Honeniŋ! Ŋicwofuŋ Salomo e kanʒe‐ticnao
reŋkerâ wareŋgopieŋ,
ehame Israe ʒikaŋic tâpirihec 60 jaŋe
orâŋ bârâŋ ecnehuc ʒâhec bâni ecneŋgopieŋ.
8 Jaŋe ʒika sâqe‐jeŋichec sasawa
erâ ʒika qaqa saric.
Jaŋe ŋafeo râsi fisipie
jopa jâpec ejareniŋte ʒikare wiac‐jeŋic
baju‐fâreŋgopieŋ hâcne.
9 Ŋicwofuŋ Salomozi mume kanʒe‐ticne
i Lebanoŋ tikionec jâc wiaczi bambiŋ.
10 Ehuc reŋ wiac‐ticne i siliwazi bahuc
rorowec‐ticne golzi bambiŋ,
erâ ŋeŋe‐ticne i Jerusalemte otâfâc
jaŋe qoruc furi sâkozi ba akic embiŋ.
11 Zioŋte otâfâc, ŋoŋe haeonec waharâ
ŋicwofuŋ Salomo ofac hecneniŋ.
E bâbâture dameŋ, ʒeri bubiaŋ dameŋ‐ticnao
neŋgoc‐ticnezi eri hendiŋ hecneme huwec
i herâ warekac hâcne.