4
Ŋic e ŋokac biŋe‐ticne mumbiaŋkekac
1 O âgo biaŋ‐nane, go sahac hawarige biaŋne jâmbâŋ,
ʒâŋe hândâŋge i kuŋkuŋ wipere ʒâŋe iŋucne
rurufa maŋko ŋehuc fikomec,
erâ qizec susucge ʒoricne i noniŋ jaŋe Gileade heâŋkonec
kiwae raʒic wefuc ehuc wahaeŋgopieŋ irec sâc ekac.
2 Micsiecge i lama neŋgocne kanʒaŋ‐jeŋic bâtâcnepie
opâ ruarâ wefueŋgopieŋ
irec sâc qaŋqaŋ jâmbâŋ ekac.
Jaŋe motecfâc‐jeŋic funʒuŋ fâri sasawa
motec tâmiric moc mi jueŋgopieŋ.
3 Bipicge i muc bâbâroŋ irec sâc â memasu bembeŋ,
mauc jahecge ŋifec â ŋifec i rurufa maŋnao
bojazaŋ iŋucne bâruŋkerâ fokac.
4 Upege i Dawidire ficsanaŋ irec sâc,
fic ira ʒika ŋic saric jaŋere wiac
fuŋne fuŋne ɋetickekicne domakac.
5 Susu jahecge i tiki noniŋ motec jajahec
jahe ʒariŋ maŋnao qinʒiŋ nâhuc domakopirec irec sâc.
6 No hae owâeha nâkumuc ʒorame
ʒariŋ âsu biaŋ â hosâc âsu ririke tikio fepemu.
7 Joroc biaŋ‐nane, go sahac hawari biaŋ jâmbâŋ,
go sahac fâsâc jukomec hâcne.
8 O ŋokac biŋe‐nane, go Lebanoŋ tiki beherâ warezemec,
eme nohec mâmâc tiki mâreŋ i beherâ razeperec.
Go Amana, Seniri â Herimoŋ tiki botâŋkonec biac wahazemec,
laioŋ jaŋere jujuonec â lepad jaŋere tiki mâreŋkonec wahazemec.
9 O ŋokac biŋe âgo‐nane, go maŋ bâsifuc enaretec
maŋnane gorao fâfârewec,
go ʒâŋe râqâc honecnutec maŋnane gorao fâfârewec,
qoqonaŋgere qânâ furi sâc mocjahazi
maŋnane bâsifuckewec hâcne.
10 O ŋokac biŋe âgo‐nane, maŋge norao domame biaŋke‐jâmbâŋkekac,
maŋge nore domame aŋacnukac
i manape waiŋ opâre aŋacnuekac irec sâc sirickekac,
â rurua wokemaŋ opâgere âsunezi
wiac âsu biaŋ gâcne sirickekac wâc.
11 O ŋokac biŋe‐nane, bipicge i aŋac baŋacne,
â nameŋ rurumaŋgao baŋac â susu fokac tinac ekac,
erâ ŋaqigere âsu i Lebanoŋ tikire âsu irec sâc.
12 O ŋokac biŋe âgo‐nane,
go ʒariŋ gie motâc herâ ki bakicne irec sâc,
â opâ ʒâŋe bâbâzickekicne iŋucne.
13 Go jufu gie iŋucne,
maŋnao jâc nâkicne â hâmu ɋoza wiac doma rakac.
14 Erâ ʒariŋ wiac âsunehec â wiac nânânezi âsu biaŋ
fuŋne fuŋne fua rakac wâc.
15 Go jufu gieo opâ ʒâŋe fokac
izi nombâŋkonec wefurâ ɋiɋicne raekac irec sâc,
â Lebanoŋ tikionec opâ sâko wahaekac iŋucne.
16 O jowarec, go fuŋkerâ qawarec,
O mula, go iŋuc jaha qawarec,
ehuc jufu gie‐nane fificnepire
âsu biaŋ‐ticne ŋeiŋnerâ razejec.
Ehame joroc biaŋ‐nanezi jufu gie‐ticnao warerâ
jâcfâri aŋac baŋacne nâ bac ezejec.