5
1 No jufu gie‐nane, ŋokac biŋe âgo‐nane hâcne erao warekopac,
ehuc ʒariŋ wiac‐nane âsunehec â wiac
nânânezi âsu biaŋ i ro qâzuc ekopac,
erâ baŋac‐nane opâne â bitune nâkopac,
â waiŋ opâ â susu‐nane i wâc mâmâc nâkopac.
O âgofâc‐nane, ŋoŋe nânâ opâ wiac i nâkupie
maŋŋeŋic ŋokac jaŋerao wâc qohotazejec.
Rârâwiŋ juju i busâqocnehec
2 No maŋɋâri fohuc guŋ ʒiŋuc manapo:
Joroc biaŋ‐nanezi motâcko heickerâ dâŋ ʒiŋuc nazawec:
“Joroc âgo biaŋ‐nane,
go maŋgezi biaŋne ʒâficnuekicte motâc ronarec.
Maniŋ titikuczi qizec‐nane bâŋgumuŋkekac,
â hoe ʒâmbâŋzi qizec susuc‐nane hembânâŋkekâc.”
3 No ŋaqi‐nane biac hetarapac,
irec weniŋuc erâ mocwâc hepe huocmu?
 kike‐nane biac ʒurepac,
irec weniŋuc sohoŋ mocwâc âtepemu?
4 No iŋuc muhape joroc biaŋ‐nanezi meticne motâcko sicneme wefume
honerâ hobu‐nane taŋtaŋ âeckewec.
5 Eme no fahare joroc biaŋ‐nane motâc rocnehape
menaneonec wokemaŋ opâ âsu biaŋzi waharâ motâc mebapane ruacnewec.
6 Ehame joroc biaŋ‐nane motâc rocnepe
e mocwâc mi domahuc biac risie rawec.
No iŋuc honerâ maŋnane gâckewec.
Eme basarâ mi bâfuapo,
â wiracnepe micnaneo wâc mi rowec.
7 Eme ruc bapa ŋic jaŋe hae soŋaŋkehuc juku bâfuacnurâ
ʒâpâ nuhuc ŋaqi‐nane sahacne nowac rorâ bawisembiŋ.
Haesacte ruc bapa ŋic jaŋe iŋuc hâcne enarembiŋ.
8 O Jerusalemte otâfâc, no dâŋ ʒiŋuc ŋaza‐jâmbâŋkepe mananiŋ:
Ŋoŋe joroc biaŋ‐nane bâfuarâ âzâcnenʒepieŋ:
No ere mâretec enarekac.
9 O ŋokac hawari biaŋ mocjaha,
go fuŋne weniŋucte joroc biaŋgere manatec ŋic gâcne jaŋere sâc sirickekac?
Go fuŋne weniŋucte joroc biaŋgere manatec ŋic gâcne jaŋere sâc
sirickeha giedâŋ keci munârekomec?
Ŋokaczi ŋicbiŋe‐ticne mumbiaŋkekac
10 Joroc biaŋ‐nane e ʒâŋe mai‐ticne bâric bâricnehuc socsoc eekac,
e ŋic tauseŋne tauseŋne jaŋere ŋondeŋko juhame biac ʒâŋitazo.
11 Qizec‐ticne i gol ematauckekicne tinac
â qizec susuc‐ticne i mimiŋgeŋ â gâgâpâc, kâec kâecte suhuc iŋucne.
12 Ʒâŋe hândâŋ jahec‐ticne i hapâ jajahec jahe opâ ruarâ
sahac‐jekic ɋaɋac taeŋne eha opâmecko ŋeekopirec irec sâc.
13 Mauc jahec‐ticne jahe mâreŋ bureŋ bakicnao
ʒariŋ â wiac âsu biaŋ fuŋne fuŋne foekac irec sâc,
â bipic‐ticne i wâc ʒariŋ âsu biaŋ iŋucne.
14 Meombâŋ jahec‐ticne i roŋ golzi barâ
fainao qânâ furi sâko birickekicne irec sâc,
â fâri ombâŋ‐ticne i elefaŋte ʒuŋezi ba akic erâ
fainao qânâ furi sâko jaha bohotakicne iŋucne.
15 Kike jahec‐ticne i qânâ wâtuŋ gol râqâcko râepie hurâ domaekac irec sâc,
â hawari‐ticne i Lebanoŋ tikionec jâmâzâc iŋucne.
16 Dâŋmarac‐ticne i boc aŋacne jâmbâŋ,
â sahac hawari‐ticne i biaŋne sasawa.
O Jerusalemte otâfâc,
joroc âgo biaŋ‐nane ere fuŋne iŋuc hâcne.