4
Porofetezi lambe dodoma â oliwa jâc honewec
1 Eme aŋelo nohec dâŋewec e harierâ fuahuc wiwicnuwec, i ŋic moc guŋkonec wiwickepene ɋâreekac irec sâc.
2 Erâ ʒiŋuc nazawec: “Go wemo wiac honekomec?” Mume mupo: “No lambe dodoma moc golzi bakicne honekopac, ehuc fainao wokemaŋ ŋeŋe râqâc â lambe 7 erâ lambe qeŋqeŋ 7 jaha ŋerapie honec‐jopakopac wâc.
3 Ehuc lambe dodoma maŋfuŋnao ŋifec â ŋifec oliwa jâc jajahec domahapire honec‐jofakopac.”
4 Iŋuc murâ aŋelo nohec dâŋewec e ʒiŋuc muhuc wiocnepo: “Bomboŋ‐nane, wiac keci irec fuŋne weniŋuc?”
5 Eme aŋelo nohec dâŋeweczi dâŋ ʒiŋuc bâtikie‐narewec: “Go wiac irec fuŋne mi manakomec me?” Mume mupo: “Bomboŋ‐nane, no mi manakopac.”
6 Eme ʒiŋuc nazawec: “Serubaberao Wofuŋte dâŋ fuawec ʒine hâcne: Ŋic sasanaŋ me tâpirio mâcne, Mâro‐nanere tâpirio wiac ee bapane fokac, Anutu Tâpiri Ɋuŋɋasaŋ Wofuŋte dâŋ iŋuc.
7 O tiki sâko, go wemo wiac fârine mo? Go Serubabere maio fâucke ʒaŋ erâ wâneŋ ezemec. Eki hâcne ŋic ŋokac jaŋe ʒeri faio ‘Ohec ohec’ mucnehapie fic bupune hebâzickeme taraocmu.”
8 Eme Wofuŋte dâŋ i norao ʒuhuckerâ ʒiŋuc fuawec:
9 “Serubabe e meticnezi fic kecʒirec hobeteŋne râewec, erâ e jahacne mezia fic kecʒi bâzickeocmu. Iŋuc fuame ŋoŋe porofete nore ʒiŋuc mananʒepieŋ: Anutu Tâpiri Ɋuŋɋasaŋ Wofuŋ eki nâŋerao soreme warewec.
10 Moc e wiac afecne fuŋkerâ fuawec dameŋ irec mana sâqoreweczi Serubabere meo bupure wiac ŋemâcne foha honerâ bubiaŋ manaocmu.
“Lambe 7 jaŋe Wofuŋte ʒâŋe hândâŋ ehuc mâreŋ sâko mâreŋ hone‐fâreeŋgopieŋ.”
11 Eme no aŋelo ʒiŋuc wiocnepo: “Oliwa jâc jajahec lambe dodomare maŋfuŋko ŋifec â ŋifec domakopirec jahere fuŋne weniŋuc?”
12 Erâ harierâ wiocnepo: “Wokemaŋte qeŋqeŋ jajahec golzi bakicne jahere ŋifecnao oliwa jâc tieŋne jajahec fokopirec jahere fuŋne weniŋuc?”
13 Eki ine ʒiŋuc nazawec: “Go irec fuŋne mi manakic me?” Eme mupo: “Bomboŋ‐nane, no mi manakopac.”
14 Mupe muwec: “Jahe mâreŋ sâko mâreŋ irec Wofuŋ ere kiŋaŋ qaqa jajahec wokemaŋ rua‐jactekicne hâcne.”