5
Papia foforiekicnezi sawao fuame honewec
1 Eme no mocwâc ʒâŋe fipe feme papia foforiekicnezi mi sawao fuame honezepac i!
2 Eme aŋelozi ʒiŋuc muhuc wio‐narewec: “Go wemo wiac honekomec?” Mume mupo: “No papia foforiekicnezi sawao fotâcneme honekopac, hâŋnere sâc i 20 kubi â otecnere sâc i 10 kubi.”
3 Eme kecʒiŋuc nazawec: “Juda mâreŋ sâko irec sâwecdâŋ fuaocmu i kecira hâcne fokac. Irec fiuc roniŋmu jaŋe sasawa papia ŋifecnao dâŋ fokac irec sâcko bâsirowec‐jopazo, â mumupaŋ dâŋ burecne muniŋmu jaŋe ine papia ŋifecnao dâŋ qâreŋkekicne fokac irec sâcko bâsirowec‐jopazo.
4 No papia i râepe rarâ fiuc roro ŋic jaŋere ficko mecne erâ nore ʒâŋeo ɋetickehuc mumupaŋ dâŋ burecne mueŋgopieŋ jaŋere ficko mâmâc fezejec. Ferâ fohuc ficjeŋic jâc â qânâzi bakicne i sipiricke‐fârezejec, Anutu Tâpiri Ɋuŋɋasaŋ Wofuŋ ere dâŋ iŋuc.”
Ŋokac moc pake maŋnao ŋeha honewec
5 Eme aŋelo nohec dâŋewec e warerâ ʒiŋuc nazawec: “Ʒâŋe fitec feme wiac fuakac i honec.”
6 Iŋuc mume mupo: “I wemo wiac?” Eme muwec: “Wiac fuakac i padire sâc bapa pake.” Erâ ʒuhuckerâ muwec: “Juda mâreŋ sâko irec kiŋ bahac i irec sâc fokac hâcne.”
7 Iŋuc muhame pake tapane ŋehockeme mi maŋnao ŋokac moc ŋeha honezepac i!
8 Eme aŋelozi muwec: “Wiac keci sâqocnere fuŋqizecne.” Iŋuc murâ ŋokac pake maŋnao sârockeme hume aeŋ tapane i mocwâc pake micnao heme ŋewec.
9 Eme mocwâc ʒâŋe fipe feme mi ŋokac jajahec warepire honec‐jofazepac i! Ehame mâŋâŋzi fakac‐jekic bafaharewec; fakec‐jekic i qeʒore fakec iŋucne. Eme jahe sâc bapa pake i rorâ faic sawao bafepic.
10 Iŋuc epire aŋelo nohec dâŋewec e ʒiŋuc muhuc wiocnepo: “Jahe pake wena bawisekopirec?”
11 Eme nazawec: “Sina mâreŋko ira fic moc bacnenicte bawisekopirec, eme ficticne bapire tarame ira hâcne ŋeŋe‐ticnao hepire ŋeocmu.”