18
Ha Pangngalig Chi Labyaɏu Ya Kuis
1 Oli pun lan-alig si Jesus kan cha disipulusla si maludtuchuwala kan chicha, ta pasig cha malluwalu ya achipun cha umuya.
2 Kalala, “Inggew chi osaʼn kuis si osaʼn ili. Lappun ogyatla kan Apudyus ya lappun bo kabibìilala kan cha tagu.
3 Ot inggew bo labyaɏu si hachiʼn ili un mangulli-ullin umoy kan siya mangkadkachegu si kalintogela un kalala, ‘Tuɏungalak u ta achipulak abyakon kan cha kabusuɏk!’
4 “Labyeyeg un achipun chi kuis ilas-asikasu siya, ngim si alungusla kalala si somsomokla, ‘Ulay lu lappun ogyatku kan Apudyus ya lappun kabibìilak kan cha tagu,
5 ngim gapu ta lappogak un pin-an chi labyaɏun alla taktakon, tuɏungak siya si kalintogela ta lappun umalliw mangulli-ullin.’ ”
6 Ot kalan Apu Jesus, “Chongɏonyu ked chi imbyegan chi lawwing un kuis.
7 Ha achipun kamman Apudyus tuɏungan cha chilutukalaʼn tagula un mangkadkachegu kan siya manchawat si ileɏgew ya lilabi? Ha achipunla kamman kakma tuɏungan chicha?
8 Ibyegak kan chikayu, kakmala tuɏungan chicha. Ngim Sakon un Alak chi Tagu, lu mangulilak, awed kamman ochesak si mamati kan sakon?”
Ha Pangngalig Cha Pariseo Ya Manchachagup Si Bugis
9 Ot lan-alig si Jesus kan cha uchum un taguʼn mangilastug si kilalintogcha ya mangam-amsiw kan cha uchum un tagu.
10 Kalala, “Inggew cha chuwaʼn leɏaki un ummoy lalluwalu si templo. Ha osa Pariseo ked ha osa manchachagup si bugis.
11 Ud chaɏom chi templo, summiked chi Pariseo ot malluwalu, kalala, ‘Apudyus, manyamalak kan sika ti chakampun si isuk cha uchum un taguʼn laagum, lauyung ya kachechegchegas. Ya manyamalak bo ti chakampun si isuk chi allayaʼn manchachagup si bugis.
12 Ti sakon, mamidwaak mallaun si sinchuminggu ya mangmangtochak si ingkasimpuɏun cha losan un labbuk.’
13 “Ngim ha manchachagup si bugis, ummachayu un summiked ot achipun mantanged ud langit, ngim tilugtugtugla biɏukungla un lambyabyawi si byasuɏla. Kalala, ‘Apudyus, kacheguwalak u ti malagbyasuɏak!’ ”
14 Kalan Jesus, “Ibyegak kan chikayu, ummoyon chi manchachagup si bugis un imbilang Apudyus un lalintog. Ngim ha Pariseo, achipun lapalintog. Ti ha taguʼn mangipangatu si long-egla, mipabyabya. Ngim ha taguʼn mangipakumbyabya si long-egla, mipangatu.”
Ha Laminchisyulan Jesus Kan Cha Aalak
(Mat. 19:13-15; Mrk. 10:13-16)
15 Illinggew cha uchum un taguʼn langiyoy kan cha aalakcha kan Jesus ta ipatayla imala kan chicha. Ngim intullong pun cha disipulusla, ilomɏancha chicha.
16 Ngim ilayagen Jesus cha aalak ot kalala kan cha disipulusla, “Palubusanyu cha aalak un umali kan sakon. Achiyu ipalit chicha, ti cha katlaʼn aalak chicha cha mipati si Mampangatan Apudyus.
17 Somsomkonyu lu silu achipun umawat si Mampangatan Apudyus un isun chi mangawatala si osaʼn alak, achipun makwaʼn mipati udchi.”
Ha Byaklang Un Leɏaki
(Mat. 19:16-30; Mrk. 10:17-31)
18 Inggew chi osaʼn pangat cha Judio un langimus kan Jesus, “Bibiɏuʼn Mistulu, simma masapuɏʼn kook ta mataguwak kan Apudyus ing-inggala?”
19 Ot kalan Jesus kan siya, “Puggey kalan un bibiɏu kan sakon? Lappun uchum si bibiɏu lu achi abus si Apudyus.
20 Ammum cha bilin Apudyus: ‘Achika makachegchegas, achika pumatoy, achika man-akaw, achim tistiguwan chi chakampun si tuttuwa, ya masapuɏʼn potpotgom cha amam kan ilam.’ ”
21 Summongbyat chi leɏaki un kalala, “Inggan chi kabyen-ogku, ilaminku killingwa cha losan un bilin.”
22 Chingngeɏn pun Jesus chi hachi, kalala, “Awed chi ossaan un langkuɏangam. Man-ingilaka kan cha losan un kukkuwam ked idchom chi ngilala kan cha kapus, ked awed chi bilaklangluʼd langit. Ked umalika, mitun-ud kan sakon.”
23 Ngim chingngeɏn pun chi hachiʼn leɏaki, manchachauy ti amod chi bilaklangla.
24 Intullong pun Jesus un manchachauy siya, kalala, “Patunged kakaskun chi mipatiyan chi byaklang si Mampangatan Apudyus.
25 Ti lagodgochong chi lumlokan chi kameɏ si abut chi talud lu mipatiyan chi byaklang si Mampangatan Apudyus.”
26 Kalan cha langngeɏ, “Simman lù cha makwaʼn matatagu?”
27 Kalan Jesus, “Ha achipun chi tagu kabyeeɏan un makwa, makwaʼn Apudyus ti kabyeeɏala.”
28 Kalan Peter kan siya, “Tilelanmi cha losan ta pigagey lu mitun-ud kami kan sika.”
29 Kalan Jesus kan chicha, “Tuttuwa ibyegak kan chikayu, lu silu malelan si byeɏoyla, willu asawala, willu susuludla, willu cha amala kan ilala, willu cha aalakla gapu si mansimbiyala si Mampangatan Apudyus,
30 ad-achu maatod kan siya si katattagula lu hachiʼn tilelala ya maatod kan siya biyeg un mallalayun.”
Pamitluʼn Jesus Un Langibyega Si Matoyala
(Mat. 20:17-19; Mrk. 10:32-34)
31 Ot intalin Jesus cha disipuluslaʼn lasawaɏan si chuwa, ot kalala kan chicha, “Chongɏonyu! Alla pun un intakuʼd Jerusalem, siya mipatungpaɏan cha losan un inggilin cha propeta mipanggop kan Sakon un Alak chi Tagu.
32 Ti mipuɏangak kan cha Gentil ked pin-acha sakon am-amsiwon, mangig-iggaan si ugud ya tuptuppaan.
33 Sapsaplitancha ya patoyoncha sakon. Ngim si mikatluʼn eɏgew, umuliyak matagu.”
34 Ngim achipun cha disipulusla laawatan chi ilug-uggudla, ti lailimod chi piolaʼn ibyega ya achipun cha ammu lu silu ilugudla.
Pilalin-awan Jesus Chi Kuɏap Un Mampampalimus
(Mat. 20:29-34; Mrk. 10:46-52)
35 Alla pun un michuum cha Jesus ud Jerico, illinggew chi osaʼn lakuɏap un ummaammuy si igid chi kesa un mampampalimus.
36 Chingngeɏla ked cha amod un taguʼn lumaus, ilimusla, “Simma lait?”
37 Kalancha kan siya, “Lumaus si Jesus un iNazareth.”
38 Illipkawla, “Jesus un galak David! Kacheguwalak u!”
39 Ked cha tagu un lamangpangu, ilomeɏancha siya ta gumilok, ngim ilam-amodla chilakeɏ pakuyla un kalala, “Galak David, kacheguwalak u!”
40 Ummillong si Jesus ot impaayegla hachiʼn lakuɏap. Ummachali pun, ilimus Jesus kan siya,
41 “Simma piom un kook kan sika?” Kalala, “Apu, piok un makatullong.”
42 Ot kalan Jesus kan siya, “Makatullongka! Gapu si pammatim kan sakon, lummin-awaka.”
43 Ot kakma lakatullong ot litun-ud kan Jesus un chilaychayawla si Apudyus. Intullong pun cha tagu, chilaychayaw cha bo losan si Apudyus.