19
Cha Jesus Kan Zacchaeus
1 Langoy si Jesus ud Jerico.
2 Inggew chi osaʼn byaklang un leɏakiʼn mangngachen Zacchaeus, siya ap-apun cha manchachagup si bugis.
3 Piolaʼn itullong lu silu si Jesus ngim achipunla mitullong ti amod cha tagu ya mansokbya siya.
4 Ot ummun-ula lalodchak ot summakay si kayun sycamore ta itullongla si Jesus lu lumaus.
5 Lichuum pun si Jesus si hachiʼn kayu, lantanged ot kalala, “Zacchaeus, Chesom lumogsedka ti umaliyak chumuung uwayu si salaʼn eɏgew.”
6 Langkamkammu si Zacchaeus un lummogsed ot amod chi galaslaʼn lammangili kan Jesus.
7 Ngim losan cha taguʼn langitullong, sin-iingokcha un kalancha, “Puggey mampamangili taguʼn halat si osaʼn malagbyasuɏ?”
8 Summiked si Zacchaeus ot kalala kan Apu Jesus si sangwalan cha tagu, “Apu, idchok chi godwan chi kukkuwak kan cha kapus ked lu awed iluyungak si tagu, mangampatok byayachen kan siya.”
9 Kalan Jesus kan siya, “Si salaʼn eɏgew taguwon Apudyus sika ya cha kabyeɏoylu, ti sika bo galak Abraham.
10 Ti Sakon un Alak chi Tagu, ummaliyak utla pita ta singtok cha malagbyasuɏ ta taguwok chicha.”
Ha Pangngalig Chi Buɏawan Un Pilak
(Mat. 25:14-30)
11 Chingngeɏn ked cha tagu imbyegan Jesus, intuɏuyla lan-alig ti ummachaliʼd Jerusalem ya kalan pun cha tagu lu chanchali mallugiyan chi Mampangatan Apudyus.
12 Kalala, “Illinggew chi osaʼn taguʼn langatu saedla un ummoyla ilawat chi kila-Arila si adchayuwan un ili ot langulin.
13 Sakbyey un umoyon, ilayagela cha simpuɏuʼn bubùulola ot lan-atod kan chicha si sin-ossan bilalituk un pilak ot kalala kan chicha, ‘Paachuwonyu allaʼn pilak inggala mangulilak.’
14 “Ngim mansasanga cha kailiyala kan siya ot lambuuncha si misagulud kan siya umoy mangibyega un, ‘Achipunmi pion siya un man-arimi.’
15 “Ngim lachutukan un Ari ot langulin. Ot impaayegla cha bubùulolaʼn langidchela si pilak ta agammuwola lu piga lagalansiyacha.
16 Ha ummula ummoy kan siya, kalala, ‘Apu, simpuɏu galansiyak si pilaklu.’
17 Ot kalan chi Ari, ‘Gettok un bibiɏukaʼn bubùulon. Gapu ta bibiɏu kingwam si laatod kan sika ulay akit, ipaiturayku kan sika simpuɏuʼn ili.’
18 “Ummoy bo mikadwa, un kalala, ‘Apu, lima galansiyak si pilaklu.’
19 Kalan chi Ari, ‘Ipaiturayku kan sika limaʼn ili.’
20 “Ot ummoy chi osa un kalala, ‘Apu, alliya pilaklu. Bilussungku si pangyu ot inteponku.
21 Ti ummogyatak kan sika, ti leyanggaska, mangkuwam chi chakampun si kilawachim ya apitom bo chakampun si immuɏam.’
22 Ot kalan chi Ari kan siya, ‘Lawwikkaʼn bubùulon! Ha ilugudlu siya chi manguis mamabyasuɏ kan sika. Ammum un leɏanggasak un mangkuwak chi chakampun si kilawachik ya apitok chi chakampun si immuɏak.
23 Puggey achi inchipusitu si bangku pilakku ta awed otyan paalaklà magalebku lu mangulilak?’
24 “Oli pun kalala kan cha lasikesiked, ‘Aɏanyu pilak kan siya ked idchonyu si bubùulon un simpuɏu pilakla.’
25 “Ngim kalancha kan siya, ‘Apu, simpuɏu mit chi awed kan siya!’
26 “Ot kalala, ‘Ibyegak kan chikayu, ha taguʼn mapiyeɏ, machogchog-an chi maatod kan siya. Ngim ha taguʼn achipun mapiyeɏ, makaan ulay akit un awed kan siya.
27 Ngim cha kabusuɏk un mangissan kan sakon un man-ari kan chicha, igetongyu chicha utla ya patoyonyu chicha si sangwalak.’ ”
Ha Lachayawan Jesus Si Lichuumala Ud Jerusalem
(Mat. 21:1-11; Mrk. 11:1-11; Jhn. 12:12-19)
28 Lagamput pun Jesus imbyega alla, ummun-ula ummoy ud Jerusalem.
29 Ummachali cha pun ud Bethphage ya Bethany, si bilig Olivo pilaulala cha chuwaʼn disipulusla,
30 un kalala, “Umula kayu si anchiyan iliʼd chomang ked lu gumatong kayu, ochesanyu lipupungod un ayyubun chi changki un chaampun makabyayuwan. Ukasanyu ya inggetongyu utla.
31 Lu awed mangimus kan chikayu, ‘Payuggey ukasan?’ Ibyegayu un, ‘Masapuɏn chi Apumi.’ ”
32 Ot ummoy cha libuun ot inchesancha losan un imbyegan Jesus.
33 Ot ilukasan cha pu lipupungod un ayyubun chi changki, kalan chi singkuwa kan chicha, “Payuggey ukasan?”
34 Ot kalancha, “Masapuɏ chi Apumi.”
35 Ot intallaycha illiyoy kan Jesus. Oli pun inyaplegcha silupcha si ochog chi changki ot langabyayuwoncha si Jesus.
36 Umoyo-oyon pu changki un langakabbyayuwan Jesus, lan-iyapleg cha tagu kan cha silupcha si kesa un ayola.
37 Ummachali pun siya ud Jerusalem, si kesa un man-osog umoy ud Bilig Olivo, lanchaychayaw cha losan un disipulus kan Apudyus un lan-ichakeɏcha gapu si lakaskaschaaw un intullongchaʼn killingwan Jesus.
38 Ot kalancha, “Chayawon taku allaʼn Ari taku un lampeɏpu kan Apudyus! Gapu kan siya, lin-awa ud langit ya machaychayaw si Apudyus.”
39 Kalan cha uchum un Pariseo un likakammos kan cha amod un tagu kan Jesus, “Mistulu, pagingkom cha disipuluslu.”
40 Ot silongbyatan Jesus chicha, “Ibyegak kan chikayu, lu gumilokcha, mampakuy cha allaʼn byetu un manchayaw kan sakon.”
Ha Langibilan Jesus Kan Cha IJerusalem
41 Ummachali pun si Jesus ud Jerusalem, intullongla siudad, lan-ibin gapu si chegula.
42 Kalala, “Chikayuʼn iJerusalem, maammuwanyu otyan un si salaʼn eɏgew chi kasapuɏanyuʼn makatimpuyug kan Apudyus. Ngim si sala lailimod kan chikayu.
43 Chumtong chi timpu un kalliguwon chikayu kan cha kabusuɏyu, sonchon chikayu ya lipiton chikayu ta lappun in-ilonyuʼn umawid.
44 Amiloncha yam-alon chi iliyu ya losan un taguʼn inggew. Amiloncha iwakat cha byetu ta lappun matelan si igewla, ti achipunyu biligbig chi timpuʼn umaliyan Apudyus malaguwan kan chikayu!”
Ummoy Si Jesus Si Templo
(Mat. 21:12-17; Mrk. 11:15-19; Jhn. 2:13-22)
45 Oli pun ummoy si Jesus si templo ot illugilaʼn lampeɏyaw kan cha mallalakuʼn inggew.
46 Kalala kan chicha, “Liigili si ugud Apudyus un, ‘Ha byeɏoyku mauseɏn malluwaluwan cha tagu.’ Ngim lambyalilonyu tataɏɏuwan cha akkawan!”
47 Ileɏgew un umoy mantudtuchù Jesus si templo. Ngim cha ap-apun cha papachi ya mimistulun chi lintog ya cha papangat cha tagu pionchaʼn otoyon siya.
48 Ngim lappun in-ilonchaʼn mangtoy kan siya, ti losan cha tagu chochongɏoncha uguchola.