20
Im-imus Mipanggop Si Kalobbongan Jesus
(Mat. 21:23-27; Mrk. 11:27-33)
1 Osaʼn eɏgew pin-a mantudtuchu si Jesus kan cha tagu si templo ya ibyegbyegala Bibiɏuʼn Chameg. Ummoy kan siya cha ap-apun cha papachi ya cha mimistulun chi lintog ya cha pallakayon cha Judio.
2 Kalancha kan siya, “Ibyegam u kan chikami lu simma kalobbongam un mangwa kan cha laoy? Silu langatod si allaʼn kalobbongam?”
3 Silongbyatan Jesus chicha, “Imusok bo kan chikayu. Ibyegayu kan sakon,
4 chilu lampeɏpuwan chi kalobbongan John un mambunyeg? Leɏpu kan Apudyus willu tagu?”
5 Ot lan-is-isikancha un kalancha, “Simma ibyega taku? Lu kalan takuʼn, ‘Leɏpu kan Apudyus,’ kalala bo, ‘Payuggey achi pilati si John lù?’
6 Ngim lu kalan takuʼn, ‘Leɏpud chi tagu,’ bintukon chitaku kan cha taguʼn alla, ti mamati cha losan un propetan Apudyus si John.”
7 Ot summongbyatcha, “Toan, lappun ammumi lu silu langatod si kalobbongala.”
8 Ot kalan Jesus kan chicha, “Achipunku bo ibyega kan chikayu lu silu langatod si kalobbongak un mangwa kan cha laoy.”
Ha Pangngalig Chi Lantangkon Si Limuɏan Grapes
(Mat. 21:33-46; Mrk. 12:1-12)
9 Oli pun lan-alig si Jesus kan cha tagu, kalala, “Inggew chi osaʼn taguʼn lammuɏà grapes. Ot impatangkonla ot ummoy si sabyaliʼn ili ot labyeyeg udchi.
10 Gummatong pu timpun chi man-aapit, imbuunla osaʼn bubùulola un umoy mangaɏa si buwala. Ngim cha lantangkon chilokmaancha hachiʼn bubùulola ot bilokbokcha siya ot pileɏyawcha un lappun illidchoncha.
11 Ot kasinla imbuun chi osaʼn bubùulola, ngim isula bo kingwacha, pilang-okcha ya kingwacha kabibìilan kan siya, ot pilaoyoncha un lappun illidchoncha.
12 Lambuun bo kasin chi singkuwa si mikatlu ot bilakegcha siya ot ibyellucha si lasin chi limuɏaʼn grapes.
13 “Ot kalan chi singkuwa, ‘Simma ga kook? Ibuunku alakkuʼn tagtagopok ta sigulachuʼn mabiincha kan siya.’
14 “Ngim intullong pun cha lantangkon siya, kalancha kacha osa, ‘Allaya sinlaksun si allaʼn pita. Patoyon taku siya ta mangkuwa taku laksunla.’
15 Ot impalawacha siya si lasin chi limuɏaʼn grapes ot pilatoycha.”
Ilimus Jesus, “Simma koon chi singkuwa si limuɏaʼn grapes kan cha hachiʼn lantangkon?
16 Umoyla patoyon cha hachiʼn lantangkon ked impatangkonla pitala kan cha uchum.”
Chingngeɏn pun cha tagu hachi, kalancha, “Achipun otyan makwa kamatchi!”
17 Intutullong Jesus chicha ot kalala, “Simma pion chi ugud Apudyus un ibyega,
‘Ha byetuʼn illissan cha lampaud ti kalanchaʼn lappun simbila,
siya lambyalilon Apudyus un kapotogen un byetuʼn mangimpon-ed
un misaachen chi byeɏoy.’
18 “Lu silu maodcheg si hachiʼn byetu, maliplip-uk, ked lu awed maodchagen chi hachiʼn byetu, mamokmok ked tumapuk.”
Im-imus Mipanggop Si Mambyayachen Si Bugis
(Mat. 22:15-22; Mrk. 12:13-17)
19 Si chingngeɏn cha mimistulun chi lintog ya cha ap-apun cha papachi, pionchaʼn chokmaan si Jesus si hachiʼn uras ti ammuchaʼn chicha imbyegbyegan Jesus. Ngim achipuncha kingwa ti umogyatcha kan cha tagu.
20 Ot lan-uwaycha si mawayaanchaʼn malokma kan Jesus. Pilasuksukancha cha uchum un leɏaki ot imbuuncha taplu aginchochongeɏcha kan Jesus. Pionchaʼn sikapan si Jesus si im-imuscha ta awed lasuncha un mangichiɏum ya mangipuɏang kan siya si turay ya kalobbongan chi gubillachuɏ.
21 Ummoycha kan Jesus ot kalancha, “Mistulu, ammumiʼn ustu-ustu cha pin-am ug-ugguchon ya itudtuchu. Ya ammumi boʼn lappun laksigom si tagu ya itudtuchum chi katuttuwaan mipanggop si pion Apudyus kan cha tagu.
22 Ibyegam u kan chikami lu sumupling si lintog taku lu mambugis taku si Emperador ud Rome, willu achipun?”
23 Ngim ammun Jesus un pionchaʼn sikapan siya ot kalala kan chicha,
24 “Ipailayu u osa un palata. Silu sinlupa ya singngachen si allaʼn liigili?”
Ot kalancha, “Si Emperador Caesar.”
25 Kalan Jesus kan chicha, “Lu katlat, idchonyu kan Emperador Caesar chi uwala, ya idchonyu bo kan Apudyus chi uwan Apudyus.”
26 Achipuncha masikapan siya si sangwalan cha tagu, gummigillokcha ot laschaawcha si insongbyatla.
Mipanggop Si Umuliyan Chi Tagu Mataguwan
(Mat. 22:23-33; Mrk. 12:18-27)
27 Ummoy cha uchum un Saduceo kan Jesus, chicha achipun mamati un umuli matagu cha latoy. Ot ilimuscha kan siya,
28 “Mistulu, inggilin Moses allaʼn lintog kan chitaku: ‘Lu latoy chi osaʼn leɏaki ya telala asawala un lappun alakcha, masapuɏʼn asaw-on chi suludla hachiʼn labyaɏu ta umalakcha un mibilang si alak chi hachiʼn latoy.’
29 Inggew cha pituʼn lelleɏakiʼn mansusulud. Langasawa panguɏu ot latoy un lappun alakcha.
30 Ot ilasawan chi mikadwaʼn suludla chi labyaɏu, ot latoy bo un lappun alakcha.
31 Katchi bo kumatlu. Katchi killingwan cha pituʼn mansusulud ot latoy cha losan un lappun alakcha.
32 Ked ha alungusla, latoy bo byebyai.
33 Lu umuli kasin matagu cha latoy, silu ustuʼn sin-asawa si byebyai? Ti losanchaʼn pitu ilasawa siya.”
34 Kalan Jesus kan chicha, “Cha tagu utla pita si salaʼn timpu man-as-asawacha.
35 Ngim cha taguʼn ibilang Apudyus un awed kalobbonganchaʼn umuli matagu, un umoy ud langit, achipuncha man-as-asawa.
36 Ti isucha cha angheles un achipun matoy si ing-inggala. Chicha alak Apudyus ti latagucha kasin.
37 “Ked pilaloklokan Moses un umuli matagu cha latoy. Ha ugud Apudyus liigili mipanggop si umapu-apuy un kayu, kalala, si Apudyus, siya Apudyus cha Abraham, Isaac ya Jacob.
38 Siya ked Apudyus cha latattagu, chakampun si Apudyus cha latoy, ti latattagu losan cha tagu kan siya.”
39 Kalan cha uchum un mimistulun chi lintog, “Apu, bibiɏu songbyatlu.”
40 Ti achipuncha makaiteɏod un makaim-imus kan siya.
Ha Im-imus Mipanggop Kan Kristu
(Mat. 22:41-46; Mrk. 12:35-37)
41 Oli pun ilimus Jesus kan chicha, “Pachaggey ibyegan ha Kristu ked galak David?
42 Si David inggilila si libluʼn Psalm un kalala,
‘Si Apudyus un Apu, kalala kan Apuk: Umamuyka si machuwalanku
43 inggala ipaabyakku cha losan un kabusuɏm.’ ”
44 “Lu Apu, kalan David kan Kristu, himma ilolaʼn galak David siya?”
Ha Lampabyasuɏan Jesus Kan Cha Mimistulun Chi Lintog
(Mat. 23:1-36; Mrk. 12:38-40)
45 Si lanchochongngeɏ cha tagu, kalan Jesus kan cha disipulusla,
46 “Allechenyu cha mimistulun chi lintog, ti pipionchaʼn iliklikwos chi anchu-anchuʼn silupcha ya memeɏyedchaʼn chaychayawon cha tagu chicha si mekit. Ya piliyancha boʼn umamuy si kapopotgen un tugew si sinagoga ya pionchaʼn chicha machaychayaw lu awed piyasta.
47 Uyu-uyungancha cha labyaɏu piga lu akawoncha cha kukkuwacha, ked ipailacha un malluwalucha si anchu-anchu ta maleincha kan cha kokkooncha. Gapu si hachi, amod chi machusaancha.”