3
Ha Kilatatagun Chi Mangipangpangu Kan Cha Mamati
(Tit. 1:6-9)
1 Tuttuwa cha allaʼn ug-uggud: Lu pion chi tagu un siya osaʼn mangipangpangu kan cha mamati, bibiɏu ya lapotog un kawachi piola.
2 Ha mangipangpangu, masapuɏʼn lappun kachillawala, ossaan chi asawala, laalled, maattomala cha lawwing un pion chi long-egla, laangsan ya mapotgen. Masapuɏʼn malagmangili ya masapuɏʼn ammulaʼn mantudtuchu.
3 Achipun kabubuuk ya kagugulu, ngim laalus, achipun makasubosubog ya achipun maagum si pilak.
4 Masapuɏʼn ammula mangichaɏan si byeyanla kan tuttuwaon cha aalakla ya potgoncha siya.
5 Ti lu lappun ammula un mangichaɏan si byeyanla, sinchumadlu un achipunla maichaɏan cha mamati kan Apudyus.
6 Masapuɏʼn chakampun si malamchamuʼn mamati, ta achi sumayaw ya achipun machusa un isun chi lachusaan Satalas.
7 Masapuɏ boʼn mabiilan cha achipun mamati, taplu achipuncha siya am-amsiwon ya achipun miɏus-ub kan cha sikap Satalas.
Ha Kilatatagun Chi Diakono
8 Isula bo kan cha diakono, masapuɏʼn potgon cha tagu ya miyun-un-un chi man-uugudcha. Achipuncha kabubuuk ya achipuncha maagum si pilak.
9 Masapuɏʼn mampeɏkas chi somsomokcha un mamangchon si katuttuwaan mipanggop si pammati un impakaammun Apudyus kan chitaku.
10 Masapuɏ boʼn awed pilachaschaʼn akom, ked lu ustu mangkokopyacha, makwaʼn mansimbicha un diakono.
11 Siya bo kan cha asawacha un masapuɏʼn potgon cha tagu chicha, achipuncha mallikud, maattomancha cha lawwing un pion chi long-egcha ya mantegochencha si losan un kooncha.
12 Ha diakono masapuɏʼn ossaan chi asawala ya ammuchaʼn mangichaɏan kan cha aalakcha ya byeyancha.
13 Ti cha diakono un ustu kooncha un mansimbi, mibilangchaʼn langatu ya takcheɏancha ugudcha mipanggop si pammaticha kan Jesu Kristu.
Lappun Miyisuwan Chi Killingwan Apudyus
14 Maluɏatak kan sika si sala, ti lamlamaok un achipun mabyeyeg ked umaliyak manggeggakay kan sika.
15 Ngim lu mataktakak, ha suɏatku mangipakaawat si ustuʼn mambibiyeg taku un lipati si byeyan Apudyus, ked chitaku awechen Apudyus un matattagu, ti chitaku isun chi tukud ya pon-ed un misaachen chi katuttuwaan.
16 Lappun miyisuwan chi lipaila un katuttuwaan mipanggop kan Jesu Kristu un pilati taku,
ti lambyalin siya tagu, ya pilaloklokan chi Ispiritu kilabiɏula
ya illilan cha angheles Apudyus siya.
Libyegbyega mipanggop kan siya si kaili-ili
ya pilatin cha achuʼn tagu siya utla pita,
ya lipangatuʼd langit ta machayaw.