4
Tanchaalanyu Cha Tilutuliʼn Itudtuchu
(1Ti. 1:3-11; 2Pe. 2; Jud. 8-13)
1 Lalaweg chi imbyegan chi Ispiritun Apudyus un chumtong chi timpu un man-awichen cha uchum un tagu ustuʼn pammati, ked tuttuwaoncha cha tuntulli un itudtuchun chi aɏan.
2 Cha pin-a mantudtuchu si tuntulli, aginpapaticha ya achipuncha mailasin cha lawwing un pin-acha koon, ti lambyalin un siya ugalicha.
3 Cha kamatchiʼn tagu, itudtuchucha un mipalit chi mangasawa ya paliyawonchaʼn kalon cha uchum un makan. Ngim killingwan Apudyus cha kalasin cha makan ta kalon cha tagu, ked chitakuʼn lamati kan langammu si katuttuwaan, manyaman taku ked makwaʼn kalon taku ulay siluʼn makan.
4 Ti losan un killingwan Apudyus bibiɏu, ked achipun mipalit un kalon lu manyaman taku kan Apudyus.
5 Ti mibilang un mampeɏkas chi makan gapu si ugud Apudyus ya luwalu taku.
Ha Mitudtuchu Kan Cha Mansimbi Kan Jesu Kristu
(2Ti. 2:14-26)
6 Sulud, lu itudtuchum cha alla kan cha susulud un mamati, mambyalinka bibiɏu un mansimbi kan Jesu Kristu. Machogchog-an chi man-aawatlu si katuttuwaan mipanggop si pammati ya tuttuwaʼn tudtuchu un litudtuchu kan sika.
7 Timothy, achim chochongɏon cha istorya un lappun simbila ti lappun ituɏungla si pammati. Ha koom, ipapatim un mangileɏam si long-eglu un mangwa si pion Apudyus.
8 Alla simbin chi mampakoscheɏan taku si long-eg takuʼn mangwa kan cha koon, ngim simbumaɏu lu pakoscheɏon taku laapudyusan un palagsimbi kan Apudyus, ti likari si salaʼn biyeg taku ya biyeg taku si umaliʼn eɏgew.
9 Tuttuwa cha imbyegak, ked masapuɏʼn patiyon takuʼn ustu-ustu.
10 Ipapati taku un mangwa si pion Apudyus ulay maligatan taku, ti mallamlama taku kan Apudyus un matattagu si ing-inggala, un siya Malagu kan cha losan un tagu, sinchumadlu cha mamati kan siya.
11 Sika Timothy, ibyegam ya itudtuchum cha alla kan chicha.
12 Achim ipalubus un ak-akitoncha sika gapu si kilaalaklu. Ngim sika otyan chi mantuɏachen cha mamati si man-uugudlu, mambibiyeglu, man-aayatlu si asintatagum, mampopotpotlu si pammatim ya kilapeɏkas.
13 Inggala umaliyak utlat, ipupuutluʼn mangibyasa si ugud Apudyus kan cha tagu, segagom chicha, ibyegbyegam ya itudtuchum chi ugud Apudyus kan chicha.
14 Allechem cha illidchon Apudyus un kabyeeɏam si gummingaan cha propeta ya si langipatayan cha mangipangpangu si imacha kan sika.
15 Sosomkom cha allayaʼn intudtuchuk kan sika ta koom si losan un kabyeeɏam ta mangitullongan cha tagu un pumingopingot pammatim.
16 Allechem chi long-eglu ya cha itudtuchum. Ipapatim un mangwa kan cha alla ta matataguka pati cha manchongeɏ kan sika.