Salmo 115
115
Din Tet-ewa Ay Diyos Di Lebbeng Na Ay Madayaw
1 Baken din awak tako mo adi et anggoy Diyos Apo
di lebbeng na ay dayawen tako,
tan matalek yan adi manbalbaliw din layad na en datako.
2 Din nanasyon et magay pan-gapoan da
ay manglaslasoy ay kanan da,
“Into ngin din Diyos da?”
3 Tan si Diyos ay dinaydayaw tako et wadad daya,
yan kabaelana ay amagen amin din laydena.
4 Ngem din sinan didiyos ay daydayawen da
et owat inamag di ipogaw ay balitok ya palata.
5 Adi dan mankali olay waday tepek da,
waday mata da ngem adi dan makaila.
6 Adi dan makadnge olay waday inga da,
adi da makasongsong olay waday eng da.
7 Waday takkay da ngem adi dan makarikna.
Adi dan makadan olay waday siki da,
ya magay madnge ay kali da.
8 Kaman si daida ay magay kabaelana
din nangamag ya mandaydayaw en daida.
9 Dakayo ay Israelita, si Diyos koma di pantalkan yo,
tan salaknibana ya badanganas dakayo.
10 Mantalek kayo en Diyos ay papadin di Apo,
tan salaknibana ya badanganas dakayo.
11 Dakayo amin ay manaydayaw en Diyos, sisya di pantalkan yo,
tan salaknibana ya badanganas dakayo.
12 Adi liw-an Diyos datako, et bindisyonana
amin ay Israelita ya amin din papadi na.
13 Awni et bindisyonana amin ay mangipateg en sisya,
olay nangato ono nababa.
14 Sapay koma ta paad-adoen Diyos di anak yo,
ya siya abe sin ipoli yo.
15 Sapay koma ta si Diyos ay namarsua ed daya ya isnan daga
et dakayo di bindisyonana.
16 Say okan Diyos ed langit yan say panteana,
ngem din indawat na sin ipogaw et din nay ay daga.
17 Olay sino ay nasokpot di leng-ag na,
magay iyat na ay mangdayaw en Diyos ay wadad daya.
18 Ngem datako ay matmatago pay laeng isnan daga
et man-iyaman tako en sisya ed wani ya si eng-enggana.
Madaydayaw si Diyos!