Salmo 116
116
Din Pan-iyamanan Di Insalakan Diyos Si Pese
1-2 Laylaydek si Diyos Apo,
tan kanayon ay dengdengngena din kararag ko.
Isonga sin intiro ay biyag ko,
mankararagak en sisya ay Apo.
3 Waday namingsan ay dilikado di biyag ko,
isonga palalo di egyat ya dandanag ko.
4 Pagak man-adawag en Diyos et kanak en sisya,
“Pangaasim kod paabe ay Apo ta omisalakan ka.”
5 Siged si Diyos, masmaseg-ang sisya
ya ammo na ay makirikna.
6 Salakniban Diyos din magay laing ya kabaelana,
et sin timpo ay nanligligatak, inmisalakan sisya.
7 Isonga mabalin ay tomalna din nemnem ko
gapo sin kinasiged Diyos Apo.
8 Inlisi nas sak-en sin kateyak,
siya abe sin pansadotak ya kaisokbaak.
9 Isonga wadaak ay matmatago,
et mantongpalak sin layden di Apo.
10 Intoltoloy ko ay nantalek olay mo kankanak sin nemnem ko,
“Palalo nan ligat ko,”
11 ya gapo sin danag ko yan inbagak,
“Maga polos di ipogaw si pantalkak.”
12 Sino ngata di maisobalit ko en Diyos sin kinasiged na?
13 Man-idatonak si arak en sisya
ta man-iyamanak sin inmisalakanana.
14 Idaton ko din inkarik en sisya
sin sangoanan di nasinop ay ipogaw na.
15 Napateg en Diyos din kateyan di esa ay ipogaw na.
16 Mansilbiak en sik-a ay Apo
ay kaman met laeng din inyat en nanang ko.
Idi mateyak koma,
inmisalakan ka,
17 isonga man-idatonak en sik-a si pan-iyamanak
ya sik-a abe di pankararagak.
18-19 Din inkarik en sik-a et idaton ko
ed Jerusalem sin lak-am di Timplo
sin sangoanan di nasinop ay ipogaw mo.
Madaydayaw si Diyos Apo!