Salmo 139
139
Ammon Diyos Amin
Sik-a ay Diyos, inilam amin ay wadas nemnem ko,
amin di maipanggep en sak-en yan dadlon kan ammo.
Ammom mo pomikaak ya siya abe mo enak tomokdo,
olay mo addawi ka, ammom di nemnem ya panggep ko.
Ammom mo way emeyak ya mo ibaktad ko ay man-ibbay,
tan omos-osdong ka si owaoway,
isonga amin di ogalik ya kabibiyag ko,
iwed polos di adi kan ammo,
olay din nemnemnemek ay ibagak to.
Bomanbantay ka sin sangok ya sin edegak,
babaen sin panakabalin mo, masalaknibanak.
Kaeetnga ya naoneg di panakaammom sin kaipogaw ko,
adi polos mad-asan di nemnem ko.
Magay mabalin si emeyak ta lomisiak en sik-a,
maga polos di enak pantabonan ta adi kan omil-ila.
Mo emeyak ed langit, wada ka,
mo bomabaak sin kad-an di natey, iso na ay wada ka.
Olay mo tomayawak ta sin belaan ono diposan di agew di enak pantean,
10 wada ka pay dedan isdi ay omipango sin danan,
wada ka ay omitakkay ya bomadang.
11 Mabalin ay kanak, “Awni ta malabi ta makdeng nan kaagawan,
ta waday mabolinget ay enak pantabonan.”
12 Ngem olay sin mabolinget, makaila ka pay dedan,
tan sin pangilam, mapat-a din labi ay kaman kaagawan.
13 Sik-a di namarsua sin awak ya nemnem ko,
pinkem sak-en sin eges nanang ko.
14 Dayawek sik-a, napateg ay Apo,
tan din nangamagam en sak-en et kaeetnga si pannemnem ko.
Nakaskasdaaw am-in di inam-amag mo,
magay dowadowak, dadlonak ammo.*
15 Idi maam-amagak ay adi kaila sin eges inak,
inilam di nas-et ay nansisilpoan di tong-ak,
16 tan inmisisin-eng ka idi daanak maianak.
Naililista sin librom din kabibilang di agew ko,
olay daan pay laeng manlogi din biyag ko.
17 Sik-a ay Diyos, din wadas nemnem mo yan adi kabilang,
naligat ay maawatan.
18 Mo bilangek koma, ad-ado mo darat,
mo bomangonak, wada ka pay laeng sin kad-ak.
19-20 Sik-a ay Diyos et sapay koma
ta peslem din ipogaw ay makapese ya lawa
ay mangipalawlawa en sik-a
ta say tomaynan da koma.
21 Kaliliget ko din manigaan en sik-a,
laslasoyek mo konkontraen daka.
22 Ibilang kos daida ay kalaban ko,
et adi makaan din liget ko.
23 Estem ay Diyos ay ilan nan nemnem ko,
osigem abe din dandanag ko.
24 Ilaem kod tan mo manturongak sin danan ay lawa,
omipango ka sin danan ay manturong en sik-a.
* 139:14 Di esa abe ay kaiologan nina sin Hebreo et: ya ammom amin ay kaipogaw ko.