Salmo 140
140
Kararag Ay Mankedaw Si Panalakniban Diyos
1 Apo, omisalakan ka kod sin mangam-amag si lawa,
sin nay da ipogaw ay palaloy kedse da.
2 Kanayon ay lawa di panggep da
ya ibaw di ilogi da.
3 Kaeegyat ay kaman eweg din tepek da,
kaman gitan di kobra din kali da.
4 Apo, somalaknib ka
sin panakabalin di mangam-amag si lawa,
mankakekedse ay din kadadaelak di panggep da.
5 Nan-amag da sin danan si tagdey ay kaknaak koma
din mangipapangatos nemnem da.
6 Kanak en Apo: Sik-a din Diyos ko,
dengngem koma nan kararag ko
ay mankedaw si badang mo.
7 Yahweh ay Apok ya manakabalin ay omisalakan,
kaman kan salida ay somalaknib sin gobatan.
8 Apo, adim koman ipalobos din panggep di mangam-amag si lawa,
adim ipalobos ay matongpal din lawa ay plano da.
9 Din kalaban ko yan ipapangato da din awak da,
ipataolim koman daida din lawa ay kalkalien da.
10 Matekdag koma di man-gangab ay oling en daida,
maitep-a da komas abot yan adi da makabala.
11 Adim koman ipalobos ay mayat di pantongpalan da
din mangipalawlawa si gait da.
Sapay koma ta din makedse ay manglokloko si iib-a da
et kanayon ay mapasamak di lawa en daida
enggana ay dadlon madadael di biyag da.
12 Apo, ammok ay ikalintegam din magay mabalin da
ya kosto di iyat mo ay mangokom en daida.
13 Sigurado ay din nalinteg, awni et dayawen daka
ya sin kad-am di pantean da.