Salmo 148
148
Idayaw Din Amin Ay Parsua Si Diyos
1 Madaydayaw si Diyos!
Dayawen yo si Diyos, dakayo ay wadad daya.
2 Dayawen yos sisya, dakayo ay aanghel na
ya amin ay wadad daya ay mansilsilbi en sisya.
3 Dayawen yos sisya, dakayo ay agew ya bowan,
ya mankimkimmi ay talaw ed kayang.
4 Dayawen yos sisya, sik-a ay mismo ay daya
ya dakayo ay danom ay nasisinop sin ngato na.
5 Dayawen da koma si Yahweh ay namarsua,
tan inbilina et nawada da.
6 Inkeddeng na di pantean da si eng-enggana
et masapol ay tongpalen da.
7 Dayawen yo abe si Diyos, dakayo ay wadas nan daga,
amin ay danom sin baybay enggana sin lanad na,
ya dakayo ay manbeey sidi ay kaeegyat di ila na,
8 dakayo abe ay kimat, dalalo, andap ya liboo,
mapges ay dagem ay manongpal sin bilin di Apo.
9 Dakayo ay dontog ay nangato ya nababa,
olay dakayo ay kakaiw ya molmola,
dayawen yo amin si Diyos ay namarsua.
10 Dakayo abe ay animal, omali kayo,
mankodkodap ya mantaytayaw, naatap ya naamo,
ta dayawen yo ay kosto si Diyos ay Apo yo.
11 Kaariari ya kaipoipogaw, dayawen yos sisya,
dakayo am-in ay opisyal ya turay isnan daga.
12 Dayawen yo ay babbaro ya babalasang,
anan-ak ya nataengan.
13 Amin kayo, dayawen yos sisya,
tan sisya di kangatoan sin amin ay wada,
napigpigsa di panakabalina
mo din amin ay wadas nan daga ya ed daya.
14 Pinapigsa na din ipogaw na ay Israelita,
ay patpatgena ya laylaydena,
ta say idayaw da am-in sisya.
Madaydayaw si Diyos!