Salmo 149
149
Kanta Ay Pangidayaw En Diyos Begew Sin Nangabakan Din Ipogaw Na
1 Madaydayaw din Apo!
Mankanta kayo si baro ay kanta
ay mangidaydayaw en sisya.
Dayawen yos sisya
sin gimong di matalek ay ipogaw na.
2 Manragsak kayo ay Israelita gapo sin namarsua en dakayo,
manragsak kayo ay man-ili ed Zion gapo sin ari yo.
3 Mansala kayo ay mangidaydayaw sin ngadana,
manambol ya mangitara kayo ay mangidaydayaw en sisya.
4 Tan malaydan si Diyos sin ipogaw na,
gon-gonaana din napakombaba et pangabakenas daida.
5 Manragsak koma din ipogaw na tan nangabak da,
maninsinlabi da koma ay mankanta
begew sin palalo ay ragsak da.
6 Ipigsa da koma ay mangidaydayaw en sisya,
dowan da pay man-egen si kampilan ay nanbinas-il di tadem na,
7 ta baesan da din nanasyon ya dosaen da,
8 ya kadinaan da abe din aari ya papangolo da.
9 Dosaen das daida ta matongpal din inkeddeng Diyos ay dosa,
tan say kaidayawan din matalek ay ipogaw na.
Madaydayaw din Apo!