Salmo 47
47
Si Diyos Di Kangatoan Ay Ari
1 Dakayo amin ay nanasyon, mantampok kayo si ragsak yo.
Ipigsa yon kanta yo ay mangidayaw en Diyos Apo.
2 Tan si Diyos ay Kangatoan et kaeegyat sisya,
manakabalin ay ari isnan intiro ay daga.
3 Inpaabak nan dakami din nanasyon et inturayan mi.
4 Pinili na para en dakami nan daga ay pantean mi.
Siya na di it-it-ek mi ay daga,
dakami ay polin Jacob ay laylaydena.
5 En tinmokdo si Diyos sin trono na,
madnge di tanggoyob ay napigsa.
Bomanogaw abe din ipogaw na
ay mangipaammo sin nangabakana.
6 Mankanta kayo ay mangidayaw en Diyos Apo,
idayaw yos sisya ay ari tako.
7 Tan sisya di mangituray sin intiro ay daga,
isonga dayawen yos sisya babaen si kankanta.
8 Tinmotokdo si Diyos sin nasantoan ay trono na.
Din nanasyon et iturayana.
9 Din tuturay di nanasyon yan masinop da
ta makikadwa da sin ipogaw na,
ipogaw Diyos ay dinaydayaw Abraham.
Tan sisya din kangatoan,
amin ay ari et ena iturayan.